വാരിക്ക് കയറിയ യുവതിയെ ഓട്ടോറിക്ഷയില്‍ തട്ടിക്കൊണ്ടു പോകാന്‍ ശ്രമം; ഓട്ടോയില്‍ നിന്ന് ചാടിയ യുവതിക്ക് ഗുരുതര പരുക്ക്; നാലു ദിവസത്തിന് ശേഷം ഡ്രൈവര്‍ അറസ്റ്റില്‍
ഓട്ടോയില്‍ നിന്ന് ചാടിയ യുവതിക്ക് ഗുരുതര പരുക്ക്; നാലു ദിവസത്തിന് ശേഷം ഡ്രൈവര്‍ അറസ്റ്റില്‍
അടൂര്‍: യുവതിയെ ഓട്ടോറിക്ഷയില്‍ തട്ടിക്കൊണ്ടു പോകാന്‍ ശ്രമിച്ച കേസില്‍ ഓട്ടോറിക്ഷ ഡ്രൈവര്‍ അറസ്റ്റില്‍. പള്ളിക്കല്‍ ഗ്രാമപ്പഞ്ചായത്തില്‍ താത്ക്കാലിക ജോലി ചെയ്യുന്ന യുവതി ഭയന്ന് ഓട്ടോയില്‍ നിന്നും പുറത്തേക്ക് ചാടിയതിനെ തുടര്‍ന്ന് പരുക്കേറ്റു. യുവതി കോട്ടയം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. സംഭവത്തില്‍ പള്ളിക്കല്‍ മേക്കുന്നുമുകള്‍ അര്‍ച്ചന ഭവനില്‍ ആദര്‍ശ് സുകുമാരനെ(38) പോലീസ് അറസ്റ്റ് ചെയ്തു.
കഴിഞ്ഞ നാലിന് രാവിലെ 10.15നാണ് സംഭവം. പഴകുളത്തു നിന്നും മേക്കുന്നുമുകള്‍ ഭാഗത്തേക്ക് പോകുകയായിരുന്ന ആദര്‍ശ് സുകുമാരന്‍ ഓടിച്ച ഓട്ടോറിക്ഷ പഞ്ചായത്ത് ഭാഗത്തേക്ക് പോകാനാണ് യുവതി വിളിച്ചത്. പഞ്ചായത്തിനു മുന്‍പില്‍ എത്തിയപ്പോള്‍ വാഹനം നിര്‍ത്താന്‍ യുവതി ആവശ്യപ്പെട്ടെങ്കിലും ആദര്‍ശ് നിര്‍ത്താതെ ഓടിച്ചു പോയി. ഭയന്ന് രക്ഷപെടാന്‍ വേണ്ടി യുവതി ഓട്ടോറിക്ഷയില്‍ നിന്നും പുറത്തേക്ക് ചാടി. എന്നിട്ടും ആദര്‍ശ് ഓട്ടോറിക്ഷ നിര്‍ത്താതെ ഓടിച്ചു പോകുകയായിരുന്നുവെന്ന് പോലീസ് പറഞ്ഞു.
ജില്ലാ പോലീസ് മേധാവി വി.ജി.വിനോദിന്റെ നിര്‍ദ്ദേശപ്രകാരം അടൂര്‍ ഡിവൈ.എസ്.പി. ജി. സന്തോഷ് കുമാറിന്റെ മേല്‍നോട്ടത്തില്‍ എസ്.എച്ച്.ഒ. ശ്യാം മുരളി, എസ്.ഐ.എ.അനീഷ്, എസ്.സി.പി.ഒ, മുഹമ്മദ് റാഫി,രാജീവ്, ഹരികൃഷ്ണന്‍,സി.പി.ഒ.രാജഗോപാല്‍, ശ്യാംകുമാര്‍ എന്നിവരുടെ നേതൃത്വത്തിലായിരുന്നു അറസ്റ്റ്.
