കൊല്ലത്ത് യുവാവിനെ കുത്തിക്കൊന്നു; ഒപ്പമുണ്ടായിരുന്ന സുഹൃത്ത് പരിക്കുകളോടെ ആശുപത്രിയില്‍; ആക്രമണത്തിന് പിന്നില്‍ മുന്‍വൈരാഗ്യം: മൂന്ന് പേര്‍ കസ്റ്റഡിയിലെന്ന് സൂചന

കൊല്ലം: ചിതറയില്‍ യുവാവിനെ കുത്തിക്കൊന്നു. സുജിന്‍ (29) ആണ് കൊല്ലപ്പെട്ടത്. സുജിനൊപ്പം ഉണ്ടായിരുന്ന അനന്ദു എന്ന യുവാവിനും കുത്തേറ്റു. എന്നാല്‍ ഇയാളുടെ പരിക്ക് ഗുരുതരമല്ല. തുമ്പമണ്‍തൊടി കാരറക്കുന്നിന് സമീപമാണ് സംഭവം. ഒരു സംഘം ആളുകള്‍ ചേര്‍ന്ന് ഇരുവരേയും ആക്രമിക്കുക ആയിരുന്നു.

രണ്ട് പേരെയും ആദ്യം കടയ്ക്കല്‍ താലൂക്ക് ആശുപത്രിയിലും പിന്നീട് തിരുവനന്തപുരം മെഡിക്കല്‍ കോളേജിലും പ്രവേശിപ്പിച്ചു. വയറിന് കുത്തേറ്റ സുജിനെ രക്ഷിക്കാന്‍ കഴിഞ്ഞില്ല. രാത്രി 11മണിയോടെയാണ് ഒരു സംഘം ഇരുവരെയും ആക്രമിച്ചത്. മുന്‍വൈരാഗ്യമാണ് കാരണമെന്നാണ് പ്രാഥമിക നിഗമനം. അതേസമയം, മൂന്നു പേരെ കസ്റ്റഡിയിലെടുത്തതായാണ് സൂചന. അഞ്ചംഗ സംഘമാണ് ആക്രമിച്ചതെന്നാണ് കണ്ടെത്തല്‍.