സിപിഎം സ്ഥാനാര്ഥിയായ ഭര്ത്താവിനെ തോല്പ്പിച്ച വോട്ടര്മാര്ക്ക് നന്ദി പറഞ്ഞ് ഭാര്യ; തോറ്റ സ്ഥാനാര്ത്ഥിയുടെ ഭാര്യ എന്തിന് നന്ദി പറഞ്ഞു പോസ്റ്റ് ഇട്ടു എന്ന് അന്തംവിട്ട് നാട്ടുകാര്; വൈറലായ പോസ്റ്റിന് ഭാര്യയുടെ രസകരമായ വിശദീകരണം ഇങ്ങനെ
സിപിഎം സ്ഥാനാര്ഥിയായ ഭര്ത്താവിനെ തോല്പ്പിച്ച വോട്ടര്മാര്ക്ക് നന്ദി പറഞ്ഞ് ഭാര്യ
ആലപ്പുഴ: ഭര്ത്താക്കന്മാര് കുറെയൊക്കെ ഭാര്യമാര് പറയുന്നത് കേള്ക്കണം. അതല്ലെങ്കില് ഇങ്ങനെയിരിക്കും. എങ്ങനെ? തദ്ദേശ തിരഞ്ഞെടുപ്പില് ഭര്ത്താവിനെ തോല്പ്പിച്ച വാര്ഡ് നിവാസികളോട് നന്ദി പറഞ്ഞുള്ള ഭാര്യയുടെ ഫേസ്ബുക്ക് പോസ്റ്റാണ് സോഷ്യല് മീഡിയയില് വൈറലായത്. മാന്നാര് ഗ്രാമപഞ്ചായത്തിലെ നാലാം വാര്ഡില് സി.പി.എം. സ്ഥാനാര്ഥിയായിരുന്ന സജികുമാര് പരടയില് നല്ല നൈസായി തോറ്റു. ബിജെപി സ്ഥാനാര്ഥി കലാധരനാണ് സജികുമാറിനെ കീഴടക്കിയത്.
തോറ്റ ഭര്ത്താവിനെ ആശ്വസിപ്പിക്കുന്നതിന് പകരം മുറിവില് മുളകുപൊടി തേച്ചുകൊണ്ടായിരുന്നു ഭാര്യ സിന്ധു പരടയിലിന്റെ പോസ്റ്റ്.'മാന്നാര് ഗ്രാമപ്പഞ്ചായത്ത് നാലാം വാര്ഡ് നിവാസികള്ക്ക് നന്ദി ! കണ്ടവര്, കണ്ടവര് മൂക്കത്ത് വിരല് വച്ചു. എന്നാലും.. . ഒറ്റവരി പോസ്റ്റിന് വിശദീകരണവുമായി സിന്ധു മറ്റൊരു പോസ്റ്റിട്ടപ്പോഴാണ് മിക്കവര്ക്കും കാര്യം തിരിഞ്ഞത്.
സിന്ധുവിന്റെ വിശദീകരണം ഇങ്ങനെ:
വാര്ഡ് മെമ്പറുടെ ജോലി പ്രത്യേകിച്ച് ഒരു ജോലിയുമില്ലാത്ത ആള്ക്ക് മാത്രമേ ചെയ്യാന് സാധിക്കൂ എന്നും, ഔദ്യോഗിക സ്ഥാനത്തുള്ള ഒരാള്ക്ക് പറ്റിയ പണിയല്ല ഇതെന്നുമാണ് സിന്ധു പോസ്റ്റില് പറയുന്നത്. സജികുമാര് കുട്ടമ്പേരൂര് സര്വീസ് സഹകരണ ബാങ്കിന്റെ സെക്രട്ടറിയായി കഴിഞ്ഞ 20 വര്ഷമായി ജോലി ചെയ്യുകയാണ്. താനും ഭര്ത്താവും ഇനി അഞ്ച് വര്ഷത്തിനുള്ളില് വിരമിക്കും. പെന്ഷന് പറ്റിക്കഴിഞ്ഞാല് വിദേശത്തേക്ക് പറക്കാനാണ് തന്റെ ഉറച്ച തീരുമാനം.
എന്നാല് പഞ്ചായത്തും പിടിച്ച് നില്ക്കുന്ന ഭര്ത്താവ് ഒരിക്കലും ആ വഴിക്ക് വരില്ലെന്നും, വിദേശയാത്രാ പദ്ധതിയോട് അദ്ദേഹം സഹകരിക്കില്ലെന്നും സിന്ധു ആശങ്കപ്പെടുന്നു. തിരഞ്ഞെടുപ്പില് നില്ക്കരുതെന്ന് താന് എത്ര നിര്ബന്ധിച്ചിട്ടും 'പാര്ട്ടിയുടെ തീരുമാനം' എന്ന് പറഞ്ഞ് മനസ്സില്ലാ മനസ്സോടെയാണ് അദ്ദേഹം മത്സരിച്ചത്. 'ഒരു പരിശ്രമവും കൂടാതെ എനിക്ക് സൗകര്യം ഒപ്പിച്ചു തന്നതിനാണ് ഞാന് നന്ദി പറഞ്ഞത്,' എന്നും സിന്ധു പരടയില് പോസ്റ്റില് കൂട്ടിച്ചേര്ത്തു.
എന്തായാലും സ്ഥാനാര്ഥിയുടെ തോല്വിയില് ആശ്വാസം കണ്ടെത്തി, വിദേശയാത്രാ സ്വപ്നം യാഥാര്ത്ഥ്യമാക്കാന് വഴിയൊരുക്കിയ വോട്ടര്മാര്ക്ക് നന്ദി അറിയിച്ച ഭാര്യയുടെ പോസ്റ്റ് സോഷ്യല് മീഡിയയില് വലിയ രീതിയില് വൈറലായിട്ടുണ്ട്.
സിന്ധുവിന്റെ പോസ്റ്റിന്റെ പൂര്ണരൂപം:
തോറ്റ സ്ഥാനാര്ത്ഥിയുടെ ഭാര്യ എന്തിന് നന്ദി പറഞ്ഞു കൊണ്ട് പോസ്റ്റ് ഇട്ടു എന്ന് പലരും വിളിച്ചു ചോദിക്കുന്നു. ചോദിക്കാത്തവര്ക്കും ഇതേ സംശയം ഉണ്ട് ചോദിച്ചില്ലെന്നു മാത്രം. അതുകൊണ്ട് മറുപടി പറയാം.
വാര്ഡ് മെമ്പറുടെ പണി ഒരു ഔദ്യോഗിക സ്ഥാനത്തിരിക്കുന്ന ഒരാള്ക്ക് പറ്റിയതല്ല. കൃത്യമായ സമയവ്യവസ്ഥയില്ലാത്തപ്രത്യേകിച്ചൊരു ജോലിയുമില്ലാത്ത ഒരാള്ക്കുമാത്രമേ ഒരു വാര്ഡ് മെമ്പറായി തലങ്ങും വിലങ്ങും ഓടി നടക്കാന് കഴിയൂ. സജികുമാര് PSC ടെസ്റ്റ് എഴുതി ഇന്റര്വ്യൂവും കടന്ന് (ഒരു പാര്ട്ടിയുടേയും പിന്തുണയോടെയല്ല ) കുട്ടമ്പേരൂര് സര്വ്വീസ് സഹകരണ ബാങ്കിന്റെ സെക്രട്ടറിയായി കഴിഞ്ഞ 20 വര്ഷമായി സേവനമനുഷ്ഠിക്കുന്നു.
ചെങ്ങന്നൂര് താലൂക്കിലെ മികച്ച ബാങ്കിനും മികച്ച സെക്രട്ടറിക്കുമുള്ള അവാര്ഡ് കഴിഞ്ഞ 7 വര്ഷങ്ങളില് നേടിക്കഴിഞ്ഞു. ക്ലാസ്സ് 1 ബാങ്കായി ഇന്ന് ആ ബാങ്കിനെ മാറ്റിയെടുത്തത് അക്ഷീണമായ പ്രയത്നവും സംഘാടന മികവും കൊണ്ട് മാത്രമാണ്. അതാണ് ഒരു മെമ്പറായി മാറി തകര്ക്കാന് ശ്രമിച്ചത്. മാത്രമല്ല ഞങ്ങള് രണ്ടാളും 5 വര്ഷത്തിനുളളില് സര്വ്വീസില് നിന്ന് വിരമിക്കും. ഞാനായിരിക്കും മുമ്പേ വിരമിക്കുക. അദ്ദേഹത്തേക്കാള് എനിക്കായതുകൊണ്ടല്ല ബാങ്കുകാരുടെ പെന്ഷന് പ്രായം ഞങ്ങളേക്കാള് കൂടുതലായതു കൊണ്ടാണ്. പെന്ഷന് പറ്റിക്കഴിഞ്ഞാല് അപ്പോള് തന്നെ വിദേശത്തേക്ക് പറക്കാനാണ് എന്റെ ഉറച്ച തീരുമാനം. പക്ഷേ പഞ്ചായത്തും പിടിച്ച് നില്ക്കാനുദേശിക്കുന്ന ഇദ്ദേഹം ഒരിക്കലും ആ വഴിക്ക് വരില്ല. (ഇലക്ഷനു നില്ക്കരുതെന്ന് എത്ര നിര്ബന്ധിച്ചിട്ടും പാര്ട്ടിയുടെ തീരുമാനം എന്ന് പറഞ്ഞ് മനസ്സിലാ മനസോടെയാണ് നിന്നത് ).എന്തായാലും ഒരു effort ഉം കൂടാതെ എനിക്കാ സൗകര്യം ഒപ്പിച്ചു തന്നതിനാണ് ഞാന് നന്ദി പറഞ്ഞത്.
