ഫ്ലോറിഡ: അമേരിക്കയിലെ ഫ്ലോറിഡയിൽ തികച്ചും നാടകീയമായ സംഭവങ്ങൾക്കാണ് ഇന്റർസ്റ്റേറ്റ് -95 ഹൈവേ സാക്ഷ്യം വഹിച്ചത്. സാങ്കേതിക തകരാറിനെ തുടർന്ന് ഒരു ചെറുവിമാനം തിരക്കേറിയ റോഡിന് മുകളിലൂടെ പറന്നിറങ്ങുകയും, തുടർന്ന് ഓടിക്കൊണ്ടിരുന്ന കാറുമായി ഇടിക്കുകയും ചെയ്തു. മെറിറ്റ് ഐലൻഡിലെ ഇന്റർസ്റ്റേറ്റ് -95 ഹൈവേയിലാണ് ഈ അടിയന്തര ലാൻഡിംഗ് നടന്നത്. അപകടത്തിൽ വിമാനം ഇടിച്ച കാറിലെ യാത്രക്കാർക്ക് ഗുരുതരമായ പരിക്കുകളില്ലാതെ രക്ഷപ്പെടാൻ സാധിച്ചത് അത്ഭുതകരമായി.

കഴിഞ്ഞ ദിവസം വൈകുന്നേരം 5.45 ഓടെയാണ് സംഭവം നടന്നത്. എൻജിൻ തകരാർ നേരിട്ടതിനെ തുടർന്നാണ് പൈലറ്റ് വിമാനം റോഡിൽ അടിയന്തരമായി (എമർജൻസി) ലാൻഡ് ചെയ്യാൻ ശ്രമിച്ചത്. ഫിക്സഡ്-വിംഗ് ബീച്ച്ക്രാഫ്റ്റ് 55 എന്ന ചെറുവിമാനമാണ് അപകടത്തിൽപ്പെട്ടത്. ലാൻഡിംഗിന് തൊട്ടുമുമ്പ് തന്നെ വിമാനത്തിന്റെ എഞ്ചിൻ തകരാർ സംബന്ധിച്ച റിപ്പോർട്ടുകൾ പൈലറ്റ് നൽകിയിരുന്നുവെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു.

അടിയന്തര ലാൻഡിംഗിനിടെ, നിയന്ത്രണം നഷ്ടപ്പെട്ട വിമാനം ഹൈവേയിലൂടെ ഓടിക്കൊണ്ടിരുന്ന ഒരു കാറിൽ ഇടിക്കുകയും തുടർന്ന് റോഡിലൂടെ മുന്നോട്ട് നീങ്ങുകയും ചെയ്തു. ഓടിക്കൊണ്ടിരുന്ന വാഹനങ്ങളുടെ മുകളിലൂടെ പറന്നിറങ്ങിയ വിമാനം, മുൻപിലുണ്ടായിരുന്ന കാറിൽ ഇടിക്കുകയായിരുന്നു. ഈ അപകടത്തിൽ കാറിന് സാരമായ കേടുപാടുകൾ സംഭവിച്ചു.

വിമാനം ഇടിക്കുമ്പോൾ കാറിൽ ഉണ്ടായിരുന്നത് രണ്ട് യുവാക്കളായിരുന്നു. ഇത്രയും വലിയൊരു അപകടം ഉണ്ടായിട്ടും, അവർക്ക് വലിയ പരിക്കുകൾ ഒന്നും ഏൽക്കാതെ അത്ഭുതകരമായി രക്ഷപ്പെടാൻ കഴിഞ്ഞു. ഓടിക്കൊണ്ടിരുന്ന വാഹനങ്ങൾക്ക് മുകളിലൂടെ ഒരു വിമാനം റോഡിലേക്ക് പറന്നിറങ്ങിയിട്ടും കാറിലുണ്ടായിരുന്നവർക്ക് ജീവാപായം ഉണ്ടാകാതിരുന്നത് വലിയ ആശ്വാസമായി.

വിമാനം റോഡിൽ ഇറങ്ങിയതിന് പിന്നാലെ അധികൃതർ ഉടൻ സ്ഥലത്തെത്തി നടപടികൾ സ്വീകരിച്ചു. റോഡിൽ ഗതാഗത തടസ്സമുണ്ടായെങ്കിലും പിന്നീട് അത് നിയന്ത്രിച്ചു.

സംഭവത്തിന്റെ വിശദാംശങ്ങൾ അമേരിക്കയുടെ ഫെഡറൽ ഏവിയേഷൻ അഡ്മിനിസ്ട്രേഷൻ (FAA) സ്ഥിരീകരിച്ചിട്ടുണ്ട്. വിമാനം അടിയന്തരമായി ലാൻഡ് ചെയ്യാനുള്ള സാഹചര്യം എന്തായിരുന്നു എന്നതിനെക്കുറിച്ചും, എഞ്ചിൻ തകരാറ് സംബന്ധിച്ചും വിശദമായ അന്വേഷണം നടക്കുകയാണെന്ന് ഏവിയേഷൻ അഡ്മിനിസ്ട്രേഷൻ അറിയിച്ചു.

വിമാനംഅപകടംഫ്ലോറിഡ

മറുനാടൻ മലയാളി ബ്യൂറോ