ഗൃഹനാഥനെ തടഞ്ഞുനിർത്തി എ.ടി.എം. കാർഡ് തട്ടിയെടുത്തു; പിന്നാലെ പണം കവർന്നു; മൂന്ന് പേര് പിടിയിൽ

കാസർകോട്: നെല്ലിക്കുന്നിൽ ഗൃഹനാഥനെ തടഞ്ഞുനിർത്തി എ.ടി.എം. കാർഡ് തട്ടിയെടുത്ത് ഒരു ലക്ഷം രൂപ കവർന്ന സംഭവത്തിൽ മൂന്നുപേരെ കാസർകോട് ടൗൺ പോലീസ് അറസ്റ്റ് ചെയ്തു. ആലമ്പാടി സ്വദേശി ഖമറുദ്ദീനാണ് പണം നഷ്ടമായത്. വ്യാഴാഴ്ച രാവിലെയാണ് കേസിനാസ്പദമായ സംഭവം നടന്നത്. ഖമറുദ്ദീനെ തടഞ്ഞുനിർത്തിയ മൂന്നംഗസംഘം ഖമറുദ്ദീന്റെ എ.ടി.എം. കാർഡ് പിടിച്ചുവാങ്ങുകയായിരുന്നു.

തുടർന്ന്, എ.ടി.എം. കൗണ്ടറിലെത്തി കാർഡ് ഉപയോഗിച്ച് ഒരു ലക്ഷം രൂപ പിൻവലിച്ചുവെന്ന് പോലീസ് അറിയിച്ചു. ഖമറുദ്ദീൻ നൽകിയ വിവരങ്ങളുടെയും സമീപപ്രദേശങ്ങളിലെ സി.സി.ടി.വി. ദൃശ്യങ്ങളുടെയും അടിസ്ഥാനത്തിൽ നടത്തിയ അന്വേഷണത്തിലാണ് കാസർകോട് ടൗൺ പോലീസ് പ്രതികളെ തിരിച്ചറിഞ്ഞ് കസ്റ്റഡിയിലെടുത്തത്. അറസ്റ്റിലായ മൂന്നുപേരെയും പോലീസ് വിശദമായി ചോദ്യം ചെയ്തുവരികയാണ്. കവർന്ന പണം തിരികെ പിടിക്കാനുള്ള ശ്രമങ്ങളും പുരോഗമിക്കുന്നുണ്ട്. പ്രതികളുടെ കൂടുതൽ വിവരങ്ങൾ ഉടൻ പുറത്തുവിടുമെന്ന് കാസർകോട് ടൗൺ പോലീസ് അറിയിച്ചു.