ചിത്രപ്രിയയുടെ തലയില് ആഴത്തിലുള്ള മുറിവ്; 19 കാരിയെ മരിച്ച നിലയില് കണ്ടെത്തിയത് വീടിനു ഒരു കിലോമീറ്റര് അകലെ ഒഴിഞ്ഞ പറമ്പില്; ബെംഗളൂരുവിലെ ഏവിയേഷന് ബിരുദ വിദ്യാര്ഥിനിയെ കാണാതായത് ശനിയാഴ്ച മുതല്; മൃതദേഹത്തിന് പഴക്കമെന്ന് പ്രാഥമിക നിഗമനം; ആണ്സുഹൃത്തിനെ അടക്കം ചോദ്യം ചെയ്യുന്നു; മലയാറ്റൂരിലെ സംഭവം കൊലപാതകമെന്ന് സംശയം
മലയാറ്റൂരിലെ സംഭവം കൊലപാതകമെന്ന് സംശയം
മലയാറ്റൂര്: മലയാറ്റൂരില് രണ്ടു ദിവസം മുന്പ് കാണാതായ 19 കാരിയുടെ മരണത്തില് ദുരൂഹത. ഏവിയേഷന് ബിരുദ വിദ്യാര്ഥിനിയെ വീടിന് സമീപം ആളൊഴിഞ്ഞ പറമ്പിലാണ് മരിച്ച നിലയില് കണ്ടെത്തിയത്. മലയാറ്റൂര് മുണ്ടങ്ങാമറ്റം തുരുത്തിപ്പറമ്പില് ഷൈജുവിന്റെയും ഷിനിയുടെയും മകള് ചിത്രപ്രിയയെയാണ് (19) മണപ്പാട്ട് ചിറയ്ക്ക് സമീപം അഴുകിയ നിലയില് കണ്ടെത്തിയത്.
കൊലപാതക സാധ്യത, ഒരാള് കസ്റ്റഡിയില്
ചിത്രപ്രിയയുടെ തലയില് ആഴത്തിലുള്ള മുറിവേറ്റ നിലയിലാണ് മൃതദേഹം കാണപ്പെട്ടത്. ഇതാണ് കൊലപാതക സാധ്യതയിലേക്ക് വിരല് ചൂണ്ടുന്നത്. സംഭവവുമായി ബന്ധപ്പെട്ട് ഒരാളെ പോലീസ് കസ്റ്റഡിയിലെടുത്തതായി സൂചനയുണ്ട്. ഇയാളെ വിശദമായി ചോദ്യം ചെയ്തു വരികയാണ്.
ആത്മഹത്യയാണോ കൊലപാതകമാണോ എന്ന് കാലടി പോലീസ് അന്വേഷിച്ചുവരികയാണ്. മൃതദേഹം ഇന്ക്വസ്റ്റ് നടപടികള്ക്ക് ശേഷം പോസ്റ്റ്മോര്ട്ടത്തിനായി മാറ്റി. പോസ്റ്റ്മോര്ട്ടം റിപ്പോര്ട്ട് ലഭിച്ചാല് മാത്രമേ മരണകാരണം വ്യക്തമാവുകയുള്ളൂ. വീടിന് ഏകദേശം ഒരു കിലോമീറ്റര് മാത്രം അകലെ സെബിയൂര് റോഡിന് സമീപമുള്ള ആളൊഴിഞ്ഞ പറമ്പിലാണ് മൃതദേഹം കണ്ടത്.
കാണാതായത് ശനിയാഴ്ച; മൊബൈല് പരിശോധനയില്
ബെംഗളൂരുവില് ഏവിയേഷന് ബിരുദ വിദ്യാര്ഥിനിയായ ചിത്രപ്രിയയെ ശനിയാഴ്ച മുതലാണ് കാണാതായത്. തുടര്ന്ന് മാതാപിതാക്കള് കാലടി പോലീസില് പരാതി നല്കിയിരുന്നു. കേസിന്റെ നിര്ണ്ണായക വഴിത്തിരിവായേക്കാവുന്ന വിവരങ്ങള്ക്കായി പോലീസ് പെണ്കുട്ടിയുടെ മൊബൈല് ഫോണ് പരിശോധനയ്ക്ക് വിധേയമാക്കും.
മരണം സംബന്ധിച്ച് വിവരങ്ങള് ലഭിക്കുന്നതിനായി ആണ്സുഹൃത്തിനെ ഉള്പ്പെടെ ചോദ്യം ചെയ്തുവരികയാണെന്ന് പോലീസ് വൃത്തങ്ങള് അറിയിച്ചു. മൃതദേഹത്തിന് പഴക്കമുണ്ടെന്നാണ് പ്രാഥമിക നിഗമനം. ഈ ദുരൂഹ മരണത്തില് കൂടുതല് വിവരങ്ങള് പോസ്റ്റ്മോര്ട്ടം റിപ്പോര്ട്ടിന് ശേഷം പുറത്തുവരുമെന്നാണ് പ്രതീക്ഷ.
