ആത്മീയചികിത്സയിലൂടെ മാരകരോഗങ്ങൾ ഭേദമാക്കാമെന്ന് വാഗ്ദാനം; പിന്നാലെ ദമ്പതികൾ വാടകയ്ക്ക് എടുത്ത വീട്ടിൽ രാത്രി മുഴുക്കെ പ്രാർത്ഥന; ഭാര്യയുടെ ചികിത്സയുടെ പേരിൽ തളീക്കര സ്വദേശിയിൽ നിന്നും പലതവണകളായി തട്ടിയത് ഒരു കോടി; മൂന്ന് പേർ പിടിയിൽ

തൊട്ടിൽപ്പാലം: കോഴിക്കോട് ആത്മീയചികിത്സയുടെ മറവിൽ തട്ടിയത് ഒരു കോടിയോളം രൂപ. സംഭവത്തിൽ മൂന്ന് പേര് പിടിയിൽ.. മലപ്പുറം കോഡൂർ സ്വദേശി പി.സി.എച്ച്. ഷംസുദ്ദീൻ, പുലാമന്തോൾ മന്നേങ്കൽ കണ്ണന്തൊടി മുഹമ്മദ് ബഷീർ, നാദാപുരം വളയം പടിഞ്ഞാറയിൽ റഫീഖ് എന്നിവരാണ് കോടതി നിർദേശപ്രകാരം തൊട്ടിൽപ്പാലം പോലീസിൽ സ്റ്റേഷനിൽ ഹാജരായത്. തുടർന്ന്, ഇവരെ ജാമ്യത്തിൽ വിട്ടയച്ചു.

തളീക്കര മണിയിലംകണ്ടി സ്വദേശി എ.കെ. മുഹമ്മദ് ആദിലിന്റെ പരാതിയെത്തുടർന്ന് കഴിഞ്ഞ ജൂണിലാണ് തൊട്ടിൽപ്പാലം പോലീസ് കേസ് രജിസ്റ്റർ ചെയ്തത്. ഭാര്യയുടെ മാരകരോഗം മാറ്റാനായി ആത്മീയചികിത്സയുടെ പേരിൽ ഷംസുദ്ദീനും സംഘവും പലതവണയായി പണം തട്ടിയെന്നാണ് ആദിൽ പരാതിയിൽ ആരോപിക്കുന്നത്. 2020 ജനുവരിയിൽ നാദാപുരത്ത് ഒരു മതച്ചടങ്ങിൽ വെച്ചാണ് ആദിൽ സംഘത്തെ പരിചയപ്പെടുന്നത്. മാരകരോഗങ്ങൾ ദൈവികസിദ്ധിയിലൂടെ ചികിത്സിച്ച് ഭേദമാക്കാൻ കഴിയുമെന്ന് പ്രതികൾ ആദിലിനെ വിശ്വസിപ്പിക്കുകയായിരുന്നു.

ഇതിനെത്തുടർന്ന്, ചികിത്സയ്ക്കായി ആദിലും ഭാര്യയും മലപ്പുറത്തെ കോഡൂരിലെത്തി. ഒരു വാടകവീടെടുത്തു. വൈകീട്ട് ഏഴുമുതൽ രാവിലെ ഏഴുവരെ നീണ്ടുനിൽക്കുന്ന പ്രാർത്ഥനകളായിരുന്നു ചികിത്സയുടെ ഭാഗം. മൂന്നാം ദിവസം 15 ലക്ഷം രൂപ ആവശ്യപ്പെടുകയും മൂന്നുദിവസത്തിനുള്ളിൽ തിരിച്ചുനൽകുമെന്ന് ഉറപ്പുനൽകുകയും ചെയ്തു. പിന്നീട് 25 ലക്ഷം, 30 ലക്ഷം എന്നിങ്ങനെ വിവിധ ഘട്ടങ്ങളിലായി വാടകവീട്ടിലും നാദാപുരത്തുവെച്ചും നേരിട്ടും ബാങ്ക് വഴിയുമൊക്കെയായി ഒരു കോടിയോളം രൂപ സംഘം കൈപ്പറ്റി. ഈ പണം തിരികെ ലഭിക്കാതെ വന്നതോടെയാണ് ആദിൽ പോലീസിൽ പരാതി നൽകിയത്.

രണ്ടുപേർ മലപ്പുറം കോഡൂരിലെ ഒരു അൺ എയ്ഡഡ് വിദ്യാഭ്യാസ സ്ഥാപന ട്രസ്റ്റിന്റെ ഭാരവാഹികളും പ്രിൻസിപ്പലുമാണ്. ഇവരുടെ പേരിൽ പാനൂർ, തൊട്ടിൽപ്പാലം പോലീസ് സ്റ്റേഷനുകളിലായി സമാനമായ മറ്റുപല പരാതികളും നിലവിലുണ്ട്. നാദാപുരം, കുറ്റ്യാടി, കല്ലാച്ചി, തൊട്ടിൽപ്പാലം, കക്കട്ട്, പാനൂർ തുടങ്ങിയ സ്ഥലങ്ങളിൽ മൂന്നുവർഷത്തിനിടെ സമാനമായ തട്ടിപ്പുകൾ നടത്തിയതായും പോലീസ് സംശയിക്കുന്നു. തൊട്ടിൽപ്പാലം തളീക്കര സ്വദേശി അനസ്, പാനൂർ സ്വദേശി അക്ബർ എന്നിവരും സമാനമായ പരാതികൾ നൽകിയിട്ടുണ്ട്.