കഴുത്തിൽ കുത്തിപ്പിടിച്ചു, നിലത്ത് തള്ളിയിട്ട് തിരിച്ചറിയൽ കാർഡും എൻട്രി പാസും പിടിച്ചുപറിച്ചു; വിമാനത്താവളത്തിലെ കാർ പാർക്കിങ് ഏരിയയിൽ യുവതിയെ ആക്രമിച്ച കേസിൽ യുവാവ് അറസ്റ്റിൽ

കൊച്ചി: നെടുമ്പാശ്ശേരി വിമാനത്താവളത്തിലെ കാർ പാർക്കിങ് ഏരിയയിൽ യുവതിയെ ആക്രമിച്ച കേസിൽ ഒരാൾ അറസ്റ്റിൽ. നിലമ്പൂർ സ്വദേശിയും ലോർഡ് കൃഷ്ണ ഫ്ലാറ്റിൽ താമസക്കാരനുമായ മുരിങ്ങാമ്പിള്ളി വീട്ടിൽ സെബിൻ ബെന്നി (30)യെയാണ് നെടുമ്പാശ്ശേരി പൊലീസ് അറസ്റ്റ് ചെയ്തത്.

സെബിൻ ബെന്നി രാജ്യാന്തര ടെർമിനലിലെ കാർ പാർക്കിങ് ഏരിയയിൽ വെച്ച് യുവതിയെ തടഞ്ഞുനിർത്തി കഴുത്തിൽ കുത്തിപ്പിടിച്ച് ആക്രമണം നടത്തുകയായിരുന്നു. യുവതിയെ നിലത്തേക്ക് തള്ളിയിട്ട ശേഷം, അവർ ധരിച്ചിരുന്ന തിരിച്ചറിയൽ കാർഡും എൻട്രി പാസും ബലമായി പിടിച്ചുപറിച്ചു കൊണ്ടുപോയി. ഇൻസ്‌പെക്ടർ എം.എച്ച്. അനുരാജ്, എസ്.ഐ എസ്.എസ്. ശ്രീലാൽ, എ.എസ്.ഐ റോണി അഗസ്റ്റിൻ എന്നിവരടങ്ങുന്ന സംഘമാണ് പ്രതിയെ പിടികൂടിയത്.