നിയന്ത്രണം വിട്ട് ടൂറിസ്റ്റ് ബസ് വൈദ്യുതപോസ്റ്റില്‍ ഇടിച്ച് അപകടം; നാല് പേർക്ക് പരിക്ക്; ഡ്രൈവര്‍ ഉറങ്ങി പോയെതെന്ന് സംശയം

കൊച്ചി: സ്‌കൂള്‍ വിനോദയാത്രയ്ക്ക് പോയ സംഘം സഞ്ചരിച്ച ബസ് അപകടത്തില്‍ പെട്ടു. ചെറായിയിലാണ് സംഭവം നടന്നത്. ഞാറയ്ക്കല്‍ ഗവ. ഹൈസ്‌കൂളില്‍ നിന്ന് വിനോദയാത്രയ്ക്ക് പോയ ബസാണ് അപകടത്തില്‍ പെട്ടത്. കൊടൈക്കനാല്‍ പോകുംവഴിയാണ് അപകടം നടന്നത്. ഇന്ന് പുലര്‍ച്ചെയാണ് സംഭവം.

അപകടത്തില്‍ രണ്ടു കുട്ടികള്‍ക്കും ബസിലെ ക്ലീനര്‍ക്കും ഒരു അധ്യാപകനും പരിക്കേറ്റു. ആരുടെയും പരിക്ക് ഗുരുതരമല്ലെന്നാണ് ലഭിക്കുന്ന വിവരങ്ങൾ. നിയന്ത്രണം തെറ്റി വന്ന ബസ് വൈദ്യുതപോസ്റ്റില്‍ ഇടിക്കുകയായിരുന്നു.

ഡ്രൈവര്‍ ഉറങ്ങിപ്പോയതാകാം അപകടകാരണമെന്നാണ് സംശയം. പിന്നാലെ നാട്ടുകാർ ചേർന്ന് രക്ഷാപ്രവർത്തനം നടത്തി. സ്ഥലത്ത് പോലീസെത്തി മേൽനടപടികൾ സ്വീകരിച്ചു.