വിവരാവകാശ പ്രകാരം കണക്ക് തേടിയപ്പോള് മുഖ്യമന്ത്രിയുടെ വകുപ്പില് നിന്ന് നിഷേധാത്മകമായ സമീപനമാണ് ഉണ്ടായി; പുതിയ കണക്കുകള് തിരഞ്ഞെടുപ്പിന് ശേഷം നല്കിയാല് മതിയെന്ന അനൗദ്യോഗിക നിര്ദ്ദേശം ഉദ്യോഗസ്ഥര്ക്ക് നല്കി; 'നാം മുന്നോട്ട്' വിഴുങ്ങിയത് 22 കോടി; ഉമ്മന് ചാണ്ടിയുടേതിനേക്കാള് നാലിരട്ടി ചെലവ്; പിണറായി സര്ക്കാരിനെതിരെ ഗുരുതര ആരോപണങ്ങളുമായി പി.ടി. ചാക്കോ
തിരുവനന്തപുരം: സംസ്ഥാന സര്ക്കാരിന്റെ 'നാം മുന്നോട്ട്' എന്ന ചാനല് പരിപാടിയുടെ മറവില് കോടികളുടെ അഴിമതി നടക്കുന്നുവെന്ന ഗുരുതര ആരോപണവുമായി മുന് മുഖ്യമന്ത്രി ഉമ്മന് ചാണ്ടിയുടെ പ്രസ് സെക്രട്ടറി പി.ടി. ചാക്കോ. പിണറായി സര്ക്കാരിന്റെ കാലത്ത് ഈ പരിപാടിക്കായി 22 കോടിയോളം രൂപ ചെലവാക്കിയെന്നും ഇത് പാര്ട്ടി ചാനലിനെ സഹായിക്കാനാണെന്നും അദ്ദേഹം തന്റെ ഫേസ്ബുക്ക് പോസ്റ്റിലൂടെ ആരോപിച്ചു. വിവരാവകാശ നിയമപ്രകാരം ലഭിച്ച രേഖകള് ഉദ്ധരിച്ചാണ് ഈ വെളിപ്പെടുത്തല്.
ഉമ്മന് ചാണ്ടി മുഖ്യമന്ത്രിയായിരുന്ന കാലത്ത് 'സുതാര്യ കേരളം' എന്ന പേരില് ഇതേ മാതൃകയിലുള്ള പരിപാടി സംപ്രേഷണം ചെയ്തിരുന്നു. സിഡിറ്റും പിആര്ഡിയും ചേര്ന്നായിരുന്നു ഇതിന്റെ നിര്വ്വഹണം. ദൂരദര്ശനില് മാത്രം സംപ്രേഷണം ചെയ്തിരുന്ന ആ പരിപാടിയുടെ ഒരു എപ്പിസോഡിന് വെറും 63,000 രൂപ മാത്രമാണ് ചെലവായിരുന്നത്. എന്നാല് പിണറായി സര്ക്കാര് ഇതേ പരിപാടി 'നാം മുന്നോട്ട്' എന്ന പേരില് മാറ്റിയപ്പോള് ചെലവ് നാലിരട്ടിയായി വര്ധിച്ചുവെന്ന് പി.ടി. ചാക്കോ ചൂണ്ടിക്കാട്ടുന്നു.
ഇടത് സര്ക്കാരിന്റെ കാലത്ത് പരിപാടിയുടെ നിര്മ്മാണം പാര്ട്ടി ചാനലിനെയാണ് ഏല്പ്പിച്ചത്. ഒരു എപ്പിസോഡിന് 2.32 ലക്ഷം രൂപ വീതമാണ് പാര്ട്ടി ചാനലിന് നല്കുന്നത്. 2017 മുതല് 2024 മാര്ച്ച് വരെ 179 എപ്പിസോഡുകള് സംപ്രേഷണം ചെയ്ത വകയില് 21.95 കോടി രൂപ ഖജനാവില് നിന്ന് ചെലവാക്കി കഴിഞ്ഞു. യുഡിഎഫ് സര്ക്കാരിന്റെ കാലത്തെ ചെലവുമായി താരതമ്യം ചെയ്യുമ്പോള് ഇത് വന് കൊള്ളയാണെന്നാണ് ആരോപണം.
എല്ലാ ചാനലുകളും ആഴ്ചയിലൊരിക്കല് ഈ പരിപാടി സംപ്രേഷണം ചെയ്യാറുണ്ടെങ്കിലും, നിര്മ്മാണത്തിനുള്ള ഭീമമായ തുക പാര്ട്ടിയുടെ രണ്ട് ചാനലുകള്ക്ക് മാത്രമായാണ് നല്കുന്നത്. പാവപ്പെട്ട ജനങ്ങളുടെയും നാടിന്റെയും പ്രശ്നങ്ങള് നേരിട്ട് കേള്ക്കാനും പരിഹരിക്കാനുമാണ് ഉമ്മന് ചാണ്ടി 'സുതാര്യ കേരളം' ഉപയോഗിച്ചിരുന്നത്. എന്നാല് പിണറായി സര്ക്കാര് ഇത് ഇടത് ബുദ്ധിജീവികളുടെയും സൈദ്ധാന്തികരുടെയും ഒരു 'ഹൈക്ലാസ്' പരിപാടിയാക്കി മാറ്റിയെന്നും അതിനനുസരിച്ചുള്ള ആഡംബര ചെലവുകളാണ് ഇപ്പോള് പുറത്തുവരുന്നതെന്നും അദ്ദേഹം പരിഹസിച്ചു.
വിവരാവകാശ നിയമപ്രകാരമുള്ള പുതിയ കണക്കുകള് തേടിയപ്പോള് മുഖ്യമന്ത്രിയുടെ വകുപ്പില് നിന്ന് നിഷേധാത്മകമായ സമീപനമാണ് ഉണ്ടായതെന്നും പി.ടി. ചാക്കോ ആരോപിക്കുന്നു. പുതിയ കണക്കുകള് തിരഞ്ഞെടുപ്പിന് ശേഷം നല്കിയാല് മതിയെന്ന അനൗദ്യോഗിക നിര്ദ്ദേശമാണ് ഉദ്യോഗസ്ഥര്ക്ക് ലഭിച്ചിരിക്കുന്നത്. ഇതിലൂടെ വിവരാവകാശ നിയമത്തിന്റെ അന്തഃസത്ത തന്നെ സര്ക്കാര് ഇല്ലാതാക്കുകയാണെന്നും അദ്ദേഹം കുറ്റപ്പെടുത്തി.
നേരത്തെ പിആര്ഡിയും കിഫ്ബിയും ചേര്ന്ന് തിരഞ്ഞെടുപ്പ് പ്രചാരണത്തിനായി 227 കോടി രൂപ ചെലവാക്കിയെന്ന പി.ടി. ചാക്കോയുടെ പോസ്റ്റ് വലിയ വിവാദമായിരുന്നു. ഇതിന് പിന്നാലെയാണ് പുതിയ കണക്കുകള് പുറത്തുവിടുന്നതില് സര്ക്കാര് നിയന്ത്രണം ഏര്പ്പെടുത്തിയതെന്നാണ് സൂചന. സര്ക്കാരിന്റെ ധൂര്ത്തിനെക്കുറിച്ചുള്ള കഥകള് ഇപ്പോള് നാട് നീളെ ചര്ച്ചയാവുകയാണെന്നും അദ്ദേഹം പറഞ്ഞു.
സര്ക്കാര് ഫണ്ട് ഉപയോഗിച്ച് നടത്തുന്ന ഇത്തരം പരിപാടികള് പാര്ട്ടിയുടെ പ്രചാരണത്തിനായും പാര്ട്ടി ചാനലുകളെ സാമ്പത്തികമായി സഹായിക്കാനുമാണ് ഉപയോഗിക്കുന്നത്. പൊതുജനങ്ങളുടെ നികുതിപ്പണം ഇത്തരത്തില് ധൂര്ത്തടിക്കുന്നത് ജനാധിപത്യത്തിന് വിരുദ്ധമാണെന്നും പ്രതിപക്ഷം ആരോപിക്കുന്നു. വരും ദിവസങ്ങളില് ഈ വിഷയം വലിയ രാഷ്ട്രീയ വിവാദങ്ങള്ക്ക് വഴിതെളിക്കുമെന്ന് ഉറപ്പാണ്.
വിവരാവകാശ രേഖ പ്രകാരം 2024 ജൂലൈ 12-ന് ലഭിച്ച മറുപടിയിലാണ് ഈ കണക്കുകള് വ്യക്തമാക്കുന്നത്. ഭരണത്തിന്റെ നേട്ടങ്ങള് ജനങ്ങളിലേക്ക് എത്തിക്കാനെന്ന പേരില് നടത്തുന്ന ഈ പിആര് അഭ്യാസം യഥാര്ത്ഥത്തില് ഖജനാവ് കൊള്ളയടിക്കാനുള്ള മാര്ഗ്ഗമായി മാറിയിരിക്കുകയാണ്. സാധാരണക്കാരന്റെ പ്രശ്നങ്ങള് ചര്ച്ച ചെയ്യപ്പെടേണ്ട ഇടങ്ങളില് പാര്ട്ടി സിദ്ധാന്തങ്ങള് വിളമ്പുന്നതാണ് 'നാം മുന്നോട്ട്' എന്ന പരിപാടിയുടെ രീതി എന്നും വിമര്ശനമുണ്ട്.
തിരഞ്ഞെടുപ്പ് അടുത്ത സാഹചര്യത്തില് ഇത്തരം അഴിമതി ആരോപണങ്ങള് സര്ക്കാരിനെ പ്രതിരോധത്തിലാക്കും. യുഡിഎഫ് കാലത്തെ സുതാര്യമായ പ്രവര്ത്തനങ്ങളും നിലവിലെ സര്ക്കാരിന്റെ രഹസ്യ സ്വഭാവമുള്ള ഇടപാടുകളും തമ്മിലുള്ള വ്യത്യാസം ജനങ്ങള് തിരിച്ചറിയുമെന്നും പി.ടി. ചാക്കോ പ്രത്യാശ പ്രകടിപ്പിച്ചു. വിവരാവകാശ നിയമത്തെ അട്ടിമറിക്കാനുള്ള ശ്രമങ്ങള്ക്കെതിരെ ശക്തമായ പ്രതിഷേധം ഉയരണമെന്നും അദ്ദേഹം ആവശ്യപ്പെട്ടു.
ഈ ധൂര്ത്തിന്റെ വിശദാംശങ്ങള് വരും ദിവസങ്ങളില് കൂടുതല് ചര്ച്ചയാകുമെന്നാണ് രാഷ്ട്രീയ നിരീക്ഷകര് കരുതുന്നത്. സര്ക്കാര് ഏജന്സികളെ ഒഴിവാക്കി സ്വകാര്യ പാര്ട്ടി ചാനലുകള്ക്ക് നിര്മ്മാണ ചുമതല നല്കിയതിലെ അസ്വാഭാവികത അന്വേഷിക്കണമെന്ന ആവശ്യവും ഉയരുന്നുണ്ട്.
പിടി ചാക്കോയുടെ ഫെയ്സ് ബുക്ക് പോസ്റ്റിന്റെ പൂര്ണ്ണ രൂപം ചൂവടെ
നാം മുന്നോട്ട് വിഴുങ്ങിയത് 22 കോടി
'നാം മുന്നോട്ട് എന്ന ചാനല് പരിപാടിയുടെ മറവില് സര്ക്കാര് ഫണ്ട് കൊള്ളയടിച്ചതിന്റെ വിശാദാംശങ്ങളും പുറത്ത്!
'സുതാര്യ കേരളം' എന്ന പേരിലാണ് ഉമ്മന് ചാണ്ടി മുഖ്യമന്ത്രിയായിരുന്നപ്പോള് ഇതേ ചാനല് പരിപാടി സംപ്രേഷണം ചെയ്തിരുന്നത്. സിഡിറ്റും പിആര്ഡിയും ചേര്ന്നായിരുന്നു നിര്വഹണം. ദൂരദര്ശനില് മാത്രമായിരുന്നു സംപ്രേഷണം. ഒരു എപ്പിസോഡിന്റെ ചെലവ് 63,000 രൂപ.
പിണറായി സര്ക്കാര് 'നാം മുന്നോട്ട്' എന്ന പേരില് ഇതേ പരിപാടി അവതരിപ്പിച്ചപ്പോള് പാര്ട്ടി ചാനലിയായിരുന്നു നിര്മാണം. ഒരു എപ്പിസോഡിന് 2.32 ലക്ഷം രൂപ വച്ച് പാര്ട്ടി ചാനലിനു നല്കി. യുഡിഎഫിന്റെതിനേക്കാള് നാലിരട്ടി വര്ധന!
2017 മുതല് 2024 മാര്ച്ച് വരെ 179 എപ്പിസോഡുകള് സംപ്രേഷണം ചെയ്തു. ഇതിന് 21.95 കോടി രൂപ ചെലവാക്കി. (വിവരാവകാശനിയമ പ്രകാരം 12.7.2024ല് ലഭിച്ച മറുപടി) എല്ലാ ചാനലുകളും ഈ പരിപാടി ആഴ്ചയിലൊരിക്കല് സംപ്രേഷണം ചെയ്തപ്പോള് പാര്ട്ടിയുടെ രണ്ടു ചാനലുകള്ക്കാണ് നല്കിയത്.
ഉമ്മന് ചാണ്ടി പാവപ്പെട്ട ജനങ്ങളുടെയും നാടിന്റെയും പ്രശ്നങ്ങളാണ് ഈ പരിപാടിയില് പരിഹരിച്ചത്. പിണറായി സര്ക്കാര് ഇത് ഇടത് ബുദ്ധിജീവകളുടെയും സൈദ്ധാന്തികരുടെയും ഹൈക്ലാസ് പരിപാടിയാക്കി. അങ്ങനെ ഹൈക്ലാസ് ചെലവും ഉണ്ടായി.
വിവരാവകാശനിയമ പ്രകാരം ഏറ്റവും പുതിയ കണക്കു തേടിയപ്പോള്, തെരഞ്ഞെടുപ്പിനുശേഷം കൊടുത്താല് മതിയെന്നാണ് മുഖ്യമന്ത്രിയുടെ വകുപ്പില് നിന്നുള്ള അനൗദ്യോഗിക മറുപടി. അങ്ങനെ വിവരാവകാശത്തിന്റെ കടയ്ക്കലും കത്തിവച്ചു.
പിആര്ഡിയും കിഫ്ബിയും കൂടി 227 കോടി രൂപ തെരഞ്ഞെടുപ്പിനു ചെലവാക്കി എന്ന എന്റെ എഫ്ബി പോസ്റ്റ് വിവാദമായതിനെ തുടര്ന്നാണ് ഉത്തരവ്. ഈ ധൂര്ത്തിന്റെ കഥ നാട്ടിലിപ്പോള് പാട്ടാണ്.
