വിയർത്ത് കുളിച്ച് ഗ്യാസ് സ്റ്റേഷനിൽ നിന്ന് ജോലി; വരുന്ന ആളുകളെ എല്ലാം ഡീൽ ചെയ്ത് മുഴുവൻ ബിസി; പെട്ടെന്ന് ഒരാളുടെ കടന്നുവരവിൽ ഉഗ്ര ശബ്ദം; നിലവിളി കേട്ട് ഓടിയെത്തിയവർ കണ്ടത് ചേതനയറ്റ ശരീരം; യുഎസിൽ അജ്ഞാതന്റെ വെടിയേറ്റ് ഇന്ത്യൻ വിദ്യാർഥിക്ക് ദാരുണാന്ത്യം; മകന്റെ മൃതദേഹം കിട്ടാൻ കാത്ത് കുടുംബം; നടുക്കം മാറാതെ നാട്ടുകാർ

വാഷിങ്ടൺ: യുഎസിലെ ടെക്സസ് സംസ്ഥാനത്തെ ഡാലസിൽ ജോലി ചെയ്യുന്നതിനിടെയാണ് ഹൈദരാബാദ് സ്വദേശിയായ 27-കാരനായ ഇന്ത്യൻ വിദ്യാർത്ഥി ചന്ദ്രശേഖർ പോളെ വെടിയേറ്റ് മരിച്ചത്. കഴിഞ്ഞ ദിവസം രാത്രി ഒരു ഗ്യാസ് സ്റ്റേഷനിൽ ജോലി ചെയ്യവേയാണ് അജ്ഞാതനായ തോക്കുധാരി ഇദ്ദേഹത്തിനു നേരെ വെടിയുതിർത്തതെന്ന് വാർത്താ ഏജൻസികൾ റിപ്പോർട്ട് ചെയ്യുന്നു.

ഹൈദരാബാദിൽ ഡെന്റൽ സർജറിയിൽ ബിരുദം പൂർത്തിയാക്കിയ ചന്ദ്രശേഖർ പോളെ, ഉപരിപഠനത്തിനായി 2023-ലാണ് അമേരിക്കയിലേക്ക് തിരിച്ചത്. ആറ് മാസം മുൻപാണ് അദ്ദേഹം തന്റെ മാസ്റ്റേഴ്സ് ബിരുദം പൂർത്തിയാക്കിയത്. ഉന്നത പഠനത്തിനു ശേഷം പൂർണ സമയ ജോലിക്കായി ശ്രമിക്കുന്നതിനിടയിൽ, സാമ്പത്തിക ആവശ്യങ്ങൾക്കായി അദ്ദേഹം പാർട്ട് ടൈമായി ഗ്യാസ് സ്റ്റേഷനിൽ ജോലിക്ക് പ്രവേശിക്കുകയായിരുന്നു.

മകന്റെ മൃതദേഹം നാട്ടിലെത്തിക്കുന്നതിന് സംസ്ഥാന സർക്കാരിന്റെ സഹായം തേടിയിരിക്കുകയാണ് ചന്ദ്രശേഖർ പോളെയുടെ കുടുംബം. ഈ വിഷയത്തിൽ ഹൈദരാബാദിലെ ബിആർഎസ് എംഎൽഎ സുധീർ റെഡ്ഡി, മുൻ മന്ത്രി ടി. ഹരീഷ് റാവു എന്നിവർ വിദ്യാർത്ഥിയുടെ വീട് സന്ദർശിച്ച് കുടുംബാംഗങ്ങൾക്ക് ആദരാഞ്ജലികൾ അർപ്പിക്കുകയും അവരുടെ ദുഃഖത്തിൽ പങ്കുചേരുകയും ചെയ്തു.

മൃതദേഹം എത്രയും പെട്ടെന്ന് ജന്മനാട്ടിൽ എത്തിക്കാൻ അടിയന്തര നടപടികൾ സ്വീകരിക്കണമെന്ന് ഹരീഷ് റാവു സംസ്ഥാന സർക്കാരിനോട് അഭ്യർത്ഥിച്ചു. "വലിയ സ്വപ്നങ്ങളോടെ അമേരിക്കയിലേക്ക് അയച്ച മകൻ ഇനിയില്ലെന്ന് അറിയുമ്പോൾ മാതാപിതാക്കൾ അനുഭവിക്കുന്ന വേദന ഹൃദയം തകർക്കുന്നതാണ്," അദ്ദേഹം പറഞ്ഞു. ചന്ദ്രശേഖറിന്റെ ഭൗതികാവശിഷ്ടങ്ങൾ നാട്ടിലെത്തിക്കാൻ സംസ്ഥാന സർക്കാർ നേരിട്ട് ഇടപെടണമെന്നും അദ്ദേഹം കൂട്ടിച്ചേർത്തു.

ഇന്ത്യൻ വിദ്യാർത്ഥികൾക്ക് വിദേശരാജ്യങ്ങളിൽ നേരിടേണ്ടി വരുന്ന സുരക്ഷാ പ്രശ്നങ്ങളെക്കുറിച്ചുള്ള ആശങ്കകൾ വീണ്ടും ഉയർത്തിക്കൊണ്ടുവരുന്നതാണ് ഈ സംഭവം. സംഭവത്തെക്കുറിച്ച് കൂടുതൽ വിവരങ്ങൾ ലഭ്യമായിട്ടില്ല.