ശക്തമായ മഴയെ തുടര്‍ന്ന് ഡാമുകളില്‍ ജലനിരപ്പ് ഉയര്‍ന്നു; വൈദ്യുതി ഉല്‍പാദനം വര്‍ദ്ധിപ്പിച്ച് കെഎസ്ഇബി; വൈദ്യുതി ഉപയോഗത്തിലും കുറവ്; വിലകൊടുത്ത് വാങ്ങുന്ന വൈദ്യുതിയേക്കാള്‍ ഉല്‍പാദനം കൂടി
തിരുവനന്തപുരം: സംസ്ഥാനത്ത് കഴിഞ്ഞ ദിവസങ്ങളിലുണ്ടായ ശക്തമായ മഴയെ തുടര്‍ന്ന് ഡാമുകളില്‍ ജലനിരപ്പ് ഗണ്യമായി ഉയര്‍ന്നു. ഡാമുകളില്‍ ജലനിരപ്പ് ഉയര്‍ന്നതിനാല്‍ വൈദ്യുതി ഉല്‍പാദനം കെഎസ്ഇബി വര്‍ദ്ധിപ്പിക്കുകയും ചെയ്തു. ഇടുക്കി ഉള്‍പ്പെടെ ഒമ്പത് ഡാമുകളില്‍ റെഡ് അലര്‍ട്ട് പ്രഖ്യാപിച്ചിരിക്കുകയാണ്. കക്കി, മൂഴിയാര്‍, മാട്ടുപ്പെട്ടി, കല്ലാര്‍കുട്ടി, ഇരട്ടയാര്‍, ലോവര്‍ പെരിയാര്‍, ഷോളയാര്‍, പെരിങ്ങല്‍ക്കുത്ത്, ബാണാസുര സാഗര്‍ എന്നിവിടങ്ങളിലാണ് മുന്നറിയിപ്പ് നിലവിലുള്ളത്.
പമ്പയില്‍ 81 ശതമാനം, ഷോളയാറില്‍ 99 ശതമാനം, ഇടമലയാറില്‍ 79 ശതമാനം എന്നിങ്ങനെയാണ് നിലവിലെ ജലനിരപ്പ്. ഇടുക്കിയില്‍ 73 ശതമാനം സംഭരണ ശേഷിയാണ് നിറഞ്ഞിരിക്കുന്നത്. ഇതിന്റെ അടിസ്ഥാനത്തില്‍ ഇടുക്കിയില്‍ നിന്ന് 7.748 ദശലക്ഷം യൂണിറ്റ് വൈദ്യുതി ഉല്‍പാദിപ്പിക്കുകയാണ്. ശബരിഗിരിയില്‍ 5.8879 ദശലക്ഷം യൂണിറ്റും മറ്റ് ഡാമുകളിലും റൂള്‍കര്‍വ് അനുസരിച്ച് ഉല്‍പാദനം ക്രമീകരിച്ചിട്ടുണ്ട്.
വൈദ്യുതി ഉപഭോഗത്തിലും കുറവ് രേഖപ്പെടുത്തി. ഈ മാസത്തെ ഉയര്‍ന്ന പ്രതിദിന ഉപഭോഗം 82 ദശലക്ഷം യൂണിറ്റാണെങ്കില്‍, കഴിഞ്ഞ ദിവസം 76.8122 ദശലക്ഷം യൂണിറ്റായിരുന്നു. ഇതില്‍ 38.6854 ദശലക്ഷം യൂണിറ്റ് ആഭ്യന്തര ഉല്‍പാദനവും 38.1268 ദശലക്ഷം യൂണിറ്റ് പുറത്തുനിന്നും വാങ്ങിയതുമാണ്. വിലകൊടുത്ത് വാങ്ങുന്ന വൈദ്യുതിയേക്കാള്‍ സംസ്ഥാനത്ത് ആഭ്യന്തര ഉല്‍പാദനം കൂടുതലായതാണ് ശ്രദ്ധേയമായ കാര്യം.
