റോഡരികില്‍ കാര്‍ അപകടം; വയനാട്ടിലേക്കുള്ള യാത്രക്കിടയില്‍ വാഹനം നിര്‍ത്തി സഹായവുമായി എത്തി എംപി പ്രിയങ്ക ഗാന്ധി; ഒപ്പമുണ്ടായിരുന്ന ഡോക്ടര്‍ പ്രാഥമിക ചികിത്സ നല്‍കി
കല്‍പ്പറ്റ: വയനാട്ടിലേക്കുള്ള യാത്രക്കിടയില്‍ റോഡരികില്‍ കാര്‍ അപകടത്തില്‍പ്പെട്ടതറിഞ്ഞ് വാഹനം നിര്‍ത്തി സഹായവുമായി എത്തിയ എംപി പ്രിയങ്ക ഗാന്ധി. സഹയാത്രികനായ ഡോക്ടറെ വിളിച്ച് പരിക്കേറ്റവരെ പരിശോധിക്കാനാണ് ആദ്യം തീരുമാനിച്ചത്. തുടര്‍ന്ന് പരിക്കേറ്റവര്‍ക്ക് തത്കാല ചികിത്സ ലഭ്യമാക്കുന്നതിനായി ആംബുലന്‍സ് എത്തിച്ച് അടുത്തുള്ള ആശുപത്രിയിലേക്ക് മാറ്റാന്‍ നിര്‍ദ്ദേശം നല്‍കിയ ശേഷം മാത്രമാണ് പ്രിയങ്ക ഗാന്ധി തന്റെ യാത്ര തുടരിയത്.
കരിപ്പൂരില്‍ നിന്നും കല്‍പ്പറ്റയിലേക്കുള്ള യാത്രക്കിടയിലാണ് അപകടം കണ്ടത്. വന്‍ സുരക്ഷാ സംഘം ഒപ്പം ഉണ്ടായിരുന്നില്ലെങ്കിലും, പൊതുജന സുരക്ഷയെ മുന്‍നിര്‍ത്തിയാണ് എംപി ഇടപെട്ടത്. ഇതിനിടെ, കോഴിക്കോട് മെഡിക്കല്‍ കോളേജ് ആശുപത്രിയിലെ അത്യാഹിത വിഭാഗത്തോട് ചേര്‍ന്ന ബാറ്ററി റൂമില്‍ കഴിഞ്ഞ വെള്ളിയാഴ്ച നടന്ന തീപിടിത്തവുമായി ബന്ധപ്പെട്ട് പരിക്കേറ്റവരുടെ എല്ലാ ചികിത്സാ ചെലവുകളും സംസ്ഥാന സര്‍ക്കാര്‍ ഏറ്റെടുക്കണമെന്ന് പ്രിയങ്ക ഗാന്ധി എംപി ആവശ്യപ്പെട്ടു. സ്വകാര്യ ആശുപത്രികളിലേക്കു മാറ്റിയ രോഗികള്‍ക്കും ഈ സൗകര്യം ഉറപ്പാക്കണമെന്നും അവര്‍ ആവശ്യപ്പെട്ടു.
കോഴിക്കോട് ജില്ലാ കളക്ടറുമായി ഫോണില്‍ ബന്ധപ്പെട്ട് തിങ്കളാഴ്ച്ച രാവിലെ തന്നെ വിഷയത്തെക്കുറിച്ച് വിശദമായി ചര്‍ച്ച ചെയ്തതായും ഉടന്‍ തന്നെ സര്‍ക്കാര്‍ ഇടപെടലുണ്ടാകണമെന്നും എല്ലാ സഹായങ്ങളും തീപിടിത്ത ബാധിതര്‍ക്ക് ലഭ്യമാകണമെന്നും പ്രിയങ്ക ഗാന്ധി നിര്‍ദ്ദേശിച്ചു.
വെള്ളിയാഴ്ച രാത്രി എട്ട് മണിയോടെയായിരുന്നു എംആര്‍ഐ യുപിഎസ് യൂണിറ്റിനടുത്ത് പുക ഉയര്‍ന്നത്. ഫയര്‍ അലാറം മുഴങ്ങിയതോടെ തന്നെ എല്ലാ രോഗികളെയും സുരക്ഷിതമായി ഒഴിപ്പിച്ചിരുന്നു. അപകടത്തെ തുടര്‍ന്ന് സംസ്ഥാന വ്യാപകമായി ആശുപത്രികളിലെ സുരക്ഷാ നടപടികള്‍ കര്‍ശനമാക്കണമെന്നും പ്രിയങ്ക ഗാന്ധി അഭിപ്രായപ്പെട്ടു.
