ഒരു തരി കനലിനെ കടക്ക് പുറത്തെന്ന് കാണിച്ച തെരെഞ്ഞെടുപ്പ് ഫലങ്ങൾ; തലസ്ഥാനത്തും കൊല്ലത്തും അടക്കം പാർട്ടിയെ തന്നെ ഒന്നടങ്കം ഞെട്ടിച്ച് തോൽവി; തിരിച്ചടി മറികടക്കാൻ എൽഡിഎഫിന് മുന്നിൽ ഇനിയെന്ത്?
തിരുവനന്തപുരം: കേരള തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിൽ തിരുവനന്തപുരം, കൊല്ലം കോർപ്പറേഷനുകളിലടക്കം പാർട്ടിക്ക് വലിയ ആഘാതമേൽപ്പിച്ച കനത്ത പരാജയത്തിന്റെ കാരണങ്ങൾ വിശദമായി വിലയിരുത്തുന്നതിനായി എൽ.ഡി.എഫ് നേതൃയോഗം ചൊവ്വാഴ്ച ചേരും. മുന്നണിയുടെ പ്രതീക്ഷകളെ അസ്ഥാനത്താക്കിയ കനത്ത തിരിച്ചടിയുടെ പശ്ചാത്തലത്തിൽ, തിരുത്തൽ നടപടികൾ എന്തൊക്കെ വേണമെന്ന് യോഗം ചർച്ച ചെയ്യും.
ഈ പരാജയത്തിന്റെ വ്യാപ്തിയിൽ മുന്നണിയിൽ തിരുത്തൽ വേണമെന്ന ശക്തമായ ആവശ്യം സി.പി.ഐ ഇതിനകം തന്നെ മുന്നോട്ട് വെച്ചിട്ടുണ്ട്. അടിത്തറയിളക്കിയ ഈ തിരിച്ചടിയെ അതീവ ഗൗരവത്തോടെ കണ്ട്, അതിജീവനത്തിനായി അടിയന്തര നടപടികൾ സ്വീകരിക്കണമെന്നാണ് സി.പി.ഐ. നേതൃത്വത്തിന്റെ ആവശ്യം. ഇതുകൂടാതെ, മുന്നണിയിലേക്ക് പുതുതായി കടന്നുവന്ന ജോസ് കെ. മാണിയുടെ വിഭാഗം തിരഞ്ഞെടുപ്പ് ഫലങ്ങളിൽ എന്ത് സ്വാധീനമാണ് ചെലുത്തിയത് എന്ന വിലയിരുത്തലും ചൊവ്വാഴ്ചത്തെ യോഗത്തിൽ നിർണ്ണായകമാകും.
തിരഞ്ഞെടുപ്പ് ഫലം കൂടുതൽ വിശദമായി പരിശോധിക്കുന്നതിനായി സി.പി.എമ്മിന്റെയും സി.പി.ഐയുടെയും നേതൃയോഗങ്ങൾ ഇതിന് മുന്നോടിയായി തിങ്കളാഴ്ച (നാളെ) ചേരുന്നുണ്ട്. സി.പി.എം സംസ്ഥാന സെക്രട്ടേറിയറ്റും സി.പി.ഐയുടെ സംസ്ഥാന സെക്രട്ടേറിയറ്റ്, സംസ്ഥാന എക്സിക്യൂട്ടീവ് യോഗങ്ങളുമാണ് തിങ്കളാഴ്ചത്തെ അജണ്ടയിലുള്ളത്. ഈ യോഗങ്ങളിലെ വിലയിരുത്തലുകൾ ചൊവ്വാഴ്ചത്തെ എൽ.ഡി.എഫ് യോഗത്തിന്റെ തീരുമാനങ്ങളെ സ്വാധീനിക്കുന്നതിൽ പ്രധാന പങ്ക് വഹിക്കും.
ഇടത് കോട്ടയായി കാൽനൂറ്റാണ്ടിലേറെക്കാലം ഉറച്ചുനിന്ന കൊല്ലം കോർപ്പറേഷൻ കൈവിട്ടുപോയത് എൽ.ഡി.എഫിനെ വലിയ പ്രതിരോധത്തിലാക്കിയിരിക്കുകയാണ്. ഈ കനത്ത തോൽവി അതീവ ഗൗരവത്തോടെയാണ് മുന്നണി പരിശോധിക്കുന്നത്. കോർപ്പറേഷനിലെ ഭരണ നേട്ടങ്ങളും സംസ്ഥാന സർക്കാരിന്റെ ക്ഷേമ പ്രവർത്തനങ്ങളും പ്രചാരണ വിഷയമാക്കിയ ഇടതുമുന്നണിക്ക് പക്ഷേ, വോട്ടർമാരെ തൃപ്തിപ്പെടുത്തി വോട്ട് ഉറപ്പിക്കാൻ കഴിഞ്ഞില്ലെന്ന് ഫലം തെളിയിച്ചു. കഴിഞ്ഞ കൗൺസിലിൽ 38 സീറ്റുകൾ ഉണ്ടായിരുന്ന എൽ.ഡി.എഫ് ഇത്തവണ വെറും 16 ഡിവിഷനുകളിൽ മാത്രമായി ഒതുങ്ങി. എന്നാൽ, കഴിഞ്ഞ കൗൺസിലിൽ വെറും 10 അംഗങ്ങൾ മാത്രമുണ്ടായിരുന്ന യു.ഡി.എഫ് 27 പേരുടെ പിൻബലത്തോടെ കോർപ്പറേഷൻ ഭരണം പിടിച്ചെടുത്തു. ആറ് സീറ്റുകൾ മാത്രം ഉണ്ടായിരുന്ന ബി.ജെ.പി ഇരട്ടിയിലധികം ഡിവിഷനുകൾ പിടിച്ചെടുത്തുവെന്നതും കൊല്ലത്തെ തിരഞ്ഞെടുപ്പ് ഫലത്തിന്റെ പ്രത്യേകതയാണ്.
നഗരസഭകളിലും ജില്ലാ പഞ്ചായത്തുകളിലും കാര്യമായ തിരിച്ചടി ഉണ്ടായില്ലെന്ന് മുന്നണി അവകാശപ്പെടുന്നുണ്ടെങ്കിലും, കരുനാഗപ്പള്ളി നഗരസഭ കൈവിട്ടുപോയത് എൽ.ഡി.എഫിന് വലിയ ആഘാതമാണ് സൃഷ്ടിച്ചത്. കരുനാഗപ്പള്ളി നഗരസഭയിൽ യു.ഡി.എഫിന് ഭരണം പിടിച്ചെടുക്കാൻ വഴിയൊരുക്കിയത് പ്രാദേശിക തലത്തിൽ നിലനിന്നിരുന്ന വിഭാഗീയതയും സംഘടനാപരമായ പോരായ്മകളുമാണെന്നാണ് വിലയിരുത്തൽ. ഈ വിഭാഗീയ പ്രശ്നങ്ങൾ എത്രത്തോളം തിരഞ്ഞെടുപ്പ് ഫലത്തെ ബാധിച്ചു എന്നതും നേതൃയോഗം പ്രത്യേകം പരിശോധിക്കും.
