വാടകയ്‌ക്കെടുത്ത് നടത്തിയിരുന്ന ഗോഡൗൺ വളഞ്ഞ് എക്സൈസ്; 40 ചാക്കുകളിൽ സൂക്ഷിച്ചിരുന്ന നിരോധിത പുകയില ഉത്പന്നങ്ങൾ പിടിച്ചെടുത്തു; പ്രതിയെ അറസ്റ്റ് ചെയ്തു

കാരേറ്റ്: തിരുവനന്തപുരം കാരേറ്റിൽ വൻതോതിൽ ലഹരിവേട്ട. എക്സൈസ് നിരോധിത പുകയില ഉത്പന്നങ്ങൾ പിടിച്ചെടുത്തു. സംഭവത്തിൽ പ്രതിയെ കൈയ്യോടെ പൊക്കി. 40 ചാക്കുകളിലായി സൂക്ഷിച്ചിരുന്ന 1480 കിലോഗ്രാം നിരോധിത പുകയില ഉൽപ്പന്നങ്ങളാണ് എക്സൈസ് ഇയാളിൽ നിന്നും പിടിച്ചെടുത്തത്. സംഭവത്തിൽ കാരേറ്റ് സ്വദേശിയായ ഷംനാദ് എന്നയാളെ എക്സൈസ് വലയിൽ കുടുക്കി.

ഷംനാദ് വാടകയ്‌ക്കെടുത്ത് നടത്തിയിരുന്ന ഗോഡൗണിൽ നിന്നുമാണ് നിരോധിത പുകയില ഉൽപ്പന്നങ്ങൾ പിടിച്ചെടുത്തത്. തിരുവനന്തപുരം അസിസ്റ്റന്റ് എക്സൈസ് കമ്മീഷണർ സുഭാഷിന്റെ നിർദ്ദേശം അനുസരിച്ച് ആറ്റിങ്ങൽ എക്‌സൈസ് സർക്കിൾ ഇൻസ്‌പെക്ടർ ഷൈബു.പി.ഇ യുടെ നേതൃത്വത്തിലായിരുന്നു പരിശോധന നടന്നത്.

ഗോഡൗണിൽ സംശയാസ്പദമായി കണ്ട ചാക്കുകെട്ടുകൾ കണ്ട് പരിശോധിച്ചപ്പോഴാണ് നിരോധിത പുകയില ഉത്പന്നങ്ങൾ കണ്ടെത്തുകയായിരുന്നു.