ഇന്ത്യന് വംശജര്ക്ക് ട്രംപിനെ മടുത്തു! രണ്ടാം വരവില് വന് തിരിച്ചടി; 71 ശതമാനം പേരും എതിര്; കുടിയേറ്റ നയവും വിവേചനവും വില്ലനാകുന്നു; ഇന്ത്യയുമായുള്ള ബന്ധത്തിലും അതൃപ്തി; വംശീയ അധിക്ഷേപം കൂടുന്നു; കാര്ണഗി സര്വ്വേയിലെ കണ്ടെത്തലുകള് ഞെട്ടിക്കുന്നത്
ഇന്ത്യന് വംശജര്ക്ക് ട്രംപിനെ മടുത്തു!
വാഷിങ്ടണ്: അമേരിക്കന് പ്രസിഡന്റ് ഡൊണാള്ഡ് ട്രംപിന്റെ രണ്ടാം ഊഴത്തിലെ പ്രവര്ത്തനങ്ങളില് 71 ശതമാനം ഇന്ത്യന് വംശജരും അതൃപ്തരാണെന്ന് കാര്ണഗി (Carnegie) സര്വ്വേ റിപ്പോര്ട്ട്. 2026-ലെ ഇന്ത്യന് അമേരിക്കന് ആറ്റിറ്റിയൂഡ് സര്വ്വേ (IAAS) പ്രകാരം, സര്വ്വേയില് പങ്കെടുത്ത 1,000 പേരില് 29 ശതമാനം പേര് മാത്രമാണ് ട്രംപിന്റെ പ്രവര്ത്തനങ്ങളെ അനുകൂലിച്ചത്.
പ്രധാന കണ്ടെത്തലുകള്
ട്രംപിന്റെ കുടിയേറ്റ നയത്തെ 64 ശതമാനം പേരും, ആഭ്യന്തര സാമ്പത്തിക നയത്തെ 68 ശതമാനം പേരും, വ്യാപാര-നികുതി ഉള്പ്പെടെയുള്ള അന്താരാഷ്ട്ര സാമ്പത്തിക നയത്തെ 70 ശതമാനം പേരും എതിര്ക്കുന്നു. ഇന്ത്യയുമായുള്ള ബന്ധം ട്രംപ് കൈകാര്യം ചെയ്യുന്ന രീതിയില് 55 ശതമാനം പേര്ക്ക് അതൃപ്തിയുണ്ട്. 20 ശതമാനം പേര് മാത്രമാണ് ഇതിനെ അനുകൂലിച്ചത്.
ഇന്ത്യന് വംശജര്ക്കിടയില് ഡെമോക്രാറ്റിക് പാര്ട്ടിയോടുള്ള ആഭിമുഖ്യം കുറയുന്നതായി സര്വ്വേ സൂചിപ്പിക്കുന്നു. ഡെമോക്രാറ്റിക് പിന്തുണ 46 ശതമാനമായി കുറഞ്ഞപ്പോള് റിപ്പബ്ലിക്കന് പാര്ട്ടിക്ക് 19 ശതമാനം പേരുടെ പിന്തുണയുണ്ട്. 29 ശതമാനം പേര് സ്വതന്ത്ര നിലപാടുകാരാണ്.
സമൂഹത്തില് വിവേചനം നേരിടുന്നുണ്ടെന്ന് പകുതിയോളം പേര് അഭിപ്രായപ്പെട്ടു. തൊലിനിറം, രാജ്യം, മതം എന്നിവയുടെ പേരില് വിവേചനം അനുഭവിക്കുന്നതായി ഇവര് പറയുന്നു. 2025-ന്റെ തുടക്കം മുതല് നാലിലൊരാള് വംശീയ അധിക്ഷേപത്തിന് ഇരയായിട്ടുണ്ട്. പകുതിയോളം പേര് സോഷ്യല് മീഡിയ വഴി വംശീയമായ ഉള്ളടക്കങ്ങള് നേരിടുന്നു.
പണപ്പെരുപ്പവും വിലക്കയറ്റവുമാണ് തങ്ങളെ ബാധിക്കുന്ന ഏറ്റവും വലിയ പ്രശ്നമെന്ന് 21 ശതമാനം പേര് പറഞ്ഞു. തൊഴിലും സാമ്പത്തികാവസ്ഥയുമാണ് രണ്ടാമത്തെ പ്രധാന വിഷയം.
മറ്റ് രാഷ്ട്രീയ സംഭവങ്ങള്
ന്യൂയോര്ക്ക് സിറ്റി മേയറായി സൊഹ്റാന് മംദാനി തിരഞ്ഞെടുക്കപ്പെട്ടതിനെ 68 ശതമാനം പേര് ആവേശത്തോടെയാണ് കാണുന്നത്. എന്നാല്, വൈസ് പ്രസിഡന്റ് ജെ.ഡി വാന്സ് മതം, വിവാഹം എന്നിവയെക്കുറിച്ച് നടത്തിയ പരാമര്ശങ്ങള് ഇന്ത്യന് വംശജര്ക്കിടയില് നെഗറ്റീവ് പ്രതികരണമാണുണ്ടാക്കിയത്.
വിവേചനത്തെക്കുറിച്ചുള്ള ആശങ്കകള് നിലനില്ക്കുന്നുണ്ടെങ്കിലും, ഭൂരിഭാഗം ഇന്ത്യന് വംശജരും അമേരിക്കയിലെ സാമ്പത്തിക അവസരങ്ങളില് ഇപ്പോഴും വിശ്വാസമര്പ്പിക്കുന്നു. 2025 നവംബര് 25-നും 2026 ജനുവരി 6-നും ഇടയിലാണ് ഈ സര്വ്വേ നടത്തിയത്.
