വളരെ അശ്രദ്ധമായി റോങ്ങ്‌ സൈഡിലൂടെ പാഞ്ഞെത്തിയ കാർ; ചുറ്റും പരിഭ്രാന്തി; കൈക്കുഞ്ഞ് അടക്കമുള്ള ബൈക്ക് യാത്രികർക്ക് പരിക്ക്; ആശുപത്രിയിലേക്ക് മാറ്റി
തിരുവനന്തപുരം: റോഡിന്റെ എതിർദിശയിലൂടെ അമിത വേഗതയിലെത്തിയ കാറിടിച്ച് കൈക്കുഞ്ഞടക്കം ബൈക്ക് യാത്രികർക്ക് പരിക്കേറ്റു. തിങ്കളാഴ്ച രാവിലെ ആനപ്പാറ സർക്കാർ ആശുപത്രിക്ക് സമീപത്താണ് അപകടമുണ്ടായത്. അപകടത്തിൽ ബൈക്ക് യാത്രികരായ കുട്ടികൾക്ക് നിസ്സാര പരിക്കേറ്റു.
ആനപ്പാറയിൽ നിന്ന് വെള്ളറടയിലേക്ക് വരികയായിരുന്ന ബൈക്ക് യാത്രികരെ, സിഗ്നലോ മുന്നറിയിപ്പുകളോ ഇല്ലാതെ റോഡിന്റെ എതിർവശത്ത് കൂടിയെത്തിയ കാർ ഇടിച്ചു തെറിപ്പിക്കുകയായിരുന്നുവെന്ന് ദൃക്സാക്ഷികൾ പറഞ്ഞു. ദിശ തെറ്റി അമിത വേഗതയിലെത്തിയ കാറാണ് അപകടത്തിന് കാരണമെന്ന് നാട്ടുകാർ ആരോപിച്ചു.
അപകടം കണ്ടയുടൻ ഓടിക്കൂടിയ നാട്ടുകാർ പരിക്കേറ്റവരെ ഉടൻ തന്നെ സമീപത്തെ സർക്കാർ ആശുപത്രിയിൽ പ്രവേശിപ്പിച്ചു. എന്നാൽ, അപകടമുണ്ടാക്കിയ കാറിന്റെ ഡ്രൈവർ വാഹനത്തിൽ നിന്നിറങ്ങാൻ പോലും തയ്യാറായില്ലെന്ന് നാട്ടുകാർ പരാതിപ്പെട്ടു. നാട്ടുകാരാണ് പരിക്കേറ്റവർക്ക് ആവശ്യമായ സഹായങ്ങൾ നൽകിയത്. സംഭവത്തിൽ പോലീസ് അന്വേഷണം ആരംഭിച്ചു.
