നാടകീയ സംഭവങ്ങള് ഉണ്ടായത് തരൂര് കാറില് ഇരിക്കുമ്പോള് തന്നെ; തരൂരിനെ അസഭ്യം വിളിച്ച് കയ്യേറ്റം ചെയ്യാന് ശ്രമിക്കുന്നതിനിടെ ഗണ്മാന് ഇടപെടുകയായിരുന്നു; ഹോണടിച്ചതിനെച്ചൊല്ലി തര്ക്കം; ശശി തരൂര് എംപിയുടെ ഗണ്മാനെ കയ്യേറ്റം ചെയ്യാന് ശ്രമം, മൂന്ന് പേര് കസ്റ്റഡിയില്; വണ്ടൂരില് സംഭവിച്ചതില് അസ്വാഭാവികതകള് ഏറെ
കോഴിക്കോട്: ശശി തരൂര് എംപിയുടെ ഗണ്മാന് നേരെ വണ്ടൂരില് കയ്യേറ്റ ശ്രമത്തില് നിറയുന്നത് അസ്വാഭാവികത. വണ്ടൂര് ചെള്ളിത്തോട് വെച്ച് രാത്രി ഏഴ് മണിയോടെയാണ് സംഭവം. എംപിയുടെ വാഹനത്തിന് മുന്നിലുണ്ടായിരുന്ന കാറിലെ യാത്രക്കാരാണ് പ്രകോപിതരായി കയ്യേറ്റത്തിന് മുതിര്ന്നത്. സംഭവവുമായി ബന്ധപ്പെട്ട് മൂന്ന് പേരെ വണ്ടൂര് പോലീസ് കസ്റ്റഡിയിലെടുത്തു. കണ്ടാലറിയാവുന്ന നാല് പേര്ക്കെതിരെയാണ് നിലവില് കേസെടുത്തിരിക്കുന്നത്.
പ്രദേശത്തെ ഗതാഗതക്കുരുക്കില്പ്പെട്ട എംപിയുടെ വാഹനത്തിന്റെ ഡ്രൈവര് ഹോണ് മുഴക്കിയതാണ് തര്ക്കത്തിന് കാരണമായത്. ഇതില് പ്രകോപിതരായ മുന്നിലെ വാഹനത്തിലുണ്ടായിരുന്ന സംഘം കാറില് നിന്നിറങ്ങി എംപിയുടെ വാഹനത്തിന്റെ ബോണറ്റില് അടിക്കുകയും അസഭ്യം പറയുകയും ചെയ്തു. ഇത് തടയാനായി പുറത്തിറങ്ങിയ ഗണ്മാനെ സംഘം കയ്യേറ്റം ചെയ്യാന് ശ്രമിക്കുകയായിരുന്നുവെന്നാണ് പരാതിയില് പറയുന്നത്.
സംഭവത്തിന് പിന്നാലെ വണ്ടൂര് പോലീസ് സ്ഥലത്തെത്തി സ്ഥിതിഗതികള് ശാന്തമാക്കി. ആക്രമണത്തിന് മുതിര്ന്ന സംഘം സഞ്ചരിച്ചിരുന്ന രണ്ട് വാഹനങ്ങളും പോലീസ് കസ്റ്റഡിയിലെടുത്തിട്ടുണ്ട്. എംപിയുടെ സുരക്ഷാ ഉദ്യോഗസ്ഥനെ ഔദ്യോഗിക കൃത്യനിര്വ്വഹണം തടസ്സപ്പെടുത്തിയതിനും കയ്യേറ്റം ചെയ്തതിനും ഐപിസി പ്രകാരമുള്ള വകുപ്പുകള് ചേര്ത്താണ് കേസെടുത്തിരിക്കുന്നത്.
മലപ്പുറം ജില്ലയിലെ വിവിധ പരിപാടികളില് പങ്കെടുത്ത ശേഷം മടങ്ങുകയായിരുന്നു ശശി തരൂര് എംപി. എംപി വാഹനത്തിനുള്ളിലിരിക്കെയാണ് നാടകീയമായ സംഭവങ്ങള് അരങ്ങേറിയത്. കസ്റ്റഡിയിലുള്ളവരെ കൂടുതല് ചോദ്യം ചെയ്തുവരികയാണെന്നും ഒളിവിലുള്ള മറ്റൊരാള്ക്കായി തിരച്ചില് ഊര്ജ്ജിതമാക്കിയതായും വണ്ടൂര് പോലീസ് അറിയിച്ചു. മുന്നറിയിപ്പില്ലാതെ വാഹനങ്ങള് തടയുന്നതും ജനപ്രതിനിധികളുടെ സുരക്ഷാ ഉദ്യോഗസ്ഥര്ക്ക് നേരെയുള്ള ഇത്തരം അതിക്രമങ്ങളും ഗൗരവത്തോടെയാണ് കാണുന്നതെന്ന് പോലീസ് വൃത്തങ്ങള് വ്യക്തമാക്കി. കസ്റ്റഡിയിലെടുത്ത വാഹനങ്ങളുടെ രേഖകള് പരിശോധിച്ചു വരികയാണ്.
കാറിലെത്തിയ എത്തിയ സംഘം വാഹനം തടഞ്ഞു അസഭ്യം പറഞ്ഞെന്നുമാണ് ഗണ്മാന് വണ്ടൂര് പൊലീസില് പരാതിനല്കിയത്. തരൂരിന്റെ കാറിനെ പിന്തുടര്ന്നെത്തിയാണ് സംഘം കാര് കുറുകെയിട്ടാണ് വാഹനം തടഞ്ഞത്. തരൂരിനെ അസഭ്യം വിളിച്ച് കയ്യേറ്റം ചെയ്യാന് ശ്രമിക്കുന്നതിനിടെ ഗണ്മാന് ഇടപെടുകയായിരുന്നു. ആക്രമണത്തിന് പിന്നില് വ്യക്തമായ രാഷ്ട്രീയ വൈരാഗ്യമോ ഗൂഢാലോചനയോ ഉണ്ടോയെന്ന് ഇപ്പോള് സ്ഥിരീകരിച്ചിട്ടില്ല. നാട്ടുകാരുടെ ഭാഗത്തുനിന്നും ഈ സംഘത്തിന് യാതൊരു പിന്തുണയും ലഭിച്ചിരുന്നില്ല.
ബോധപൂര്വം പ്രശ്നങ്ങള് സൃഷ്ടിക്കുക എന്ന ലക്ഷ്യത്തോടെയാണ് അക്രമികള് എത്തിയതെന്നാണ് പൊലീസ് സംശയിക്കുന്നത്. പ്രതികളെ പിടികൂടി വിശദമായി ചോദ്യം ചെയ്താല് മാത്രമേ പ്രകോപനത്തിനുള്ള യഥാര്ത്ഥ കാരണം വ്യക്തമാവുകയുള്ളൂ.
