തിരുവനന്തപുരം: സംസ്ഥാനത്ത് എച്ച്.ഐ.വി. ബാധിതരുടെ എണ്ണത്തിൽ ആശങ്കാജനകമായ വർധന രേഖപ്പെടുത്തി. ആരോഗ്യവകുപ്പിൻ്റെ ഏറ്റവും പുതിയ കണക്കുകൾ പ്രകാരം തിരുവനന്തപുരം, പാലക്കാട് ജില്ലകളിൽ രോഗബാധിതരുടെ എണ്ണം അയ്യായിരം കടന്നു. 2024-25 വർഷത്തിൽ സംസ്ഥാനത്ത് ആകെ 1213 പുതിയ കേസുകളാണ് റിപ്പോർട്ട് ചെയ്തത്.

ഏറ്റവും കൂടുതൽ രോഗബാധിതരുള്ളത് പാലക്കാട് ജില്ലയിലാണ്—5203 പേർ. തൊട്ടുപിന്നിൽ 5094 കേസുകളുമായി തിരുവനന്തപുരവുമുണ്ട്. കഴിഞ്ഞ ഒരു വർഷത്തിനിടെ തിരുവനന്തപുരത്ത് 123 പേർക്കും പാലക്കാട് 42 പേർക്കും പുതുതായി രോഗം സ്ഥിരീകരിച്ചു. 2647 രോഗികളുള്ള തൃശൂർ ജില്ലയും അതീവജാഗ്രതാ പട്ടികയിലുണ്ട്.

യുവാക്കൾക്കിടയിൽ രോഗബാധ വർധിക്കുന്നതാണ് ഏറ്റവും ആശങ്കാജനകമായ കണ്ടെത്തൽ. ഈ വർഷം രോഗം സ്ഥിരീകരിച്ചവരിൽ 197 പേർ 19-നും 25-നും ഇടയിൽ പ്രായമുള്ളവരാണ്. 2021-22 കാലയളവിൽ ഈ പ്രായപരിധിയിൽ 76 പേർക്ക് മാത്രമായിരുന്നു രോഗബാധയുണ്ടായിരുന്നത്. ലഹരിമരുന്ന് ഉപയോഗത്തിനായി ഒരേ സിറിഞ്ച് പങ്കുവെക്കുന്നതും സുരക്ഷിതമല്ലാത്ത ലൈംഗിക ബന്ധങ്ങളുമാണ് രോഗവ്യാപനത്തിൻ്റെ പ്രധാന കാരണങ്ങളായി വിലയിരുത്തപ്പെടുന്നത്.

സാഹചര്യം കണക്കിലെടുത്ത് പ്രതിരോധ പ്രവർത്തനങ്ങൾ ഊർജിതമാക്കിയതായി ആരോഗ്യവകുപ്പ് അറിയിച്ചു. നാഷണൽ സർവീസ് സ്കീമുമായി സഹകരിച്ച് ഹയർസെക്കൻഡറി സ്കൂളുകളിലും കോളേജുകളിലും 'സമഗ്ര ആരോഗ്യ സുരക്ഷ യുവാക്കളിലൂടെ (യുവജാഗരൺ)' എന്ന പേരിൽ ബോധവൽക്കരണ ക്യാമ്പയിൻ ശക്തമാക്കും. എച്ച്.ഐ.വി. നിർണയത്തിനുള്ള ഏലിസ, വെസ്റ്റേൺബ്ലോട്ട് തുടങ്ങിയ പരിശോധനകളും ചികിത്സാ സൗകര്യങ്ങളും സംസ്ഥാനത്തെ മെഡിക്കൽ കോളേജുകൾ ഉൾപ്പെടെയുള്ള ആരോഗ്യ കേന്ദ്രങ്ങളിൽ ലഭ്യമാണ്.

എച്ച് ഐ വിആരോഗ്യവകുപ്പ്തിരുവനന്തപുരംപാലക്കാട്

സ്വന്തം ലേഖകൻ