കനത്ത മേക്കപ്പിനും മറയ്ക്കാനാകുന്നില്ല! ട്രംപിന്റെ വലംകയ്യില്‍ ഇരുണ്ട നീല നിറത്തിലുളള ചതവിന്റെ പാടുകള്‍; നിരന്തരം ലോക നേതാക്കള്‍ക്ക് കൈ കൊടുക്കുന്നതും ആസ്പിരിന്‍ ഉപയോഗിക്കുന്നതും കാരണമെന്ന് വൈറ്റ് ഹൗസ് പ്രസ് സെക്രട്ടറി; യുഎസ് പ്രസിഡന്റിന്റെ ആരോഗ്യനിലയില്‍ ആശങ്കയേറുന്നു
ട്രംപിന്റെ വലംകയ്യില്‍ ഇരുണ്ട നീല നിറത്തിലുളള ചതവിന്റെ പാടുകള്‍
വാഷിങ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ കൈകളില്‍ വീണ്ടും ചില പാടുകള്‍ കണ്ടെത്തിയതോടെ അദ്ദേഹത്തിന്റെ ആരോഗ്യനിലയില്‍ ആശങ്കകള്‍ ഉയരുന്നു. 79 കാരനായ ട്രംപിന്റെ ആരോഗ്യ സ്ഥിതിയെ കുറിച്ച് നേരത്തേയും വാര്‍ത്തകള്‍ പുറത്തു വന്നിരുന്നു. നീല നിറത്തിലുള്ള ഒരു ചതവാണ് ട്രംപിന്റെ കയ്യില്‍ കാണുന്നത്.
പ്രസിഡന്റിന്റെ കൈകളില്‍ സമീപ മാസങ്ങളില്‍ പലരും ചതവുകള്‍ ശ്രദ്ധിച്ചിട്ടുണ്ട്. ചിലപ്പോള്‍ കനത്ത മേക്കപ്പ് കൊണ്ട് അത് മറഞ്ഞിരിക്കും. ദക്ഷിണ കൊറിയന്‍ പ്രസിഡന്റ് ലീ ജെയ് മ്യുങ്ങുമായുള്ള ഓവല്‍ ഓഫീസിലെ കൂടിക്കാഴ്ചയ്ക്കിടെ ട്രംപിന്റെ വലതു കൈയിലെ ഒരു വലിയ ചതവ് പുറത്തുവന്നു. കഴിഞ്ഞ ഞായറാഴ്ച മുന്‍ മേജര്‍ ലീഗ് പിച്ചര്‍ റോജര്‍ ക്ലെമെന്‍സിനൊപ്പം ഗോള്‍ഫ് ഔട്ടില്‍ പങ്കെടുത്തപ്പോഴും അദ്ദേഹത്തിന് സമാനമായി പരിക്കേറ്റിരുന്നു.
കഴിഞ്ഞ വെള്ളിയാഴ്ചയാണ് പ്രസിഡന്റിന്റെ കൈയില്‍ അദ്ദേഹത്തിന്റെ ചര്‍മ്മത്തിന്റെ നിറവുമായി പൊരുത്തപ്പെടാത്ത ഒരു മേക്കപ്പ് പാട് നിറഞ്ഞിരിക്കുന്നത് പലരും ശ്രദ്ധിച്ചത്. എന്നാല്‍ വൈറ്റ് ഹൗസ് പ്രസ് സെക്രട്ടറി കരോലിന്‍ ലീവിറ്റ് പറയുന്നത് ട്രംപ് നിരന്തരമായി ഹസ്തദാനം നടത്തുന്നതും ആസ്പിരിന്‍ ഉപയോഗിക്കുന്നതും കാരണമാണ് കൈയ്യില്‍ ഇത്തരം ചതവുകള്‍ കാണുന്നതെന്നാണ്.
പ്രസിഡന്റിന്റെ സമീപകാല ഫോട്ടോകളില്‍ അദ്ദേഹത്തിന്റെ കൈയുടെ പിന്‍ഭാഗത്ത് ചെറിയ ചതവ് കാണാന്‍ കഴിയും. ഹൃദയ സംബന്ധമായ പ്രശ്നങ്ങള്‍ കാരണമാണ് ട്രംപ് സ്ഥിരമായി ആസ്പിരിന്‍ കഴിക്കുന്നതെന്നാണ് അദ്ദേഹത്തിന്റെ ഡോക്ടര്‍മാരും പറയുന്നത്. പ്രസിഡന്റ് ഡൊണാള്‍ഡ് ജെ. ട്രംപ് അമേരിക്ക കണ്ടിട്ടുള്ളതില്‍ വച്ച് ഏറ്റവും ആരോഗ്യവാനായ പ്രസിഡന്റാണ് എന്നാണ് അദ്ദേഹത്തിന്റെ മുന്‍ ഡോക്ടറായ റോണി ജാക്സണ് പറയുന്നത്.
ബരാക് ഒബാമയുടെ ഡോക്ടര്‍ കൂടിയായ ജാക്സണ്, ജോര്‍ജ്ജ് ഡബ്ല്യു. ബുഷിന്റെ കീഴില്‍ വൈറ്റ് ഹൗസ് മെഡിക്കല്‍ യൂണിറ്റിലും ജോലി ചെയ്തിരുന്നു. ട്രംപ് മുമ്പെന്നത്തേക്കാളും മാനസികമായും ശാരീരികമായും കൂടുതല്‍ ആരോഗ്യവാനാണ്എന്നും ഡോ.ജാക്സണ് കൂട്ടിച്ചേര്‍ക്കുന്നു. ട്രംപിന്റെ കാലുകളില്‍ ഈയിടെ നേരിയ വീക്കം ശ്രദ്ധയില്‍പ്പെട്ടതായും ഡോക്ടര്‍മാര്‍ പരിശോധിച്ചതായും പ്രസ് സെക്രട്ടറി വെളിപ്പെടുത്തി.
എന്നാല്‍ ഈയിടെ സ്‌കോട്ട്ലന്‍ഡിലേക്കുള്ള യാത്രയ്ക്കിടെ ട്രംപ് കൈകളില്‍ മേക്കപ്പ് ധരിച്ചതായി കാണപ്പെട്ടിരുന്നു. ജനുവരിയില്‍ അധികാരമേറ്റതിനുശേഷം ഏതാണ്ട് എല്ലാ മാസവും പ്രസിഡന്റിന്റെ കൈയില്‍ സമാനമായ മുഴകളും ചതവുകളും പ്രത്യക്ഷപ്പെട്ടിട്ടുണ്ട്. കഴിഞ്ഞ മാസവും ഈ ചതവുകളിലൊന്ന് മറയ്ക്കുന്ന മേക്കപ്പ് അദ്ദേഹത്തിന്റെ കൈകളിലുണ്ടായിരുന്നു.
