ഓട്ടോറിക്ഷ നിയന്ത്രണം വിട്ട് മറിഞ്ഞു; പരിക്കേറ്റ് ചികിത്സയിലായിരുന്ന വയോധികൻ മരിച്ചു; സംഭവം കോഴിക്കോട്

കോഴിക്കോട്: കാരന്തൂരിൽ ഓട്ടോറിക്ഷ നിയന്ത്രണം വിട്ട് മറിഞ്ഞുണ്ടായ അപകടത്തിൽ ഗുരുതരമായി പരിക്കേറ്റ് ചികിത്സയിലായിരുന്ന ഓട്ടോ ഡ്രൈവർ മരിച്ചു. വരട്ട്യാക്ക് കുറുമണ്ണിൽ താമസിക്കുന്ന രവീന്ദ്രൻ (65) ആണ് മരിച്ചത്. വെള്ളിയാഴ്ച ഉച്ചയ്ക്ക് മൂന്ന് മണിയോടെ കാരന്തൂർ മഹല്ല് ജുമാ മസ്ജിദിന് സമീപം ദേശീയ പാതയിലായിരുന്നു അപകടം.

രവീന്ദ്രൻ ഓടിച്ചിരുന്ന ഓട്ടോറിക്ഷയാണ് നിയന്ത്രണം വിട്ട് മറിഞ്ഞത്. അപകടത്തെ തുടർന്ന് രവീന്ദ്രന് ഗുരുതരമായി പരിക്കേൽക്കുകയും കോഴിക്കോട് മെഡിക്കൽ കോളേജ് ആശുപത്രിയിൽ പ്രവേശിപ്പിക്കുകയുമായിരുന്നു. ചികിത്സയിലിരിക്കെയാണ് അദ്ദേഹം മരണപ്പെട്ടത്. ഭാര്യ: വസന്ത. മക്കൾ: രമ്യ, സൗമ്യ. മരുമക്കൾ: സുധീർ, ജനീഷ്.