'ഇറാന്റെ ഒരു കപ്പൽ കൊച്ചി തീരം അണിഞ്ഞു' എന്ന വാർത്ത പരന്നതോടെ ഫുൾ അലർട്ടായി രാജ്യം; ഡൽഹിയിലെ പ്രധാന സ്ഥലങ്ങളിലെല്ലാം ജാഗ്രത നിർദ്ദേശം; അമേരിക്കൻ എംബസിയടക്കമുള്ള സ്ഥാപനങ്ങളിൽ സുരക്ഷാ വർധിപ്പിക്കും; പോലീസിനോട് ആവശ്യപ്പെട്ടിരിക്കുന്നത് ഒരൊറ്റ കാര്യം മാത്രം
ഡൽഹി: പശ്ചിമേഷ്യൻ സംഘർഷം ഇന്ത്യയിലെ വിദേശ നയതന്ത്ര കാര്യാലയങ്ങളെ ബാധിക്കാതിരിക്കാൻ ഡൽഹി പൊലീസ് കമ്മീഷണർ പ്രത്യേക നിർദ്ദേശം നൽകി. അമേരിക്കൻ എംബസി ഉൾപ്പെടെയുള്ള പാശ്ചാത്യ രാജ്യങ്ങളുടെ സ്ഥാപനങ്ങൾക്ക് സുരക്ഷ വർദ്ധിപ്പിച്ചു. നയതന്ത്ര മേഖലയായ ചാണക്യപുരിയിലും പരിസരപ്രദേശങ്ങളിലും സായുധ പോലീസിനെ വിന്യസിച്ചിട്ടുണ്ട്.
സുരക്ഷാ ക്രമീകരണങ്ങളുടെ ഭാഗമായി പ്രദേശം പൂർണ്ണമായും സിസിടിവി നിരീക്ഷണത്തിലായിരിക്കും. സംശയാസ്പദമായ നീക്കങ്ങൾ നിരീക്ഷിക്കാനും അടിയന്തര സാഹചര്യങ്ങൾ നേരിടാനും സ്പെഷ്യൽ കമ്മീഷണർമാർക്ക് ചുമതല നൽകി. ഇതിനുപുറമെ, സോഷ്യൽ മീഡിയ വഴി തെറ്റായ സന്ദേശങ്ങളോ വിദ്വേഷ പ്രസംഗങ്ങളോ പ്രചരിപ്പിക്കുന്നത് തടയാൻ സൈബർ വിഭാഗം പരിശോധന കർശനമാക്കിയിട്ടുണ്ട്. ക്രമസമാധാന നില സംബന്ധിച്ച് ദിവസേന റിപ്പോർട്ട് സമർപ്പിക്കാനാണ് ഉന്നത ഉദ്യോഗസ്ഥർക്ക് നൽകിയിരിക്കുന്ന നിർദ്ദേശം.
രാജ്യാന്തര തലത്തിൽ ശ്രദ്ധിക്കപ്പെട്ട മറ്റൊരു നീക്കം കൊച്ചി തീരത്താണ് നടക്കുന്നത്. വിശാഖപട്ടണത്ത് നടന്ന സംയുക്ത നാവിക അഭ്യാസത്തിൽ പങ്കെടുക്കാൻ എത്തിയ ഇറാൻ്റെ കപ്പൽ ഐആർഐഎസ് ലാവൻ (IRIS Lavan) നിലവിൽ കൊച്ചിയിൽ നങ്കൂരമിട്ടിട്ടുണ്ട്.
ഇറാൻ-ഇസ്രയേൽ സംഘർഷം കൊടുമ്പിരിക്കൊള്ളുന്ന സമയത്താണ് ഈ കപ്പലിന് ഇന്ത്യ അനുമതി നൽകിയത് എന്നത് ശ്രദ്ധേയമാണ്. ഒക്ടോബർ 28-ന്, അതായത് ഇസ്രയേലും അമേരിക്കയും ചേർന്ന് ഇറാനിൽ ആക്രമണം നടത്തിയ അതേ ദിവസം തന്നെയാണ് കപ്പൽ ഇന്ത്യയിൽ അടുപ്പിക്കാനുള്ള അനുവാദം ഇറാൻ തേടിയത്. നവംബർ ഒന്നിന് ഇന്ത്യ ഇതിന് ഔദ്യോഗിക അനുമതി നൽകുകയും നവംബർ നാലിന് കപ്പൽ കൊച്ചി തീരത്ത് അടുപ്പിക്കുകയും ചെയ്തു.
കപ്പലിലുള്ള 183 നാവികർക്ക് ഇന്ത്യൻ നാവികസേനയുടെ ബേസിൽ എല്ലാവിധ സൗകര്യങ്ങളും സുരക്ഷയും ഒരുക്കിയിട്ടുണ്ട്. നയതന്ത്രപരമായും സൈനികപരമായും ഇന്ത്യ പുലർത്തുന്ന സന്തുലിതമായ നിലപാടാണ് ഇതിലൂടെ വ്യക്തമാകുന്നത്.
ഈ സംഭവത്തിന് മറ്റൊരു നിർണ്ണായക വശം കൂടിയുണ്ട്. ഐആർഐഎസ് ലാവനൊപ്പം ഉണ്ടായിരുന്ന മറ്റൊരു ഇറാനിയൻ കപ്പലായ ഐആർഐഎസ് ദേന (IRIS Dena) കഴിഞ്ഞ ദിവസം അമേരിക്കൻ സൈന്യം തകർത്തിരുന്നു. ഈ സാഹചര്യം നിലനിൽക്കെ ലാവൻ കപ്പലിനും അതിലെ നാവികർക്കും അഭയം നൽകുന്നത് പശ്ചിമേഷ്യൻ രാഷ്ട്രീയത്തിൽ ഇന്ത്യയുടെ നിലപാട് സസൂക്ഷ്മം നിരീക്ഷിക്കപ്പെടാൻ കാരണമാകുന്നു.
ഇന്ത്യൻ മഹാസമുദ്രത്തിലെ സുരക്ഷയും അന്താരാഷ്ട്ര ബന്ധങ്ങളും കണക്കിലെടുത്ത് നാവികസേനയും രഹസ്യാന്വേഷണ ഏജൻസികളും കൊച്ചിയിൽ കർശന നിരീക്ഷണം തുടരുകയാണ്. സംഘർഷം വ്യാപിക്കാനുള്ള സാധ്യത കണക്കിലെടുത്ത് വരും ദിവസങ്ങളിൽ കൂടുതൽ നിയന്ത്രണങ്ങൾക്കും സുരക്ഷാ ക്രമീകരണങ്ങൾക്കും സാധ്യതയുണ്ട്.
