കെഎസ്ആര്‍ടിസി ബസുമായി കൂട്ടിയിടിച്ചത് ഉമ്മയും അഞ്ച് മക്കളും സഞ്ചരിച്ച കാര്‍; രണ്ട് കുട്ടികള്‍ ദാരുണമായി മരിച്ചു: മാതാവിനും മൂന്ന് മക്കള്‍ക്കും പരിക്ക്

കാഞ്ഞങ്ങാട്: ദേശീയപാതയില്‍ ഐങ്ങോത്ത് ഉമ്മയും അഞ്ച് മക്കളും സഞ്ചരിച്ച കാര്‍ കെഎസ്ആര്‍ടിസി ബസുമായി കൂട്ടിയിടിച്ച് രണ്ട് കുട്ടികള്‍ ദാരുണമായി മരിച്ചു. മാതാവിനും മൂന്ന് മക്കള്‍ക്കും പരുക്കേറ്റു. നീലേശ്വരം കണിച്ചിറ കല്ലായി ഹൗസിലെ ലത്തീഫിന്റെയും ഫാത്തിമത്ത് സുഹറാബിയുടെയും മക്കളായ സൈനുല്‍ റുമാന്‍ ലത്തീഫ് (9), ലഹക്ക് സൈനബ (12) എന്നിവരാണു മരിച്ചത്.

ഫാത്തിമത്ത് സുഹറാബി (40), മക്കളായ ഫായിസ് അബൂബക്കര്‍ (20), ഷെറിന്‍ ലത്തീഫ് (14), മിസബ് ലത്തീഫ് (3) എന്നിവരെ പരുക്കുകളോടെ കണ്ണൂരിലെ മിംസ് ആശുപത്രിയില്‍ പ്രവേശിപ്പിച്ചു. മിസബിനു നിസ്സാര പരുക്കേയുള്ളൂ. ബസ് യാത്രക്കാരായ സൂര്യ, അനില്‍ ഹരിദാസ് എന്നിവര്‍ക്കും പരുക്കുണ്ട്. ഇന്നലെ ഉച്ചയ്ക്കു 12ന് ആണ് നാടിനെ നടുക്കിയ അപകടം. കണ്ണൂരില്‍നിന്നു കാഞ്ഞങ്ങാട്ടേക്കു പോകുകയായിരുന്ന കെഎസ്ആര്‍ടിസി ബസുമായി കൂട്ടിയിടിക്കുകയായിരുന്നു.