കുട്ടിയെ കാണാതായത് ചൊവ്വാഴ്ച; ചായ കുടിക്കാന്‍ എന്ന് പറഞ്ഞിറങ്ങിയ 13 വയസ്സുകാരനെ കാണാതായത് ദുരൂഹ സാഹചര്യത്തില്‍; വീട്ടുകാര്‍ തപ്പി മടുത്തപ്പോള്‍ ചാനലുകളില്‍ വ്യാഴാഴ്ച രാവിലെ ബ്രേക്കിംഗ് ന്യൂസ് എത്തി; വാര്‍ത്ത എത്തിയതും കുട്ടി വീട്ടില്‍ തിരിച്ചെത്തി; ആലുവയിലെ ആ കാണാതാകലിന് പിന്നിലെന്ത്? ലഹരി മാഫിയയും സംശയ നിഴലില്‍
ആലുവ: ആലുവയില്‍ 13 വയസ്സുകാരന്‍ ചൊവ്വാഴ്ച വൈകുന്നേരം വീട്ടില്‍ നിന്ന് ഇറങ്ങിയ ശേഷം മടങ്ങി വന്നില്ല. 'ചായ കുടിക്കാനാണ് പോകുന്നത്' എന്നായിരുന്നു കുട്ടി പറഞ്ഞിരുന്നത്. എന്നാല്‍ രാത്രി വൈകിയും തിരിച്ചെത്താതായപ്പോള്‍ വീട്ടുകാര്‍ ഓടിയോടി തിരഞ്ഞെങ്കിലും ഒരു വിവരവും ലഭിച്ചില്ല. വ്യാഴാഴ്ച രാവിലെ, ദേശീയ ചാനലുകള്‍ കുട്ടിയെ കുറിച്ചുള്ള ബ്രേക്കിംഗ് ന്യൂസ് പുറത്തുവിട്ടതോടെ സന്നാഹങ്ങള്‍ ഉണര്‍ന്നു. അത്ഭുതകരമായി, വാര്‍ത്ത പ്രചരിച്ചതിന് തൊട്ടുപിന്നാലെ കുട്ടി വീട്ടിലേക്ക് തിരിച്ചെത്തി.
ഈ സംഭവത്തിന്റെ ദുരൂഹതയും വൈകാരിക ഉത്കണ്ഠയുമാണ് ഇപ്പോള്‍ ആലുവയെ മുഴുവന്‍ അലട്ടുന്നത്. ലഹരി മാഫിയക്കും കുട്ടിയെ കാണാതായതുമായി ബന്ധമുണ്ടോ? ഏത് സാഹചര്യത്തിലൂടെയാണ് കുട്ടി പോയത്? ആലുവയിലെ ഈ സംഭവത്തിന് പിന്നില്‍ ഗൂഢാലോചനയുണ്ടോ? എന്നത് ഇപ്പോള്‍ പൊലീസ് ഉള്‍പ്പെടെയുള്ള അന്വേഷണ സംഘങ്ങള്‍ പരിശോധിക്കുകയാണ്.
കുട്ടിയില്‍ നിന്ന് പൊലീസ് വിശദമായി മൊഴിയെടുക്കും. ആലുവ എസ്എന്‍ഡിപി സ്‌കൂള്‍ വിദ്യാര്‍ത്ഥിയായ തായിക്കാട്ടുകര സ്വദേശിയായ കുട്ടിയാണ് ചൊവ്വാഴ്ച രാത്രി മുതല്‍ കാണാതായെന്ന പരാതി ഉയര്‍ന്നത്. കുട്ടി ആലുവ പരിസരത്ത് തന്നെ ഉണ്ടായിരുന്നുവെന്നാണ് പൊലീസിന്റെ ഇപ്പോഴത്തെ നിഗമനം.
വീട്ടില്‍ നിന്ന് ചായ കുടിക്കാനെന്ന് പറഞ്ഞ് പോയ കുട്ടി രാവിലെയാണ് തിരികെ വന്നത്. ഏതെങ്കിലും ലഹരി കേന്ദ്രങ്ങളുമായി കുട്ടികള്‍ക്ക് ബന്ധമുണ്ടോ എന്ന് പൊലീസ് പരിശോധിക്കുകയാണ്. കുടുംബത്തിന്റേയും സ്‌കൂള്‍ അധികൃതരുടേയും മൊഴി പൊലീസ് ശേഖരിക്കും. മാതാപിതാക്കളോട് കുട്ടിയെ അന്വേഷണ സംഘത്തിന് മുന്നില്‍ ഹാജരാക്കാന്‍ നിര്‍ദ്ദേശം നല്‍കിയിട്ടുണ്ട്.
