മെഡിക്കല് കോളേജിലെ ഡോക്ടര്മാരുടെ സമരം ഒരാഴ്ചത്തേയ്ക്ക് മാറ്റി; ഒപി, അധ്യയനം, ശസ്ത്രക്രിയകള് എന്നിവ ഇന്ന് പുനരാരംഭിക്കും
മെഡിക്കല് കോളേജിലെ ഡോക്ടര്മാരുടെ സമരം ഒരാഴ്ചത്തേയ്ക്ക് മാറ്റി
തിരുവനന്തപുരം: മെഡിക്കല് കോളജ് ഡോക്ടര്മാര് നടത്തി വന്ന സമരം ഒരാഴ്ചത്തേക്കു മാറ്റിവച്ചു. 18 മാസത്തെ ശമ്പളക്കുടിശിക ഇപ്പോള് തന്നെ അനുവദിക്കാനുള്ള നടപടികള് എടുക്കാമെന്നും ബാക്കി 39 മാസത്തെ തുക നിയമപരമായ തീരുമാനങ്ങള്ക്ക് അനുസരിച്ച് നല്കാമെന്നും ആരോഗ്യവകുപ്പ് അഡിഷനല് ചീഫ് സെക്രട്ടറി രേഖാമൂലം ഉറപ്പു നല്കിയതിനെത്തുടര്ന്നാണ് സമരം മാറ്റിയത്.
അതേസമയം മെഡിക്കല് കോളജ് ഡോക്ടര്മാര് നടത്തി വന്ന സമരം ഒരാഴ്ചത്തേക്കു മാറ്റിവച്ചതായി കേരള ഗവണ്മെന്റ് മെഡിക്കല് കോളജ് ടീച്ചേഴ്സ് അസോസിയേഷന് അറിയിച്ചു. ഒപി, അധ്യയനം, ശസ്ത്രക്രിയകള് എന്നിവ പുനരാരംഭിക്കുമെന്നും അറിയിച്ചു. മന്ത്രി വീണാ ജോര്ജിന്റെ നിര്ദേശപ്രകാരമായിരുന്നു ചര്ച്ച. ഇപ്പോള് നല്കിയ ഉറപ്പുകള് പാലിക്കുവാനുള്ള ഉത്തരവുകള് ഇറങ്ങിയില്ലെങ്കില് ഒരാഴ്ച കഴിയുമ്പോള് വീണ്ടും സമരം തുടങ്ങുമെന്നാണ് ചര്ച്ചയില് നേതാക്കള് അറിയിച്ചത്.
