ഒരിടത്ത് നാരാങ്ങാ വെള്ളം കുടി, മറ്റൊരിടത്ത് വഞ്ചനക്കെതിരെ മുദ്രാവാക്യം വിളിയും! മുനമ്പം സമരം ഒരു കൂട്ടര്‍ അവസാനിപ്പിച്ചപ്പോള്‍ മുദ്രാവാക്യം വിളിച്ചു പുതിയ സമരം ആരംഭിച്ചു ഒരു വിഭാഗം സമരക്കാര്‍; ഭൂമി പ്രശ്‌നത്തിന് ശാശ്വത പരിഹാരം ഉണ്ടാകും വരെ സമരമെന്ന് നാട്ടുകാരുടെ പ്രഖ്യാപനം; റെവന്യൂ വകുപ്പിന്റെ ഉത്തരവുമായി മുന്നോട്ടു പോകുമെന്ന് മന്ത്രി കെ രാജന്‍
ഒരിടത്ത് നാരാങ്ങാ വെള്ളം കുടി, മറ്റൊരിടത്ത് വഞ്ചനക്കെതിരെ മുദ്രാവാക്യം വിളിയും!
കൊച്ചി: മുനമ്പം സമരമുന്നണി രണ്ടായി പിളര്‍ന്നു. ഇന്ന് സമരം അവസാനിപ്പിച്ചു കൊണ്ട് ഒരു വിഭാഗം നിലപാട് സ്വീകരിച്ചപ്പോള്‍ മറുവശത്ത് ഒരു കൂട്ടര്‍ പുതിയ സമരപന്തലില്‍ സമരം തുടര്‍ന്നു. മുനമ്പം സമരം അവസാനിപ്പിക്കുന്നത് വഞ്ചനയാണെന്ന് പറഞ്ഞ് മുദ്രാവാക്യം വിളിച്ചുകൊണ്ടാണ് പുതിയ സമരപ്പന്തലില്‍ സമരം ആരംഭിച്ചിരിക്കുകയാണ് ഒരു വിഭാഗം. നിലവില്‍ സമരം അവസാനിപ്പിക്കുന്നത് വഞ്ചനാപരമാണെന്നാണ് ഇവരുടെ വാദം.
414 ദിവസമായി സമരം നടക്കുന്ന വേദിയില്‍ നിന്ന് ബിജെപി അനുകൂലികളായ നാട്ടുകാര്‍ പുതിയ സമരത്തിലേക്ക് ഇറങ്ങുകയാണ് ഉണ്ടായത്. അതേസമയം ബിജപെി അനുകുലികളല്ല, നാട്ടുകാരാണ് തങ്ങളെന്നാണ് ഇവരുടെ അവാശവാദം. ഭൂമി പ്രശ്‌നത്തിന് ശാശ്വത പരിഹാരം ഉണ്ടാകും വരെ സമരമെന്നാണ് അവരുടെ പ്രഖ്യാപനം. പള്ളിക്ക് പുറത്ത് ഒരുക്കിയ വേദിയില്‍ നിലവില്‍ സമരം തുടങ്ങിയിട്ടുണ്ട്. അതേസമയം ഒരു വിഭാഗം മന്ത്രിമാരുടെ സാന്നിധ്യത്തില്‍ സമരം അവസാനിപ്പിച്ചു.
സമരക്കാര്‍ക്ക് നാരങ്ങളാവെള്ളം നല്‍കിയാണ് റവന്യൂ മന്ത്രി കെ രാജന്‍, നിയമമന്ത്രി പി രാജീവ് എന്നിവര്‍ സമരം അവസാനിപ്പിച്ചത്. സര്‍ക്കാര്‍ നല്‍കിയ ഉറപ്പുകളില്‍ വിശ്വാസമുണ്ടെന്ന് പറഞ്ഞുകൊണ്ടാണ് സമരസമിതി സമരം അവസാനിപ്പിക്കുന്നത്. ഭൂമി പ്രശ്‌നത്തിന് ശാശ്വത പരിഹാരം ഉണ്ടാകും വരെ സമരമെന്ന് ഇവര്‍ പ്രഖ്യാപിച്ചു. വഖഫ് രജിസ്റ്ററിയില്‍ ഇപ്പോഴും മുനമ്പത്തെ ഭൂമി കിടക്കുന്നുണ്ടെന്നും നിയമനടപടിയിലൂടെ അത് നീക്കം ചെയ്യാതെ സമരം അവസാനിപ്പിക്കുന്നതാണ് പുതിയ സമരക്കാരുടെ പ്രതിഷേധത്തിന് കാരണം.
ഹൈക്കോടതി ഉത്തരവോടെ കുടുംബങ്ങള്‍ക്ക് കരമടയ്ക്കാന്‍ സാധിച്ചിരുന്നു. ഭൂമി പോക്കുവരവിനും വഴിയൊരുങ്ങിയെന്നാണ് കരുതുന്നത്. ഇതിനെ തുടര്‍ന്നാണ് നിലവില്‍ ഭൂരിപക്ഷം പേരും പങ്കാളികളായിട്ടുള്ള ഭൂസംരക്ഷണ സമിതി സമരമവസാനിപ്പിക്കാന്‍ തീരുമാനിച്ചത്. ഇനി ജുഡീഷ്യല്‍ കമ്മീഷന്റെ പ്രശ്‌നപരിഹാരവും വഖഫ് ട്രൈബ്യൂണലിലെ തീര്‍പ്പിനുമായാണ് മുനമ്പം നിവാസികള്‍ കാത്തിരിക്കുന്നത്.
വഖഫ് ബോര്‍ഡ് അവകാശവാദം ഉന്നയിച്ച ഭൂമിയിലെ താമസക്കാര്‍ക്ക് വ്യവസ്ഥകളോടെ ഭൂനികുതി അടയ്ക്കാമെന്നായിരുന്നു ഹൈക്കോടതി ഉത്തരവ്. വഖഫ് ബോര്‍ഡിന്റെ ആസ്തിക്കണക്കില്‍ നിന്ന് വിവാദ ഭൂമി പൂര്‍ണമായും ഒഴിവാക്കും വരെ സമരം തുടരണമെന്ന ആവശ്യവും ഒരു വിഭാഗം സമരക്കാര്‍ നേരത്തെ ഉന്നയിച്ചിരുന്നെങ്കിലും കോര്‍ കമ്മിറ്റി യോഗത്തില്‍ സമരം അവസാനിപ്പിക്കാനാണ് അന്തിമ തീരുമാനമെടുത്തത്. കഴിഞ്ഞ ദിവസമാണ് കോര്‍ കമ്മിറ്റി യോഗം നടന്നത്. മുനമ്പം ജനതയെ കുടിയിറക്കില്ലെന്ന മുഖ്യമന്ത്രിയുടെ ഉറപ്പ് പാലിക്കപ്പെട്ടെന്നാണ് കഴിഞ്ഞ ദിവസം മന്ത്രി പി.രാജീവ് അവകാശപ്പെട്ടത്.
സമര സമിതി കണ്‍വീനര്‍ ജോസഫ് ബെന്നിയെ തദ്ദേശ തെരഞ്ഞെടുപ്പില്‍ യുഡിഎഫ് സ്ഥാനാര്‍ഥിയായി മല്‍സരിപ്പിക്കാനുളള ചര്‍ച്ചകള്‍ കോണ്‍ഗ്രസ് നേതാക്കള്‍ നടത്തിയിരുന്നു. ഈ വിഷയമടക്കം ഉന്നയിച്ച് സമര സമിതിയുടെ ഭാഗമായി പ്രവര്‍ത്തിച്ച ബിജെപി അനുകൂലികളില്‍ ചിലര്‍ സമര സമിതിയില്‍ ഭിന്നാഭിപ്രായം രേഖപ്പെടുത്തിയിരുന്നു. സമര സമിതിയിലെ രാഷ്ട്രീയ അഭിപ്രായ ഭിന്നതകള്‍ രൂക്ഷമാകുന്നതിനിടെയാണ് മുനമ്പം ഭൂസംരക്ഷണ സമിതി സമരം അവസാനിപ്പിക്കുന്നത്.
രാജ്യത്ത് തന്നെ ചര്‍ച്ചയായ രാഷ്ട്രീയ സമരമായി മാറിയ മുനമ്പം ഭൂസമരത്തില്‍ ഇതുവരെ രാഷ്ട്രീയഭിന്നതകള്‍ കാര്യമായി പ്രകടമായിരുന്നില്ല. എന്നാല്‍, സമരം അവസാനിപ്പിക്കുന്ന ഘട്ടത്തിലാണിപ്പോള്‍ ഭിന്നത ഉയരുന്നത്. സമരസമിതി നേതൃത്വം സംസ്ഥാന സര്‍ക്കാരിനോട് അടുക്കുന്നുവെന്ന് വ്യക്തമായതോടെയാണ് സമരസമിതിയിലെ ബിജെപി അനുകൂലികള്‍ അതൃപ്തി വ്യക്തമാക്കിയത്. വഖഫ് ബോര്‍ഡിന്റെ ലാന്‍ഡ് രജിസ്ട്രിയില്‍ നിന്ന് 615 കുടുംബങ്ങളുടെ ഭൂമി ഒഴിവാക്കുന്നതുവരെ സമരവുമായി മുന്നോട്ടുപോകുമെന്നാണ് ഇവര്‍ വ്യക്തമാക്കുന്നത്.
2024 സെപ്തംബര്‍ 27നാണ് നിരാഹാരം ഉള്‍പ്പെടെയുള്ള പ്രത്യക്ഷസമരങ്ങള്‍ ആരംഭിച്ചത്. വഖഫ് തര്‍ക്കത്തിന്റെ പേരില്‍ മുനമ്പത്തുനിന്ന് ആരെയും കുടിയിറക്കില്ലെന്ന നിലപാടാണ് സര്‍ക്കാറിന്റേത്. ഇക്കാര്യം മുഖ്യമന്ത്രി പിണറായി വിജയന്‍തന്നെ സമരസമിതിയെ അറിയിച്ചതിന് പിന്നാലെയാണ് റിട്ട. ജസ്റ്റിസ് സി എന്‍ രാമചന്ദ്രന്‍നായരെ ജുഡീഷ്യല്‍ കമീഷനായി നിയമിച്ചത്. മുനമ്പം നിവാസികള്‍ താമസിക്കുന്ന ഭൂമിയില്‍ അവര്‍ക്കുള്ള അവകാശങ്ങളെന്നാണ് കമ്മീഷന്‍ റിപ്പോര്‍ട്ടു നല്‍കിയത്. പിന്നീട് സര്‍ക്കാര്‍ സമര്‍പ്പിച്ച അപ്പീലില്‍ മുനമ്പത്തേത് വഖഫ് ഭൂമിയല്ലെന്ന സുപ്രധാന വിധി കഴിഞ്ഞ ഒക്ടോബര്‍ 10ന് ഡിവിഷന്‍ ബെഞ്ചില്‍നിന്നുണ്ടായി.
