യാത്രക്കാരന്റെ ബാഗില്‍ ഉണ്ടായിരുന്ന പോര്‍ട്ടബിള്‍ ബാറ്ററിക്ക് തീപിടിച്ചു; ഫ്‌ളോറിഡയില്‍ ഡെല്‍റ്റ എയര്‍ ലൈന്‍സ് വിമാനത്തിന് അടിയന്തര ലാന്‍ഡിംഗ്; തീ അണച്ചെങ്കിലും പുകപകര്‍ന്നതോടെ അടിയന്തര നടപടി
യാത്രക്കാരന്റെ ബാഗില്‍ ഉണ്ടായിരുന്ന പോര്‍ട്ടബിള്‍ ബാറ്ററിക്ക് തീപിടിച്ചു
ഫ്‌ളോറിഡ: ഒരു യാത്രക്കാരന്റെ ബാഗില്‍ ഉണ്ടായിരുന്ന പോര്‍ട്ടബിള്‍ ബാറ്ററിക്ക് തീപിടിച്ചതിനെത്തുടര്‍ന്ന് കഴിഞ്ഞ ദിവസം അമേരിക്കയിലെ ഫ്‌ളോറിഡയിലെ ഫോര്‍ട്ട് മയേഴ്‌സില്‍ ഡെല്‍റ്റ എയര്‍ ലൈന്‍സ് വിമാനത്തിന് അടിയന്തര ലാന്‍ഡിംഗ് നടത്തി. 185 യാത്രക്കാരും ആറ് ക്രൂ അംഗങ്ങളുമായിരുന്നു വിമാനത്തിലുണ്ടായിരുന്നത്.
അമേരിക്കയിലെ പ്രാദേശിക സമയം രാവിലെ 8:48 നാണ് വിമാനം അടിയന്തര ലാന്‍ഡിംഗ് നടത്തിയത്. അറ്റ്‌ലാന്റയില്‍ നിന്നുള്ള ഡെല്‍റ്റ 1334 വിമാനം, ഫോര്‍ട്ട് ലോഡര്‍ഡെയ്ല്‍ അന്താരാഷ്ട്ര വിമാനത്താവളത്തിലേക്ക് പോകുമ്പോഴാണ് തീപിടുത്തമുണ്ടായതെന്ന് ഡെല്‍റ്റ വക്താവ് പറഞ്ഞു. യാത്രക്കാരന്റെ പോര്‍ട്ടബിള്‍ ബാറ്ററിക്ക് തീപിടിക്കുകയും ഇത് ശ്രദ്ധയില്‍പ്പെട്ട ഫ്‌ളൈറ്റ് അറ്റന്‍ഡന്റുകള്‍ വേഗത്തില്‍ തീ അണയ്ക്കുകയും ചെയ്തതായി കമ്പനി പ്രസ്താവനയില്‍ പറഞ്ഞു.
തീ അണച്ചെങ്കിലും വിമാനത്തില്‍ പുക പടരുകയായിരുന്നു. തുടര്‍ന്നാണ് വിമാനം അടിയന്തര ലാന്‍ഡിംഗിലേക്ക് നീങ്ങിയത്. പൈലറ്റ് ഇക്കാര്യം വിമാനത്താവള അധികൃതരെ അറിയിക്കുകയായിരുന്നു. ഉടന്‍ തന്നെ വിമാനം ഫോര്‍ട്ട് മയേഴ്‌സിലെ സൗത്ത് വെസ്റ്റ് ഫ്‌ളോറിഡ അന്താരാഷ്ട്ര വിമാനത്താവളത്തിലേക്ക് തിരിച്ചുവിടുകയായിരുന്നു. യാത്രക്കാര്‍ക്ക് ഉണ്ടായ ബുദ്ധിമുട്ടിന് ഉപഭോക്താക്കളോട് ക്ഷമ ചോദിക്കുന്നതായി ഡെല്‍റ്റ എയര്‍ലൈന്‍സിന്റെ പ്രസ്താവനയില്‍ പറഞ്ഞു.
അതേസമയം സംഭവത്തെക്കുറിച്ച് അന്വേഷിക്കുകയാണെന്ന് ഫെഡറല്‍ ഏവിയേഷന്‍ അഡ്മിനിസ്‌ട്രേഷനും വ്യക്തമാക്കിയിട്ടുണ്ട്. ഈ വര്‍ഷം ഇതുവരെ ലിഥിയം ബാറ്ററികള്‍ ഉള്‍പ്പെട്ട 34 അപകടങ്ങള്‍ ഉണ്ടായിട്ടുണ്ടെന്നും അതില്‍ 11 എണ്ണം ബാറ്ററി പായ്ക്കുകള്‍ മൂലമാണെന്നുമാണ് അധികൃതര്‍ വെളിപ്പെടുത്തിയത്.
പ്രതിമാസം ശരാശരി ആറ് സംഭവങ്ങളാണ ്ഈ വര്‍ഷം ഉണ്ടായതെങ്കില്‍ കഴിഞ്ഞ വര്‍ഷം ഇത് ഏഴായിരുന്നു. 2015 മുതല്‍ 2024 വരെ അമേരിക്കയില്‍ വിമാനങ്ങളില്‍ ലിഥിയം ബാറ്ററി തീപിടുത്തങ്ങളുടെ എണ്ണം വന്‍തോതില്‍ വര്‍ദ്ധിച്ചതായി എഫ്.എ.എയുടെ കണക്കുകള്‍ വ്യക്തമാക്കുന്നു.
ലിഥിയം-അയണ്‍ ബാറ്ററി തീപിടുത്തങ്ങളെക്കുറിച്ചുള്ള വര്‍ദ്ധിച്ചുവരുന്ന ആശങ്കകള്‍ കാരണം, സൗത്ത് വെസ്റ്റ് എയര്‍ലൈന്‍സ് മെയ് മാസത്തില്‍ ഉപഭോക്താക്കളോട് അവരുടെ പോര്‍ട്ടബിള്‍ ചാര്‍ജറുകള്‍ എല്ലാവര്‍ക്കും കാണാന്‍ കഴിയുന്ന വിധത്തില്‍ സൂക്ഷിക്കാന്‍ ആവശ്യപ്പെട്ടിരുന്നു. സിംഗപ്പൂര്‍ എയര്‍ലൈന്‍സ് പവര്‍ ബാങ്കുകള്‍ വിമാനത്തിനുള്ളില്‍ ഉപയോഗിക്കുന്നതിനോ ചാര്‍ജ് ചെയ്യുന്നതിനോ പൂര്‍ണ്ണമായും വിലക്ക് ഏര്‍പ്പെടുത്തിയിട്ടുണ്ട്.
