ഓൺലൈൻ വഴി മയക്കുമരുന്നുകൾ വാങ്ങി വിൽപ്പന; സ്വകാര്യ ലോഡ്ജിലെ റെയ്ഡിൽ പിടിച്ചെടുത്തത് എൽഎസ്ഡി സ്റ്റാമ്പുകളും എംഡിഎംഎയും; ലക്ഷദ്വീപ് സ്വദേശിനി ഫരീദയും കൊച്ചി സ്വദേശി ശിവദാസനും അറസ്റ്റിൽ

കൊച്ചി: എറണാകുളത്ത് സ്വകാര്യ ലോഡ്ജിൽ നടത്തിയ പരിശോധനയിൽ ഓൺലൈൻ വഴി മയക്കുമരുന്നുകൾ വാങ്ങി വിൽപ്പന നടത്തിയിരുന്ന യുവാവും യുവതിയും അറസ്റ്റിൽ. എംഡിഎംഎ മയക്കുമരുന്ന് സ്റ്റാമ്പുകളുമായാണ് ഇവർ പിടിയിലായത്. ലക്ഷദ്വീപ് സ്വദേശിനി ഫരീദ (27), എറണാകുളം സ്വദേശി ശിവദാസൻ (25) എന്നിവരാണ് പിടിയിലായത്. ഇവരിൽ നിന്നും 3.738 ഗ്രാം എംഡിഎംഎയും 30 എണ്ണം എൽഎസ്ഡി സ്റ്റാമ്പുകളും എക്സൈസ് പിടിച്ചെടുത്തു.

എറണാകുളം എക്സൈസ് എൻഫോഴ്സ്മെന്‍റ് ആൻഡ് ആന്‍റി നർകോട്ടിക് സ്പെഷ്യൽ സ്‌ക്വാഡ് സർക്കിൾ ഇൻസ്പെക്ടർ പി ശ്രീരാജിന്‍റെ നിർദ്ദേശാനുസരണം എക്സൈസ് ഇൻസ്പെക്ടർ കെ പി പ്രമോദും സംഘവും ചേർന്നാണ് റെയ്‌ഡ്‌ നടത്തിയത്. പ്രിവന്‍റീവ് ഓഫീസർ സുരേഷ് കുമാർ, സിവിൽ എക്സൈസ് ഓഫീസർ ശ്രീജിത്ത്, വനിതാ സിവിൽ എക്സൈസ് ഓഫീസർ സരിതാറാണി എന്നിവരായിരുന്നു പരിശോധനയിൽ പങ്കെടുത്ത മറ്റ് ഉദ്യോഗസ്ഥർ.