'വെയിലും മഴയും ഒരുമിച്ച്..'; സംസ്ഥാനത്ത് നാളെ കനത്ത ചൂട് അനുഭവപ്പെടും; 3 ഡിഗ്രി സെൽഷ്യസ് വരെ ഉയരും; പതിനൊന്നാം തീയതി മൂന്ന് ജില്ലകളിൽ മഴയ്ക്ക് സാധ്യത; അറിയിപ്പുമായി കാലാവസ്ഥ വകുപ്പ്
തിരുവനന്തപുരം: കേരളത്തിൽ കാലാവസ്ഥ മുന്നറിയിപ്പിൽ വീണ്ടും മാറ്റം. സംസ്ഥാനത്ത് ഇന്നും നാളെയും താപനില ഉയരാൻ സാധ്യത ഉണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ഒറ്റപ്പെട്ടയിടങ്ങളിൽ സാധാരണയെക്കാൾ 2 ഡിഗ്രി സെൽഷ്യസ് മുതൽ 3 ഡിഗ്രി സെൽഷ്യസ് വരെ താപനില ഉയരാനാണ് ഇപ്പോൾ സാധ്യത. ഇതിന് പ്രധാന കാരണമാകുന്നത് ഉയർന്ന താപനിലയും ഈർപ്പമുള്ള വായുവുമാണ്. ചൂടും അസ്വസ്ഥതയുമുള്ള കാലാവസ്ഥയ്ക്ക് സാധ്യത ഉണ്ടെന്നും കേന്ദ്ര കാലാവസ്ഥാ വകുപ്പ് വ്യക്തമാക്കി.
ഉയർന്ന ചൂട് സൂര്യാഘാതം, സൂര്യാതപം, നിർജലീകരണം തുടങ്ങി നിരവധി ഗുരുതരമായ ആരോഗ്യപ്രശ്നങ്ങൾക്ക് കാരണമാകുമെന്ന് സംസ്ഥാന ദുരന്തനിവാരണ അതോറിറ്റി മുന്നറിയിപ്പ് നൽകുന്നു. അതുകൊണ്ട് തന്നെ ജനങ്ങൾ ജാഗ്രത പാലിക്കണമെന്നും അറിയിപ്പുണ്ട്.
അതേസമയം, ഫെബ്രുവരി 11ന് സംസ്ഥാനത്തെ മൂന്ന് ജില്ലകളിൽ മഴ പെയ്യാനുള്ള സാധ്യതയുണ്ടെന്ന് അറിയിച്ചു. തിരുവനന്തപുരം, കൊല്ലം, പത്തനംതിട്ട എന്നീ ജില്ലകളിലാണ് മഴയ്ക്ക് സാധ്യത. ഈ ജില്ലകളിൽ നേരിയതോ, മിതമായതോ ആയ മഴ ലഭിക്കുമെന്നാണ് പ്രവചനം. പക്ഷെ, മഴ മുന്നറിയിപ്പുകളൊന്നും പ്രഖ്യാപിച്ചിട്ടില്ല.
