ഉദയ്പൂർ: രാജസ്ഥാനിലെ ഉദയ്പൂരിൽ രണ്ട് കാറുകൾ കൂട്ടിയിടിച്ചുണ്ടായ വാഹനാപകടത്തിൽ പ്രായപൂർത്തിയാകാത്തവർ ഉൾപ്പെടെ നാല് യുവാക്കൾക്ക് ദാരുണാന്ത്യം. ആറ് പേർക്ക് ഗുരുതരമായി പരിക്കേറ്റു. അപകടത്തിന് തൊട്ടുമുമ്പ് വാഹനം മണിക്കൂറിൽ 120 കിലോമീറ്റർ വേഗതയിൽ അലക്ഷ്യമായി ഓടിച്ചിരുന്നതിന്റെ ഞെട്ടിക്കുന്ന ദൃശ്യങ്ങൾ പുറത്തുവന്നു.

മുഹമ്മദ് അയാൻ (17), ആദിൽ ഖുറേഷി (14), ഷേർ മുഹമ്മദ് (19), ഗുലാം ഖ്വാജ (17) എന്നിവരാണ് അപകടത്തിൽ മരിച്ചത്. ഇവർ സഞ്ചരിച്ച കാറിലുണ്ടായിരുന്ന വസീം (20), മുഹമ്മദ് കൈഫ് (19) എന്നിവർക്ക് ഗുരുതരമായി പരിക്കേറ്റു. ഗുജറാത്തിലേക്ക് പോകുകയായിരുന്ന മറ്റൊരു കാറിലുണ്ടായിരുന്ന മഹിപാൽ ജാട്ട് (48), രാജ്ബാല (45), രാജേഷ് (26), കർമ്മവീർ സിംഗ് (24) എന്നിവർക്കും പരിക്കേറ്റിട്ടുണ്ട്.

അപകടത്തിന്റെ ഏകദേശം 9 മിനിട്ടോളം ദൈർഘ്യമുള്ള വീഡിയോ ദൃശ്യങ്ങളാണ് പുറത്തുവന്നിരിക്കുന്നത്. അപകടത്തിൽ മരിച്ച ഷേർ മുഹമ്മദ് (19) ആണ് വാഹനം ഓടിച്ചിരുന്നത്. ഇയാൾ പുകവലിച്ചുകൊണ്ട് മണിക്കൂറിൽ 120 കിലോമീറ്റർ വേഗതയിൽ അലക്ഷ്യമായി കാറോടിക്കുന്നത് വീഡിയോയിൽ വ്യക്തമാണ്. കാറിനുള്ളിൽ ഉച്ചത്തിൽ സംഗീതം വെച്ചാണ് ഇവർ യാത്ര ചെയ്തത്. മുൻസീറ്റിലിരുന്ന ഒരാൾ മൊബൈലിൽ വേഗത 120 കിലോമീറ്ററിൽ എത്തുന്നത് പകർത്തുന്നതും കാണാം. അപകടത്തിന് നിമിഷങ്ങൾക്ക് മുമ്പ് വേഗത കുറയ്ക്കാൻ ഒരാൾ ആവശ്യപ്പെടുന്നതും ദൃശ്യങ്ങളിലുണ്ട്.

'മെഹ്ഫിൽ-ഇ-മിലാദ്' പരിപാടിയിൽ പങ്കെടുത്ത ശേഷം പഴയ അഹമ്മദാബാദ് ഹൈവേയിലൂടെ സഞ്ചരിക്കുകയായിരുന്ന ആറ് സുഹൃത്തുക്കളാണ് അപകടത്തിൽപ്പെട്ടത്. ഇവരുടെ കാർ ഗുജറാത്തിലേക്ക് പോവുകയായിരുന്ന മറ്റൊരു കാറുമായി കൂട്ടിയിടിക്കുകയായിരുന്നു. ഇടിയുടെ ആഘാതത്തിൽ രണ്ട് വാഹനങ്ങളും പൂർണ്ണമായും തകർന്നു. മൃതദേഹങ്ങൾ പുറത്തെടുക്കുന്നതിനും പരിക്കേറ്റവരെ രക്ഷിക്കുന്നതിനും രക്ഷാപ്രവർത്തകർക്ക് കാറുകൾ വെട്ടിപ്പൊളിക്കേണ്ടി വന്നു. ഗുരുതരമായി പരിക്കേറ്റവരെ സമീപത്തെ ആശുപത്രികളിൽ പ്രവേശിപ്പിച്ച് ചികിത്സ നൽകിവരികയാണ്.

അപകടത്തിന് മിനിറ്റുകൾക്ക് മുൻപ് കാറിന്റെ പിൻസീറ്റിലിരുന്ന യുവാവ് മൊബൈൽ ക്യാമറയിൽ പകർത്തിയ വീഡിയോയാണ് അപകടത്തിന്റെ തീവ്രത വെളിപ്പെടുത്തുന്നത്. കാർ ഓടിച്ചിരുന്ന ഷേർ മുഹമ്മദിന്റെ കൈയ്യിൽ ഒരു സിഗരറ്റ് ഉണ്ടായിരുന്നു. കാറിനുള്ളിൽ വളരെ ഉച്ചത്തിൽ ഹരിയാൻവി പാട്ടുകൾ വെച്ചിരിക്കുകയായിരുന്നു. കൂടാതെ കാറിലെ സ്‌ക്രീനിൽ വീഡിയോ പ്ലേ ചെയ്യുന്നുമുണ്ടായിരുന്നു.

ഡ്രൈവർ ആക്സിലറേറ്റർ ആഞ്ഞുചവിട്ടുന്നതും സ്പീഡോമീറ്ററിൽ വേഗത 120 കിലോമീറ്റർ കടക്കുന്നതും വീഡിയോയിൽ വ്യക്തമാണ്. വേഗത 140-ലേക്ക് എത്തിയപ്പോൾ കൂടെയുണ്ടായിരുന്ന സുഹൃത്തുക്കൾ വേഗത കുറയ്ക്കാൻ ആവശ്യപ്പെടുന്നത് കേൾക്കാം. എന്നാൽ ഇത് വകവെക്കാതെ കാർ മുന്നോട്ട് പോവുകയും എതിർദിശയിൽ നിന്ന് വന്ന കാറുമായി കൂട്ടിയിടിക്കുകയുമായിരുന്നു. കൂട്ടിയിടിയുടെ ശബ്ദവും ഗ്ലാസുകൾ തകരുന്ന ശബ്ദവും വീഡിയോയിൽ പതിഞ്ഞിട്ടുണ്ട്. ഏകദേശം പത്ത് മിനിറ്റോളം ഇവർ കാറിനുള്ളിൽ കുടുങ്ങിക്കിടന്ന് സഹായത്തിനായി നിലവിളിച്ചെങ്കിലും നാട്ടുകാർ എത്തുമ്പോഴേക്കും നാല് പേർ മരണപ്പെട്ടിരുന്നു.

സവിന പോലീസ് സ്റ്റേഷൻ ഹൗസ് ഓഫീസർ അജയ് രാജ് സിംഗിന്റെ നേതൃത്വത്തിൽ പോലീസ് അന്വേഷണം ആരംഭിച്ചു. സോഷ്യൽ മീഡിയയിൽ പ്രചരിക്കുന്ന വീഡിയോ പോലീസ് പരിശോധിച്ചു വരികയാണ്. അമിതവേഗതയും ഡ്രൈവർക്കുണ്ടായ ശ്രദ്ധക്കുറവുമാണ് അപകടത്തിന് കാരണമെന്ന് പ്രാഥമിക അന്വേഷണത്തിൽ വ്യക്തമായി.

ഈ അപകടം യുവാക്കൾക്കിടയിലുള്ള അമിതവേഗതയോടുള്ള ഭ്രമത്തെയും ട്രാഫിക് നിയമങ്ങൾ ലംഘിക്കുന്നതിന്റെ അപകടാവസ്ഥയെയും വീണ്ടും ഓർമ്മിപ്പിക്കുന്നു. ഒരു നിമിഷത്തെ അശ്രദ്ധയും ആവേശവും കൊണ്ട് പൊലിഞ്ഞുപോയത് നാല് കുരുന്നു ജീവനുകളാണ്.

കാർഅപകടംഉദയ്പൂർ

മറുനാടൻ മലയാളി ബ്യൂറോ