ടിപ്പര്‍ ലോറിക്കടിയില്‍പ്പെട്ട് സ്‌കൂട്ടര്‍ യാത്രക്കാരന് ദാരുണാന്ത്യം; മരിച്ചത് നെയ്ത്തുകുളങ്ങരക്കാരൻ കെ.ടി. മുബൈർ
കോഴിക്കോട്: ദേശീയപാത 66ൽ ടിപ്പർ ലോറി കയറി സ്കൂട്ടർ യാത്രക്കാരനായ യുവാവ് മരിച്ചു. നെയ്ത്തുകുളങ്ങര സ്വദേശി കെ.ടി. മുബൈർ (40) ആണ് മരിച്ചത്. മുംബൈയിൽ നിന്ന് നാട്ടിലെത്തി ഡ്രൈവറായി ജോലി ചെയ്തു വരികയായിരുന്നു. തൊണ്ടയാട് ജംഗ്ഷന് താഴെയുള്ള സർവീസ് റോഡിലാണ് അപകടമുണ്ടായത്.
ഞായറാഴ്ച വൈകുന്നേരത്തോടെയാണ് സംഭവം. പാലാഴി ഭാഗത്തുനിന്ന് തൊണ്ടയാട് ജംഗ്ഷനിൽ കയറി മലാപ്പറമ്പ് ഭാഗത്തേക്ക് തിരിയുന്നതിനിടെയാണ് മുബൈർ അപകടത്തിൽപ്പെട്ടത്. സ്കൂട്ടറിൽ നിന്ന് റോഡിലേക്ക് വീണ യുവാവിന്റെ ശരീരത്തിലൂടെ ടിപ്പർ ലോറി കയറിയിറങ്ങുകയായിരുന്നു.
ദീർഘകാലം പ്രവാസിയായിരുന്ന മുബൈർ അടുത്തിടെയാണ് നാട്ടിൽ തിരിച്ചെത്തി ഡ്രൈവർ ജോലി ആരംഭിച്ചത്. അപകടത്തെ തുടർന്ന് ടിപ്പർ ഡ്രൈവർ പി.കെ. ശിബിലിയുടെ പേരിൽ മനഃപൂർവമല്ലാത്ത നരഹത്യ, അശ്രദ്ധമായി വാഹനം ഓടിക്കൽ തുടങ്ങിയ വകുപ്പുകൾ ചുമത്തി പോലീസ് കേസെടുത്തു. മരിച്ച മുബൈറിന്റെ പിതാവ് കെ.ടി. കുഞ്ഞോയിയും മാതാവ് പരേതയായ ആയിഷയുമാണ്. ഭാര്യ ഫർസാനയും മക്കളായ മുഹമ്മദ് സയാൻ, മുഹമ്മദ് ഇഹ്സാൻ, ആയിഷ എന്നിവരുമുണ്ട്
