ആലപ്പുഴക്കാർക്ക് ഇപ്പൊ..മാംസം കണ്ടാൽ പേടി; പലയിടത്തും പക്ഷിപ്പനി ഭീതി; ചിക്കൻ വിഭവങ്ങൾ പാചകം ചെയ്യുന്നതിനും ആശങ്ക; നിർദ്ദേശങ്ങൾ കൃത്യമായി പാലിക്കണമെന്ന് അധികൃതർ

ആലപ്പുഴ: ജില്ലയിൽ പക്ഷിപ്പനി വ്യാപിച്ചതിനെ തുടർന്ന് കോഴിയിറച്ചി വിഭവങ്ങൾ വിൽക്കുന്നതിന് കർശന നിരോധനം ഏർപ്പെടുത്തി. ഈ നടപടി ആലപ്പുഴയിലെ ഹോട്ടൽ, കോഴിയിറച്ചി വ്യാപാര മേഖലകളെ വലിയ പ്രതിസന്ധിയിലാക്കിയിരിക്കുകയാണ്. നിരോധനം പിൻവലിക്കണമെന്നും, പ്രത്യേകിച്ച് ശീതീകരിച്ച മാംസം വിൽക്കാൻ അനുവദിക്കണമെന്നും ആവശ്യപ്പെട്ട് ഹോട്ടലുടമ സംഘടന ഭാരവാഹികളും ഓൾ കേരള പൗൾട്രി ഫെഡറേഷൻ പ്രതിനിധികളും ജില്ലാ കളക്ടർക്ക് നിവേദനം നൽകി.

ജില്ലയിൽ പക്ഷിപ്പനിയുടെ പശ്ചാത്തലത്തിൽ ഇതുവരെ 24,309 പക്ഷികളെയാണ് കൊന്നൊടുക്കിയത്. രോഗം സ്ഥിരീകരിച്ച പ്രദേശങ്ങളിൽ അണുനശീകരണ പ്രവർത്തനങ്ങൾ ആരംഭിച്ചിട്ടുണ്ട്. ഇതിനിടെ, കഴിഞ്ഞ ദിവസം ഭക്ഷ്യസുരക്ഷാ വകുപ്പ് ഉദ്യോഗസ്ഥർ കോഴിയിറച്ചി വിഭവങ്ങൾ വിൽക്കുന്ന ഹോട്ടലുകളിൽ പരിശോധന നടത്തിയിരുന്നു.

അതേസമയം, മാർച്ച് 31 വരെ ഏർപ്പെടുത്തിയിരിക്കുന്ന നിരോധനത്തിന്റെ ഫലം വിലയിരുത്തിയ ശേഷം തുടർനടപടികൾ സ്വീകരിക്കാമെന്ന് ജില്ലാ കളക്ടർ അറിയിച്ചു. ശീതീകരിച്ച മാംസം വിൽക്കാൻ അനുവദിക്കണമെന്ന ആവശ്യം കളക്ടർ തള്ളി. നിലവിലുള്ള പ്രോട്ടോക്കോളുകൾ കർശനമായി പാലിക്കണമെന്നും കളക്ടർ നിർദേശിച്ചു. ഈ സാഹചര്യം ജില്ലയിലെ ഹോട്ടൽ വ്യവസായത്തിനും കോഴിയിറച്ചി കച്ചവടക്കാർക്കും സാമ്പത്തികമായി വലിയ വെല്ലുവിളിയായി തുടരുകയാണ്.