എന്തുകൊണ്ടാണ് 2002ലെ വോട്ടര്‍ പട്ടികയില്‍ എംഎല്‍എയുടെ പേരില്ലാതെ പോയതെന്നത് ആശ്ചര്യം; പട്ടികയില്‍ പുതുതായി പേര് ചേര്‍ക്കേണ്ട അവസ്ഥയില്‍ തിരുവല്ല എംഎല്‍എ; അല്ലാത്ത പക്ഷം അടുത്ത നിയമസഭാ തിരഞ്ഞെടുപ്പില്‍ മത്സരിക്കാന്‍ കഴിയില്ല; എസ് ഐ ആറില്‍ മാത്യു ടി തോമസ് വിഷയം സിപിഎമ്മിന് പുതിയ ആയുധം
പത്തനംതിട്ട: തിരുവല്ല എംഎല്‍എയും മുന്‍മന്ത്രിയുമായ മാത്യു ടി തോമസും ഭാര്യ അച്ചാമ്മ അലക്സും 2002ലെ വോട്ടര്‍പട്ടികയ്ക്ക് പുറത്തായത് ചര്‍ച്ചയാക്കാന്‍ ഇടതുപക്ഷം. വോട്ടര്‍പട്ടിക തീവ്ര പുനപരിശോധനയുടെ (എസ്ഐആര്) പിഴവിന് തെളിവാണ് ഇൗ പുറന്തള്ളല്‍. എസ്ഐആര് ഫോം പൂരിപ്പിക്കുന്ന ഘട്ടത്തില്‍ ബിഎല്‍ഒ ആണ് വോട്ടര്‍പട്ടികയില്‍ പേരില്ലെന്ന വിവരം അറിയിച്ചതെന്ന് മാത്യു ടി തോമസ് പറഞ്ഞു. ഇത് സുപ്രീംകോടതിയെ അടക്കം അറിയിക്കും.
1987ല്‍ മാവേലിക്കര മണ്ഡലത്തിലാണ് വോട്ടര്‍ പട്ടികയില്‍ പേര് ചേര്‍ത്തത്. 1989 മുതല്‍ തിരുവല്ല മണ്ഡലത്തിലാണ് വോട്ട്. 2021ല്‍ തിരുവല്ല മാര്‍തോമ്മ കോളേജില്‍ വോട്ടും ചെയ്തു. 2006 മുതല്‍ തിരുവല്ലയിലെ ജനപ്രതിനിധിയുമാണ്. 2002ലെ തിരിച്ചറിയല്‍ കാര്‍ഡും ഐഡി നമ്പറും കൈവശമുണ്ടെന്നും മാത്യു ടി തോമസ് പറഞ്ഞു. വിഷയത്തില്‍ അടിയന്തര നടപടി സ്വീകരിക്കണമെന്നാവശ്യപ്പെട്ട് തിരുവല്ല മണ്ഡലം ഇലക്ടറല്‍ രജിസ്ട്രേഷന്‍ ഓഫീസര്‍ക്ക് മാത്യു ടി തോമസ് പരാതി നല്‍കി. എന്തുകൊണ്ടാണ് 2002ലെ വോട്ടര്‍ പട്ടികയില്‍ പേരില്ലാതെ പോയതെന്ന് പരിശോധിക്കാനാണ് കമ്മീഷന്റെ തീരുമാനം.
ഇനിയും മാത്യു ടി തോമസിന് പട്ടികയില്‍ പുതുതായി പേരു ചേര്‍ക്കാന്‍ കഴിയും. അതു ചെയ്തില്ലെങ്കില്‍ അടുത്ത നിയമസഭാ തിരഞ്ഞെടുപ്പില്‍ പോലും മത്സരിക്കാന്‍ കഴിയാതെ വരും. 2002ലെ വോട്ടര്‍ പട്ടിക അടിസ്ഥാനത്തിലാണ് എസ്ഐആര് നടപ്പാക്കുന്നത്. എസ്ഐആര് ഫോം പൂരിപ്പിക്കുന്ന ഘട്ടത്തിലാണ് വിഷയം ശ്രദ്ധയില്‍പ്പെട്ടതെന്നും 1984 മുതല്‍ കഴിഞ്ഞ തിരഞ്ഞെടുപ്പു വരെയും താനും ഭാര്യയും വോട്ട് ചെയ്തിരുന്നതായും മാത്യു ടി.തോമസ് പറഞ്ഞു. 2002ലെ തന്റെയും ഭാര്യയുടെയും തിരിച്ചറിയല്‍ കാര്‍ഡുകള്‍ കൈവശം ഉണ്ട്. സാങ്കേതികമായി പേര് ഉള്‍പ്പെടുത്താന്‍ കഴിയുന്നില്ല എന്ന വിവരമാണ് ബന്ധപ്പെട്ട ഉദ്യോഗസ്ഥര്‍ അറിയിച്ചതെന്നും മാത്യു ടി. തോമസ് പറഞ്ഞു. അതുകൊണ്ട് തന്നെ ഇനി എസ് ഐ ആറിന് ശേഷം പുതുതായി വോട്ട് ചേര്‍ക്കേണ്ടി വരും. ഈ വിഷയം സിപിഎം വ്യാപക ചര്‍ച്ചയാക്കും.
''ഇത് ഞെട്ടലുണ്ടാക്കി. ആറ് തവണ നിയമസഭയിലേക്ക് മത്സരിക്കുകയും അഞ്ച് തവണ എംഎല്‍എ ആവുകയും ഒരു തവണ പാര്‍ലമെന്റിലേക്ക് മത്സരിക്കുകയും ചെയ്ത രാഷ്ട്രീയ പശ്ചാത്തലമുള്ള വ്യക്തിയാണ് ഞാന്‍. എന്നാല്‍, നിലവിലെ പരിശോധനയില്‍ 2002ലെ വോട്ടര്‍ പട്ടികയില്‍ പേര് കാണുന്നില്ലെന്നാണ് ഉദ്യോഗസ്ഥര്‍ അറിയിച്ചിട്ടുള്ളത്.'' - മാത്യു ടി.തോമസ് പറഞ്ഞു. വികലമായ എസ്ഐആര്(വോട്ടര്‍ പട്ടിക തീവ്ര പുനഃപരിശോധന) നടപടികളും ജനങ്ങളില്‍ വലിയ വിഭാഗത്തിന് വോട്ട് അവകാശം നിഷേധിക്കുന്നതും തെരഞ്ഞെടുപ്പ് കമീഷന്‍ അവസാനിപ്പിക്കണമെന്ന് സിപിഎം പൊളിറ്റ്ബ്യൂറോ ആവശ്യപ്പെട്ടിട്ടുണ്ട്. പതിവുപോലെ സുതാര്യമായും ജനങ്ങളെ ബുദ്ധിമുട്ടിക്കാത്ത രീതിയിലും നടക്കേണ്ട വോട്ടര്‍പട്ടിക പരിഷ്‌കരണം അരാജകത്വം നിറഞ്ഞതും ജനങ്ങളെയും ഇൗ ജോലി ഏറ്റെടുക്കാന്‍ നിര്‍ബന്ധിതരായ ഉദ്യോഗസ്ഥരെയും ഒരുപോലെ ഭീഷണിപ്പെടുത്തുന്നതുമായി മാറിയിരിക്കുന്നുവെന്ന് സിപിഎം പറയുന്നു.
അങ്ങേയറ്റം തിടുക്കത്തില്‍, വളരെ മോശമായി ആസൂത്രണം ചെയ്യപ്പെട്ട നടപടിയാണിത്. വീട് തോറും കയറി പരിശോധന നടത്താന്‍ ബിഎല്‍ഒമാര്‍ക്ക് നിശ്ചയിച്ച് നല്‍കിയ സമയപരിധി ജോലി പൂര്‍ത്തീകരിക്കാന്‍ തികയുന്നതല്ല. തിടുക്കം കാരണം, പലയിടങ്ങളിലും ബിഎല്‍ഒമാര്‍ ചില പാര്‍ടി ഓഫീസുകളില്‍ തങ്ങി വോട്ടര്‍മാരില്‍ അവിടെ എത്തണമെന്ന് നിര്‍ദേശിക്കുന്ന സാഹചര്യം സൃഷ്ടിച്ചിരിക്കുന്നു. വോട്ടര്‍പട്ടികയില്‍നിന്ന് വന്‍തോതില്‍ പേരുകള്‍ ഒഴിവാക്കപ്പെടുന്നതിനും തെറ്റുകള്‍ കടന്നുകൂടുന്നതിനും ഇത് ഇടയാക്കും. ബിഎല്‍ഒമാര്‍ക്കുമേല്‍ അടിച്ചേല്‍പ്പിച്ച കടുത്ത ജോലിഭാരം ഒട്ടേറെ ജീവന്‍ അപഹരിച്ചു. മതിയായ വിശ്രമം കൂടാതെ കഠിനമായി ജോലി ചെയ്യേണ്ട അവസ്ഥയിലാണ് അവര്‍. ഇത്തരം മരണങ്ങള്‍ ആകസ്മികമല്ല, നിരുത്തരവാദപരവും മനുഷ്യത്വഹീനവുമായ ഭരണനടപടികളുടെ ഫലമാണിതെന്നാണ് സിപിഎം നിലപാട്.
വോട്ടര്‍പട്ടിക കുറ്റമറ്റതാക്കാനും ഇരട്ടിപ്പുകള്‍ ഒഴിവാക്കാനും തെരഞ്ഞെടുപ്പ് കമീഷന്‍ വികസിപ്പിച്ച സോഫ്റ്റ്വെയര്‍ ഉപയോഗിക്കാത്തത് ഞെട്ടിപ്പിക്കുന്നു. ഇപ്പോള്‍ നടക്കുന്ന തീവ്ര പുനഃപരിശോധനയുടെ ലക്ഷ്യവും ഉദ്ദേശ്യവും സംബന്ധിച്ച് ഗൗരവതരമായ ആശങ്കകള്‍ ഉയര്‍ത്തുന്നതാണിത്. ഫോമുകള്‍ അപ്പ്ലോഡ് ചെയ്യാന്‍ ആഗ്രഹിക്കുന്ന ബിഎല്‍ഒമാര്‍ക്കും വോട്ടര്‍മാര്‍ക്കും ഇന്റര്‍നെറ്റ് കണക്ഷനിലെ പോരായ്മകളും സെര്‍വര്‍ പ്രശ്നങ്ങളും ഇതര സാങ്കേതിക ബുദ്ധിമുട്ടുകളും നേരിടേണ്ടിവരുന്നു. ഫോം പൂരിപ്പിച്ച് അപ്പ്ലോഡ് ചെയ്യുന്നത് അങ്ങേയറ്റം പ്രതിബന്ധം നിറഞ്ഞ പ്രക്രിയയാണെന്നും സിപിഎം പറയുന്നു.
