ഭർത്താവിനെ കാണാനില്ലെന്ന് പരാതി; അന്വേഷണത്തിൽ പോലീസ് കണ്ടെത്തിയത് മോഷണ കേസിലെ പ്രതിയെ; അറസ്റ്റിലായത് ചക്കാമ്പുഴക്കാരൻ നിഖിൽ

കോട്ടയം: വീട്ടമ്മയുടെ കഴുത്തിൽ കിടന്ന സ്വർണ്ണമാല പൊട്ടിച്ചെടുത്ത് കടന്നുകളഞ്ഞ കേസിലെ പ്രതിയെ പോലീസിന്റെ പിടിയിൽ. ചക്കാമ്പുഴ കരോട്ടു കാവാലംകുഴിയിൽ കെ.ജി. നിഖിൽ (33) ആണ് പിടിയിലായത്.ഭർത്താവിനെ കാണാനില്ലെന്ന് ഭാര്യ നൽകിയ പരാതിയിൽ അന്വേഷണം നടത്തിയപ്പോൾ ഇയാളെ കണ്ടെത്തുകയും മോഷണ കേസിൽ പോലീസ് തിരയുന്ന പ്രതിയാണെന്ന് തിരിച്ചറിയുകയുമായിരുന്നു.

കഴിഞ്ഞ 24-ന് വൈകീട്ട് ഏറ്റുമാനൂർ കിഴക്കുംഭാഗം മന്നത്തൂർ കോളനിക്ക് സമീപത്തെ വീട്ടിലാണ് കവർച്ച നടന്നത്. പ്രതി വീടിന്റെ ഹാളിൽ അതിക്രമിച്ചു കയറി വീട്ടമ്മയുടെ കഴുത്തിൽ നിന്നുമായി രണ്ടുപവൻ തൂക്കം വരുന്ന സ്വർണ്ണമാല പൊട്ടിച്ചെടുത്ത് രക്ഷപ്പെടുകയായിരുന്നു. ഈ കേസിൽ പോലീസ് അന്വേഷണം പുരോഗമിക്കുന്നതിനിടെയാണ് പ്രതിയെ കാണാനില്ലെന്ന് കാണിച്ച് ഭാര്യ പോലീസിൽ പരാതി നൽകുന്നത്.

പ്രദേശത്ത് എട്ടുമാസമായി വാടകയ്ക്ക് താമസിക്കുകയായിരുന്നു നിഖിൽ. അന്വേഷണം നടത്തുന്നതിനിടെ കഴിഞ്ഞദിവസം എറണാകുളത്ത് പള്ളിമുക്കിന് സമീപത്ത് വെച്ചാണ് പോലീസ് ഇയാളെ കണ്ടെത്തിയത്. അപ്പോഴാണ് മാല മോഷണക്കേസിലെ പ്രതിയാണെന്ന് പോലീസ് തിരിച്ചറിഞ്ഞതും അറസ്റ്റ് ചെയ്തതും. പ്രതിയെ കോടതി റിമാൻഡുചെയ്തു.