ചേർത്തല: ചേർത്തല പള്ളിപ്പുറത്ത് മൂന്ന് മാസം മുമ്പ് റോഡരികിൽ പരിക്കേറ്റ് അവശനിലയിൽ കണ്ടെത്തിയ യുവാവിന്റെ മരണം കാറിടിച്ച് സംഭവിച്ചതെന്ന് പോലീസ് സ്ഥിരീകരിച്ചു. ചേർത്തല ചക്കരക്കുളം വള്ളപ്പുരയ്ക്കൽ വീട്ടിൽ പ്രണവിനെ (32) ആണ് മരിച്ച നിലയിൽ കണ്ടെത്തിയത്. സി.സി.ടി.വി. ദൃശ്യങ്ങളുടെ സഹായത്തോടെ നടത്തിയ അന്വേഷണത്തിലാണ് അപകടകാരണം വ്യക്തമായത്. സംഭവവുമായി ബന്ധപ്പെട്ട് വാഹനം ഓടിച്ചയാളെ പോലീസ് അറസ്റ്റ് ചെയ്തു.

2023 ഓഗസ്റ്റ് 27-ന് രാവിലെ ചേർത്തല-അരൂക്കുറ്റി റോഡിൽ പള്ളിപ്പുറം മലബാർ സിമന്റ്‌സിന് തെക്കുവശം തലയ്ക്ക് ഗുരുതരമായ പരിക്കുകളോടെയാണ് പ്രണവിനെ കണ്ടെത്തിയത്. ആരും ആശുപത്രിയിലെത്തിക്കാൻ തയ്യാറാകാതിരുന്നതിനെ തുടർന്ന് ചേർത്തല പോലീസ് പ്രണവിനെ താലൂക്ക് ആശുപത്രിയിലും പിന്നീട് വണ്ടാനം മെഡിക്കൽ കോളേജ് ആശുപത്രിയിലും പ്രവേശിപ്പിച്ചു. ഏറെ നാൾ അബോധാവസ്ഥയിൽ കഴിഞ്ഞ പ്രണവിന് ബോധം തെളിഞ്ഞുവെങ്കിലും ഓർമ്മ നഷ്ടപ്പെട്ടിരുന്നു. ആശുപത്രി വിട്ട് രണ്ട് മാസത്തിന് ശേഷം ഒക്ടോബർ 27-നാണ് പ്രണവ് മരണപ്പെട്ടത്.

അസ്വാഭാവിക മരണത്തിന് കേസെടുത്ത് പോലീസ് അന്വേഷണം ആരംഭിക്കുമ്പോൾ, പോക്സോ ഉൾപ്പെടെ നിരവധി ക്രിമിനൽ കേസുകളിൽ പ്രതിയായിരുന്ന പ്രണവിന്റെ പശ്ചാത്തലവും സമീപകാലത്തെ വഴക്കുകളും സംഭവത്തിൽ ദുരൂഹതയുണർത്തിയിരുന്നു. എന്നാൽ, അപകടസ്ഥലം കേന്ദ്രീകരിച്ച് നടത്തിയ വിശദമായ അന്വേഷണത്തിലും സി.സി.ടി.വി. ദൃശ്യങ്ങൾ പരിശോധിച്ചതിലും റോഡിലൂടെ തെക്കുവശത്തേക്ക് നടന്നുപോവുകയായിരുന്ന പ്രണവിനെ വടക്കുനിന്ന് അമിത വേഗതയിലെത്തിയ ഫോർഡ് എക്കോസ്പോർട്ട് കാർ പിന്നിൽനിന്ന് ഇടിക്കുകയായിരുന്നുവെന്ന് വ്യക്തമായി.

കാറിന്റെ ഗ്ലാസിൽ തലയിടിച്ച് തെറിച്ചുവീണാണ് പ്രണവിന് ഗുരുതരമായി പരിക്കേറ്റത്. പള്ളിപ്പുറം വഴി ചേർത്തലയിലൂടെ ആലപ്പുഴ ഭാഗത്തേക്ക് പോയ ഈ വാഹനമോടിച്ചത് കലവൂർ സ്വദേശിയായ യുവാവാണെന്ന് തിരിച്ചറിഞ്ഞു. അപകടവിവരം മറച്ചുവെച്ച് സർവീസിനായി ഷോറൂമിൽ നൽകിയിരുന്ന വാഹനം പോലീസ് കണ്ടെത്തുകയും ഡ്രൈവറെ അറസ്റ്റ് ചെയ്യുകയുമായിരുന്നു. ചേർത്തല ഡി.വൈ.എസ്.പി. അനിൽകുമാറിന്റെ മേൽനോട്ടത്തിൽ സി.ഐ. ലൈസാദ് മുഹമ്മദ്, എസ്.ഐ. ജയേഷ് ചന്ദ്രൻ എന്നിവരടങ്ങുന്ന പ്രത്യേക അന്വേഷണ സംഘമാണ് കേസ് തെളിയിച്ചത്.

ചേർത്തലകൊലപാതകംപ്രതി പിടിയിൽ

സ്വന്തം ലേഖകൻ