ഏപ്രില്‍ ഒന്നുമുതല്‍ വൈദ്യുതി നിരക്കും വെള്ളക്കരവും വര്‍ദ്ധിക്കുമെന്ന് അധികൃതര്‍; വെദ്യുതി നിരക്ക് യൂണിറ്റിന് 12 പൈസയും, വെള്ളക്കരം അഞ്ചുശതമാനവും വര്‍ദ്ധിക്കാനാണ് സാധ്യത; ഉപഭോക്താക്കള്‍ക്ക് അധിക ചെലവ്
തിരുവനന്തപുരം: ഏപ്രില്‍ ഒന്നുമുതല്‍ വൈദ്യുതി നിരക്കും വെള്ളക്കരവും വര്‍ദ്ധിക്കുമെന്ന് അധികൃതര്‍ അറിയിച്ചു. വൈദ്യുതി നിരക്ക് യൂണിറ്റിന് 12 പൈസയും, വെള്ളക്കരം അഞ്ചുശതമാനവും വര്‍ദ്ധിക്കാനാണ് സാധ്യത. അതിനൊപ്പം സര്‍ചാര്‍ജായി 7 പൈസ കൂടി ഈടാക്കുന്നതിനാല്‍, ഒറ്റ യൂണിറ്റിന് 19 പൈസയുടെ വര്‍ധനവാണ് അനുഭവപ്പെടുക. വെള്ളക്കര വര്‍ദ്ധനയെ തുടര്‍ന്ന് ഉപഭോക്താക്കള്‍ക്ക് പ്രതിമാസം മൂന്നര രൂപ മുതല്‍ 60 രൂപവരെ അധിക ചെലവായി വരാനാണ് സാധ്യത.
ഡിസംബര്‍ മാസത്തില്‍ വൈദ്യുതി റെഗുലേറ്ററി കമ്മീഷന്‍ പ്രഖ്യാപിച്ച പുതിയ നിരക്കുകള്‍ പ്രകാരമാണ് ഈ വര്‍ദ്ധന. വൈദ്യുതി നിരക്ക് മാത്രമല്ല, ഫിക്‌സഡ് ചാര്‍ജ് പ്രതിമാസം 10 രൂപയും കൂടും. ഇതിനോടൊപ്പം, ഇന്ധന സര്‍ചാര്‍ജായി ഏഴു പൈസ കൂടി ഈടാക്കും, അതായത് ഒരുമാസം 100 യൂണിറ്റ് ഉപയോഗിക്കുന്നവര്‍ക്ക് ദ്വൈമാസ ബില്ലില്‍ 32 രൂപ അധികമായി വരും. ഇന്ധന സര്‍ചാര്‍ജും കൂട്ടിച്ചേര്‍ത്താല്‍ 39 രൂപ അധിക ചെലവായി വരും. 250 യൂണിറ്റിന് മുകളിലുള്ള ഉപഭോക്താക്കള്‍ക്ക് ആദ്യ യൂണിറ്റുമുതല്‍ ഏകീകൃത നിരക്കായിരിക്കും. വൈദ്യുതി നിരക്ക് വര്‍ദ്ധനയിലൂടെ കെഎസ്ഇബി 357.28 കോടി രൂപയുടെ അധിക വരുമാനം ലക്ഷ്യമിടുന്നു.
വെള്ളക്കര വര്‍ദ്ധന കേന്ദ്ര സര്‍ക്കാരിന്റെ നിര്‍ദേശപ്രകാരം നടപ്പാക്കുകയാണ്. കഴിഞ്ഞ വര്‍ഷം സംസ്ഥാന സര്‍ക്കാര്‍ ഈ വര്‍ദ്ധന ഒഴിവാക്കിയിരുന്നെങ്കിലും, ഈ വര്‍ഷം ഇത്തരത്തില്‍ ഇളവ് നല്‍കിയിട്ടില്ല. അതുകൊണ്ടുതന്നെ ഉപഭോക്താക്കള്‍ക്ക് അധിക ചെലവ് സംഭവിക്കുമെന്നാണ് ജല അതോറിറ്റി അധികൃതരുടെ സൂചന.
