'കുട മടക്കല്ലേ..'; കേരളത്തിൽ ഇന്ന് പരക്കെ മഴ പെയ്യുമെന്ന് മുന്നറിയിപ്പ്; മൂന്ന് ജില്ലകളിൽ യെല്ലോ അലർട്ട്; ജാഗ്രത വേണമെന്ന് കാലാവസ്ഥ വകുപ്പ്

തിരുവനന്തപുരം: കേരളത്തിൽ ഇന്ന് വ്യാപകമായി മഴ ലഭിക്കാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ഇടുക്കി, മലപ്പുറം, വയനാട് എന്നീ മൂന്ന് ജില്ലകളിൽ യെല്ലോ അലർട്ട് പ്രഖ്യാപിച്ചു. 24 മണിക്കൂറിൽ 115.5 മില്ലിമീറ്റർ വരെ മഴ ലഭിക്കാൻ സാധ്യതയുള്ള ഒറ്റപ്പെട്ട ശക്തമായ മഴയാണ് ഈ ജില്ലകളിൽ പ്രതീക്ഷിക്കുന്നത്.

അതേസമയം, തമിഴ്നാട്ടിൽ 'ഡിറ്റ് വാ' ചുഴലിക്കാറ്റ് കനത്ത നാശനഷ്ടങ്ങൾ ഉണ്ടാക്കി. ഡെൽറ്റ ജില്ലകളിൽ കൃഷിനാശം റിപ്പോർട്ട് ചെയ്തു. തഞ്ചാവൂർ, തൂത്തുക്കുടി എന്നിവിടങ്ങളിൽ വീടിന്റെ മതിൽ ഇടിഞ്ഞും, വൈദ്യുതി കമ്പി പൊട്ടിവീണും മൂന്ന് പേർ മരിച്ചു.

ചെന്നൈ ഉൾപ്പെടെയുള്ള വടക്കൻ ജില്ലകളിൽ മഴ നാളെ രാവിലെ വരെ തുടരും. ശ്രീലങ്കൻ തീരം വിട്ട് ഇന്ത്യൻ തീരത്തേക്ക് അടുക്കുമ്പോഴേക്കും ദുർബലമായ 'ഡിറ്റ് വാ' അതിതീവ്ര ന്യൂനമർദ്ദമായി ആന്ധ്രാ തീരത്തേക്ക് നീങ്ങുമെന്നാണ് പ്രവചനം.