'എന്റെ പെങ്ങള്‍ അവിടെനിന്ന് കരഞ്ഞിട്ടാണല്ലോ ഇറങ്ങി പോയത്; വീട്ടിലെ സ്ത്രീകളോട് മാന്യമായി പെരുമാറാന്‍ അറിയില്ലെങ്കില്‍ അടിച്ചു മോന്ത പൊളിക്കും': പഞ്ചായത്ത് സെക്രട്ടറിയെ മുഹമ്മദ് മുഹ്‌സിന്‍ എംഎല്‍എ ഭീഷണിപ്പെടുത്തുന്ന ശബ്ദസന്ദേശം പുറത്ത്; മറുപടിയുമായി സെക്രട്ടറി
പഞ്ചായത്ത് സെക്രട്ടറിയെ മുഹമ്മദ് മുഹ്‌സിന്‍ എംഎല്‍എ ഭീഷണിപ്പെടുത്തുന്ന ശബ്ദസന്ദേശം പുറത്ത്
പട്ടാമ്പി: സ്ത്രീകളോട് മോശമായി പെരുമാറിയാല്‍ മോന്ത അടിച്ചു പൊളിക്കുമെന്ന് പഞ്ചായത്ത് സെക്രട്ടറിയെ ഫോണില്‍ വിളിച്ച് ഭീഷണിപ്പെടുത്തി പട്ടാമ്പി എം എല്‍ എ മുഹമ്മദ് മുഹ്‌സിന്‍. തന്റെ സഹോദരിയെ അപമാനിച്ചെന്ന് ആരോപിച്ചാണ് ഓങ്ങല്ലൂര്‍ പഞ്ചായത്ത് സെക്രട്ടറിയെ ഫോണില്‍ വിളിച്ച് എംഎല്‍എ ഭീഷണിപ്പെടുത്തിയത്.
വിവാഹം രജിസ്റ്റര്‍ ചെയ്യുന്നതുമായി ബന്ധപ്പെട്ട ആവശ്യത്തിനാണ് എം എല്‍ എയുടെ സഹോദരി ഓങ്ങല്ലൂര്‍ പഞ്ചായത്ത് സെക്രട്ടറി ജഗദീഷിന് മുമ്പാകെയെത്തിയത്. എന്നാല്‍ വിദ്യാഭ്യാസ യോഗ്യതയുടെ പേരില്‍ സെക്രട്ടറി അപമാനിച്ചു എന്നും അതുകൊണ്ടാണ് മോശം ഭാഷ ഉപയോഗിക്കേണ്ടി എം എല്‍ എ പറയുന്നത്. വീട്ടിലെ സ്ത്രീകളോട് മാന്യമായി പെരുമാറാന്‍ അറിയില്ലെങ്കില്‍ മോന്ത അടിച്ച് പൊളിക്കുമെന്നും നേരിട്ട് വരാന്‍ അറിയാമെന്നും എം എല്‍ എ പറയുന്ന ശബ്ദ സന്ദേശം പുറത്തുവന്നിട്ടുണ്ട്.
''തനിക്ക് എന്നോട് എന്തെങ്കിലും പ്രശ്‌നമുണ്ടോ ? വീട്ടിലെ സ്ത്രീകളോട് മോശമായി പെരുമാറി. വളരെ മോശമായിട്ടാണല്ലോ താന്‍ പെരുമാറിയത്. എന്റെ പെങ്ങള്‍ അവിടെനിന്ന് കരഞ്ഞിട്ടാണല്ലോ ഇറങ്ങിപോയത്. ഞാന്‍ താങ്കളെ ഒരു റെക്കമന്‍ന്റേഷനും വിളിച്ചിട്ടില്ല. തനിക്ക് എന്തെങ്കിലും രാഷ്ട്രീയമായി എന്നോട് പ്രശ്‌നമുണ്ടെങ്കില്‍ വീട്ടിലെ സ്ത്രീകളോട് മാന്യമായി പെരുമാറാന്‍ അറിയില്ലെങ്കില്‍ അടിച്ചു മോന്ത പൊളിക്കും'' -സംഭാഷണം ഇങ്ങനെ
താന്‍ നിയമസഭയില്‍ ആയതുകൊണ്ടാണ് ഇപ്പോള്‍ വരാത്തതെന്നും മുഹ്‌സിന്‍ ഫോണിലൂടെ പറയുന്നുണ്ട്. വനിതാ അംഗങ്ങളോടും പഞ്ചായത്ത് സെക്രട്ടറി മോശമായി സംസാരിച്ചെന്നതടക്കമുള്ള കാര്യങ്ങളും എംഎല്‍എ ഫോണിലൂടെ വിവരിക്കുന്നുണ്ട്. ജനുവരി 20 നാണ് സംഭവം നടന്നത്. സെക്രട്ടറിക്ക് സ്ഥലംമാറ്റം കിട്ടിയ ശേഷമാണ് ഓഡിയോ ക്ലിപ്പ് പുറത്ത് വിട്ടത്. സെക്രട്ടറിക്കെതിരെ നിരന്തരം പരാതികള്‍ വന്നെന്നും സ്ത്രീകളോടടക്കം മോശമായി പെരുമാറിയതിനാലാണ് ഈ ഭാഷയില്‍ സംസാരിച്ചതെന്നുമാണ് എം എല്‍ എ വിശദീകരിക്കുന്നത്. താന്‍ ആരാണെന്നും എങ്ങനെയാണ് പെരുമാറിയതെന്നും നല്ല ബോധ്യമുണ്ടെന്ന് ആയിരുന്നു പഞ്ചായത്ത് സെക്രട്ടറി നല്‍കിയ മറുപടി.
