അറബിക്കടലിലെ 'നെഫര്ടിറ്റി'യില് ലഹരി നൃത്തമോ? ഡിജെ കഴിഞ്ഞ് ഫൈവ് സ്റ്റാര് ഹോട്ടലിലേക്ക്; നെഫര്ടിറ്റിയിലെ ലഹരിവേട്ടയില് കുടുങ്ങിയത് ഡോക്ടറും വക്കീലും ഇക്കൂട്ടരും; കൊച്ചിയില് ലഹരിമാഫിയ സര്ക്കാര് സംവിധാനവും ഉപയോഗിക്കുന്നു; ഈവന്റ് മാനേജ്മെന്റുകള് കൊച്ചിയില് ഒഴുക്കുന്നത് ലഹരി; 'നെഫര്ടിറ്റി' ക്രൂയിസ് കപ്പലില് എന്തും നടക്കും?
കൊച്ചി: കൊച്ചിയിലെ ആഡംബര പാര്ട്ടികള്ക്കും കപ്പല് യാത്രകള്ക്കും പിന്നില് ലഹരിമാഫിയ ചുവടുറപ്പിക്കുകയാണോ? സര്ക്കാര് ഉടമസ്ഥതയിലുള്ള 'നെഫര്ടിറ്റി' ക്രൂയിസ് കപ്പലില് നടന്ന ഡിജെ പാര്ട്ടിക്ക് പിന്നാലെ നഗരത്തിലെ പഞ്ചനക്ഷത്ര ഹോട്ടലില് നടന്ന ലഹരിവേട്ട ഞെട്ടിക്കുന്ന വിവരങ്ങളാണ് പുറത്തുവിടുന്നത്. റാഡിസണ് ബ്ലൂ ഹോട്ടലില് പോലീസ് നടത്തിയ മിന്നല് പരിശോധനയില് ഹൈബ്രിഡ് കഞ്ചാവും കൊക്കെയ്നുമായി എട്ടുപേരാണ് പിടിയിലായത്. പിടിയിലായവരില് ഡോക്ടറും അഭിഭാഷകനും യുവതികളും ഉള്പ്പെടുന്നുവെന്നത് ലഹരിശൃംഖലയുടെ ആഴം വ്യക്തമാക്കുന്നു.
കേരള ഷിപ്പിങ് ആന്ഡ് ഇന്ലാന്ഡ് നാവിഗേഷന് കോര്പ്പറേഷന്റെ അഭിമാനമായ 'നെഫര്ടിറ്റി' കപ്പലിലായിരുന്നു ആദ്യഘട്ട പാര്ട്ടികള് നടന്നത്. സര്ക്കാര് സംവിധാനമായതിനാല് കപ്പലില് കര്ശനമായ സുരക്ഷാ പരിശോധനകള് ഉണ്ടാകില്ലെന്ന പഴുത് ലഹരിസംഘം മുതലെടുത്തു. അഞ്ചുമണിക്കൂര് കടലിലെ നൃത്തത്തിനും ആഘോഷത്തിനും ശേഷം ഇവര് നേരെ എത്തിയത് കടവന്ത്രയിലെ റാഡിസണ് ബ്ലൂ ഹോട്ടലിലേക്കാണ്. ഡിജെ പാര്ട്ടിയുടെ മറവില് ലഹരി കൈമാറ്റം നടത്തിയ ശേഷം സുരക്ഷിതമായി ഒളിത്താവളത്തിലേക്ക് മാറാനായിരുന്നു ഇവരുടെ നീക്കം. എന്നാല് പോലീസിന്റെ രഹസ്യവിവരത്തില് സംഘത്തിന്റെ കളി പാളി.
തിരുവനന്തപുരം ശംഖുമുഖം സ്വദേശിയും ഇവന്റ് മാനേജ്മെന്റ് ഉടമയുമായ ഷാജി ഫെര്ണാണ്ടോ ആണ് ഈ ലഹരി വിരുന്നിന്റെ മുഖ്യകണ്ണി. ഇയാളോടൊപ്പം പിടിയിലായവരുടെ പട്ടിക ഞെട്ടിക്കുന്നതാണ്:
ഓസ്റ്റിന് ജോസ് (കലൂര്)
രോഹിത് നായര് (അഭിഭാഷകന്)
ജിനോ മുരളി (കൊടുങ്ങല്ലൂര്)
അക്ബര് ഷാ (ന്യൂട്രീഷ്യന്, നൂറനാട്)
ബെന്സി റാവൂത്തര് (ദന്ത ഡോക്ടര്)
സെയ്തലവി ഫാത്തിമ (ഫിസിയോ തെറാപ്പിസ്റ്റ്, കൊല്ലം)
അമല് റൗഫ് (ഏവിയേഷന് വിദ്യാര്ത്ഥി)
ഇവരില് നിന്ന് ഹൈബ്രിഡ് കഞ്ചാവ്, കൊക്കെയ്ന്, മെത്താഫിറ്റമിന്, എക്സ്റ്റസി പില്സ് എന്നിവ പോലീസ് കണ്ടെടുത്തു. യുവാക്കളെയും വിദ്യാര്ത്ഥികളെയും ലക്ഷ്യമിട്ടുള്ള വലിയൊരു ലഹരി ശൃംഖലയുടെ ഭാഗമാണ് ഇവരെന്നാണ് പോലീസ് നിഗമനം.
ഈജിപ്ഷ്യന് രാജ്ഞിയുടെ പേരിലുള്ള നെഫര്ടിറ്റി കപ്പല് സഞ്ചാരികളുടെ പ്രിയപ്പെട്ട ഇടമാണ്. എന്നാല് ഇത്തരം വിനോദസഞ്ചാര കേന്ദ്രങ്ങളെ ലഹരി വിനിമയത്തിനായി ക്രിമിനലുകള് ഉപയോഗിക്കുന്നു എന്നത് അതീവ ഗൗരവകരമായ സുരക്ഷാ വീഴ്ചയാണ്. കുടുംബങ്ങളുമായി യാത്രയ്ക്കെത്തുന്ന സാധാരണക്കാരെ ഭീതിയിലാക്കുന്ന രീതിയിലാണ് ഇത്തരം ലഹരി സംഘങ്ങളുടെ കടന്നുകയറ്റം.
സര്ക്കാര് നിയന്ത്രണത്തിലുള്ള കപ്പലില് ഇത്തരം ഡിജെ പാര്ട്ടികള്ക്ക് അനുമതി നല്കിയ ഉദ്യോഗസ്ഥര്ക്ക് വീഴ്ച പറ്റിയിട്ടുണ്ടോ എന്ന് അന്വേഷിക്കേണ്ടതുണ്ട്. കൊച്ചിയിലെ പ്രധാന ലഹരി ഇടനാഴിയായി പഞ്ചനക്ഷത്ര ഹോട്ടലുകളും ക്രൂയിസ് കപ്പലുകളും മാറുമ്പോള്, ലഹരിമാഫിയയുടെ വേരുകള് പിഴുതെറിയാനുള്ള നീക്കത്തിലാണ് പോലീസ്. കടവന്ത്ര എസ്എച്ച്ഒ ആര്. ബിജുവിന്റെയും ഡാന്സാഫ് സംഘത്തിന്റെയും നേതൃത്വത്തിലാണ് ഈ സുപ്രധാന ലഹരിവേട്ട നടന്നത്.
