കൈനകരിയില്‍ ഗര്‍ഭിണിയായ യുവതിയെ കൊന്നു കായലില്‍ തള്ളിയ സംഭവം; രണ്ടാം പ്രതി രജനിയുടെ ശിക്ഷ ഇന്ന് വിധിക്കും: വധശിക്ഷ നല്‍കണമെന്ന് വാദം
ഗര്‍ഭിണിയായ യുവതിയെ കൊന്നു കായലില്‍ തള്ളിയ സംഭവം; രണ്ടാം പ്രതി രജനിയുടെ ശിക്ഷ ഇന്ന് വിധിക്കും
ആലപ്പുഴ: കൈനകരിയില്‍ ഗര്‍ഭിണിയായ യുവതിയെ കൊന്നു കായലില്‍ തള്ളിയ കേസിലെ രണ്ടാം പ്രതി രജനിയുടെ ശിക്ഷ ഇന്ന് വിധിക്കും. മയക്കു മരുന്ന് കേസില്‍ ശിക്ഷിക്കപ്പെട്ട് ഒഡീഷ ജയിലിലുള്ള പ്രതി രജനിയെ ഇന്ന് ആലപ്പുഴ ജില്ലാ സെഷന്‍സ് കോടതിയില്‍ ഹാജരാക്കും. കേസിലെ ഒന്നാം പ്രതി പ്രബീഷിന് കോടതി തിങ്കളാഴ്ച്ച വധശിക്ഷ വിധിച്ചിരുന്നു. രജനിക്കും വധശിക്ഷ നല്‍കണമെന്നായിരുന്നു പ്രോസിക്യൂഷന്റെ വാദം.
കൊലപാതകക്കേസില്‍ രണ്ടാം പ്രതിയായ രജനി കുറ്റക്കാരിയാണെന്നു കോടതി കണ്ടെത്തിയിരുന്നെങ്കിലും ഇവര്‍ മയക്കുമരുന്നു കേസില്‍ ഒഡീഷയില്‍ ജയിലായതിനാല്‍ ശിക്ഷ വിധിച്ചില്ല. ഒന്നാം പ്രതിക്ക് ചുമത്തിയിട്ടുള്ള എല്ലാ വകുപ്പുകളും രണ്ടാം പ്രതിക്കും ചുമത്തിയിട്ടുണ്ട്. ആലപ്പുഴ പുന്നപ്ര സ്വദേശിനിയായ അനിത കൊലക്കേസിലാണ് ശിക്ഷാ വിധി. രജനിയുംപ്രബീഷും ചേര്‍ന്ന് ഗര്‍ഭിണിയായ അനിതയെ കൊലപ്പെടുത്തിയ ശേഷം കായലില്‍ തള്ളുക ആയിരുന്നു.
2021 ജൂലൈ ഒന്‍പതിനാണ് കൊല്ലപ്പെട്ടത്. തൊട്ടടുത്ത ദിവസം നാട്ടുകാരാണ് പൂക്കൈത ആറില്‍ നിന്നും അനിതയുടെ മൃതദേഹം കണ്ടെത്തിയത്. കേസില്‍ അനിതയുമായി അടുപ്പമുണ്ടായിരുന്ന മലപ്പുറം നിലമ്പൂര്‍ സ്വദേശി പ്രബീഷും ഇയാളുടെ സുഹൃത്തും കൈനകരിക്കാരിയുമായ രജനിയുമാണ് അറസ്റ്റിലായത്. വിവാഹിതനായ പ്രബീഷ് ഒരേ സമയം വിവാഹിതരായ അനിതയും രജനിയുമായി അടുപ്പത്തിലായിരുന്നു. അനിത പ്രബീഷില്‍ നിന്നും ഗര്‍ഭണിയായി. ഇതറിഞ്ഞ പ്രബീഷ് അനിതയെ ഒഴിവാക്കാന്‍ ശ്രമിച്ചെങ്കിലും വിജയിച്ചില്ല. ഇതോടെയാണ് അനിതയെ കൊലപ്പെടുത്താന്‍ പദ്ധതിയിട്ടത്.
അനിതയെ കൊലപ്പെടുത്താന്‍ രജനി കൂട്ടു നിന്നു. ഇരുവരും ചേര്‍ന്ന് തയ്യാറാക്കിയ പദ്ധതി പ്രകാരം അനിതയെ രജനിയുടെ വീട്ടിലേക്ക് വിളിച്ചു വരുത്തി. രജനിയുടെ വീട്ടില്‍ വച്ച് രണ്ടുകുട്ടികളുടെ അമ്മയായ അനിതയെ പ്രബീഷ് കഴുത്തില്‍ കത്തി വെച്ച് ഭീഷണിപ്പെടുത്തി. നിലവിളി പുറത്തേക്ക് കേള്‍ക്കാതിരിക്കാന്‍ രജനി വായും മൂക്കും അമര്‍ത്തിപ്പിടിച്ചു. ബോധരഹിതയായ അനിത കൊല്ലപ്പെട്ടു എന്നു കരുതി ഇരുവരും ചേര്‍ന്നു പൂക്കൈത ആറ്റില്‍ ഉപേക്ഷിച്ചു എന്നായിരുന്നു പൊലീസിന്റെ കണ്ടെത്തല്‍.
