ഇടനെഞ്ച് നോക്കി വെടിവച്ചതിന് ശേഷം സന്തോഷ് തോക്ക് ഉപേക്ഷിച്ചത് രാധാകൃഷ്ണന്റെ ഭാര്യ വാടകയ്ക്ക് താമസിക്കുന്ന വീടിന്റെ വിറകുപുരയില്‍ നിന്ന്; സംശയിക്കത്തക്ക തെളിവുകള്‍ കിട്ടിയില്ലെങ്കിലും ഗൂഢാലോചന സാധ്യത തള്ളിക്കളയാതെ പൊലീസ്; കൈതപ്രത്തെ ബിജെപി പ്രവര്‍ത്തകന്റെ കൊലപാതകത്തില്‍ ഭാര്യയെ ചോദ്യം ചെയ്യും
കൈതപ്രത്തെ ബിജെപി പ്രവര്‍ത്തകന്റെ കൊലപാതകത്തില്‍ ഭാര്യയെ ചോദ്യം ചെയ്യും
കണ്ണൂര്‍: കൈതപ്രത്ത് ഗുഡ്‌സ് ഓട്ടോഡ്രൈവര്‍ കെ.കെ. രാധാകൃഷ്ണന്റെ കൊലപാതകവുമായി ബന്ധപ്പെട്ട് ഭാര്യയെ പൊലീസ് ചോദ്യം ചെയ്യും. രാധാകൃഷ്ണന്റെ ഭാര്യയുമായി പ്രതി സന്തോഷിനുണ്ടായ സൗഹൃദ ബന്ധം രാധാകൃഷ്ണന്‍ എതിര്‍ത്തതാണ് കൊലപാതകത്തിന് പിന്നിലെന്ന് അന്വേഷണ സംഘം കണ്ടെത്തിയ സാഹചര്യത്തിലാണ് ചോദ്യം ചെയ്യുന്നത്.
പ്രതി എന്‍.കെ സന്തോഷ്, രാധാകൃഷ്ണനെ വെടിവെച്ചു കൊല്ലാന്‍ ഉപയോഗിച്ച തോക്ക് കണ്ടെത്തിയത് മിനിയും അമ്മയും വാടകയ്ക്ക് താമസിക്കുന്ന വീട്ടിന്റെ പുറകിലുള്ള പമ്പ് ഹൗസിനടുത്ത് നിന്നാണ്. കൊലപാതകം നടന്ന വീടും ഈ വീടുമായി നൂറ് മീറ്ററിനടുത്തുള്ള ദൂരം മാത്രമേയുള്ളു. സന്തോഷ് ഉപയോഗിച്ച തോക്കിന്റെ ഉറവിടം അറിയാനും കൊലപാതകത്തിന് മുന്‍പോ ശേഷമോ മറ്റാരുടെയെങ്കിലും സഹായം ലഭിച്ചിട്ടുണ്ടോയെന്നും പൊലിസ് അന്വേഷിക്കുന്നുണ്ട്.
പ്രതി സന്തോഷിനെ കസ്റ്റഡിയില്‍ വാങ്ങി ചോദ്യം ചെയ്താല്‍ മാത്രമേ കൂടുതല്‍ വിവരം വ്യക്തമാകുമെന്ന് പൊലീസ് പറഞ്ഞു. പ്രതിയെ വിട്ടു കിട്ടാനുള്ള കസ്റ്റഡി അപേക്ഷ രണ്ടു ദിവസത്തിനകം നല്‍കുമെന്നും പൊലീസ് വ്യക്തമായി. അതേസമയം പ്രതി എന്‍.കെ. സന്തോഷിനെ പയ്യന്നൂര്‍ ജുഡീഷ്യല്‍ ഫസ്റ്റ് ക്‌ളാസ് കോടതി 14 ദിവസത്തേക്ക് റിമാന്‍ഡ് ചെയ്തു. കേസില്‍ രാധാകൃഷ്ണന്റെ ഭാര്യയെ സംശയിക്കുന്ന തരത്തിലുള്ള തെളിവുകള്‍ ഇതുവരെ ലഭിച്ചിട്ടില്ലെങ്കിലും ഗൂഡാലോചനയുടെ സാധ്യത പൊലിസ് സംശയിക്കുന്നുണ്ട്.
സന്തോഷ്, രാധാകൃഷ്ണന്റെ ഇടനെഞ്ചില്‍ നോക്കി വെടിവച്ചതിനു ശേഷം തോക്ക് ഉപേക്ഷിച്ചത് രാധാകൃഷ്ണന്റെ ഭാര്യ താമസിക്കുന്ന വീടിന്റെ വിറകുപുരയില്‍ നിന്നാണ്. വെള്ളിയാഴ്ച്ച രാവിലെ മുതല്‍ തന്നെ ഫോറന്‍സിക് സംഘവും ഡോഗ് സ്‌ക്വാഡും കൊല നടന്ന വീട്ടിലും പരിസരത്തും പരിശോധന നടത്തിയെങ്കിലും വെടിവയ്ക്കാനുപയോഗിക് തോക്ക് കണ്ടെത്താനായിരുന്നില്ല. എന്നാല്‍ പിന്നീട് പൊലിസ് വൈകിട്ട് സന്തോഷുമായി രാധാകൃഷ്ണന്റെ ഭാര്യയും അമ്മയും താമസിക്കുന്ന വാടക വീട്ടില്‍ തെളിവെടുപ്പിനായി എത്തിയപ്പോള്‍ വീടിന്റെ പിന്‍ഭാഗത്ത് പമ്പ് ഹൗസിനു സമീപമുള്ള വിറക് പുരയില്‍ വെടിവയ്ക്കാനുള്ള തോക്ക് കണ്ടെത്തുകയായിരുന്നു.
ഡോഗ് സ്‌ക്വാഡ് നടത്തിയ പരിശോധനയില്‍ വീട്ടില്‍ നിന്നും പൊലിസ് നായ മണം പിടിച്ച് കുറച്ചുകലെയുള്ള വണ്ണാത്തിപുഴയുടെ ഓരത്ത് ചെന്നെത്തിയിരുന്നു. ഇതേ തുടര്‍ന്ന് പുഴയോരത്ത് പൊലിസും നാട്ടുകാരും തെരച്ചില്‍ നടത്തിയെങ്കിലും തോക്ക് കണ്ടെത്താനായില്ല. നെഞ്ചത്ത് വെടിയുണ്ട തുളഞ്ഞു കയറിയതാണ് രാധാകൃഷ്ണന്റെ മരണകാരണമെന്നാണ് പോസ്റ്റുമോര്‍ട്ടം റിപ്പോര്‍ട്ട്.
അതേസമയം, കൈതപ്രത്തെ ബിജെപി പ്രവര്‍ത്തകന്‍ കെ കെ രാധാകൃഷ്ണനെ വെടിവെച്ച് കൊലപ്പെടുത്തിയ കേസ് കണ്ണൂര്‍ റൂറല്‍ എസ്പിയുടെ മേല്‍നോട്ടത്തില്‍ പ്രത്യേകസംഘം അന്വേഷിക്കണമെന്ന് ബിജെപി കണ്ണൂര്‍ നോര്‍ത്ത് ജില്ലാ പ്രസിഡന്റ് കെ കെ വിനോദ് കുമാര്‍ ആവശ്യപ്പെട്ടു. കണ്ണൂര്‍ മാരാര്‍ജി ഭവനില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം. കൊലപാതകം നടത്തിയ സന്തോഷ് സി പി എം പ്രവര്‍ത്തകനാണെങ്കിലും ഇതൊരു രാഷ്ട്രീയ കൊലപാതകമാണന്ന അഭിപ്രായം ബിജെ.പിക്കില്ല എന്നാല്‍ ചില സി പി എം പ്രാദേശിക നേതൃത്വത്തില്‍ നിന്ന് സന്തോഷിന് ചില സഹായങ്ങള്‍ ലഭ്യമാകുന്നുണ്ട്. എ ഡി എം നവീന്‍ ബാബുവിന്റെ മരണ സമയത്ത് പി.പി. ദിവ്യയെ അനുകൂലിച്ച് ഫേസ് ബുക്ക് പോസ്റ്റിട്ടയാളാണ് കേസിലെ പ്രതിയായ സന്തോഷ്.
സന്തോഷിന് എവിടെ നിന്നാണ് തോക്ക് ലഭിച്ചതെന്നും ഫോറസ്റ്റ് ഉദ്യോഗസ്ഥരുടെ യൂണിഫോം ലഭിച്ചതെന്നും പ്രത്യേകമായി അന്വേഷിക്കണം അതോടൊപ്പം തന്നെ കൊലപാതകത്തില്‍ ഉപയോഗിച്ച തോക്ക് കണ്ടെത്താന്‍ പോലീസ് എടുത്ത കാലതാമസവും അന്വേഷണ വിധേയമാക്കണം പ്രദേശത്തെ നാടന്‍ തോക്ക് ഉപയോഗിച്ച് മൃഗങ്ങളെ വേട്ടയാടുന്ന സംഘത്തിലെ പ്രധാന കണ്ണിയാണ് സന്തോഷ്. ഇത്തരത്തില്‍ ലഭിക്കുന്ന കാട്ടിറച്ചി പരിയാരത്തെ ചില പോലീസ് ഉദ്യോഗസ്ഥര്‍ക്കും ലഭിക്കുന്നുണ്ട്. നിലവിലുള്ള അന്വേഷണത്തില്‍ ബിജെപി സംതൃപ്തരല്ല. അതുകൊണ്ടുതന്നെ സമഗ്രമായ അന്വേഷണം നടത്തി പ്രതിക്ക് ശിക്ഷ ഉറപ്പാക്കാന്‍ ആവശ്യമായ നടപടി സ്വീകരിക്കണമെന്നും അദ്ദേഹം പറഞ്ഞു
