കാർ നിയന്ത്രണം വിട്ട് നേരെ മരത്തിലിടിച്ച് വൻ അപകടം; മൂന്ന് യുവാക്കൾക്ക് ദാരുണാന്ത്യം; രണ്ടുപേർക്ക് പരിക്ക്; പൂർണമായും തകർന്ന നിലയിൽ വാഹനം; സംഭവം പാലക്കാട്

പാലക്കാട്: ജില്ലയിൽ നിയന്ത്രണം വിട്ട കാർ മരത്തിലിടിച്ച് മറിഞ്ഞ് മൂന്ന് യുവാക്കൾ ദാരുണമായി മരിച്ചു. അപകടത്തിൽ പരിക്കേറ്റ രണ്ട് പേരുടെ നില ഗുരുതരമല്ല. ചിറ്റൂരിൽ നിന്ന് മടങ്ങിവരവേ കൊടുമ്പ് കല്ലിങ്കൽ ജംഗ്ഷന് സമീപമാണ് അപകടം നടന്നത്.

രാത്രി ഏകദേശം 11 മണിയോടെയാണ് സംഭവം. പാലക്കാട് സ്വദേശികളായ രോഹൻ രഞ്ജിത് (24), രോഹൻ സന്തോഷ് (22), സനൂജ് (19) എന്നിവരാണ് അപകടത്തിൽ മരിച്ചത്. ഇവർ സഞ്ചരിച്ച കാർ പൂർണ്ണമായി തകർന്ന നിലയിലാണ് കണ്ടെത്തിയത്.

അപകടത്തിന് കാരണം കാട്ടുപന്നി കുറുകെ ചാടിയതിനെത്തുടർന്ന് കാർ വെട്ടിച്ചതാണെന്ന് പ്രാഥമിക നിഗമനങ്ങളിൽ പറയുന്നു. അപകടത്തിൽ പരിക്കേറ്റ ഋഷി (24), ജിതിൻ (21) എന്നിവരുടെ മൊഴിയും ഇത് ശരിവെക്കുന്നു. ഇവർക്ക് പ്രാഥമിക പരിശോധനയിൽ പരിക്കുകൾ ഗുരുതരമല്ലെങ്കിലും വിശദമായ പരിശോധനകൾക്ക് വിധേയരാക്കിയിട്ടുണ്ട്. മരിച്ച മൂന്ന് യുവാക്കളുടെയും മൃതദേഹങ്ങൾ പോസ്റ്റ്‌മോർട്ടത്തിനായി മാറ്റിയിരിക്കുകയാണ്.