അമേരിക്കയെയും മസ്ക്കിന്റെ സ്പേസ് എക്സിനെയും വെല്ലുവിളിച്ച് ചൈനയുടെ പുതിയ നീക്കം; 2 ലക്ഷം ഉപഗ്രഹങ്ങള് വിക്ഷേപിക്കാന് തയ്യാറെടുപ്പ്; സ്റ്റാര് ലിങ്കിനേക്കാള് നാലിരട്ടി ഉപഗ്രഹങ്ങള്; സുരക്ഷാ ഭീഷണിയെന്ന് ആശങ്ക; യുഎസ്-ചൈന യുദ്ധം ഇനി ബഹിരാകാശത്ത്!
യുഎസ്-ചൈന യുദ്ധം ഇനി ബഹിരാകാശത്ത്!
ജനീവ: ബഹിരാകാശത്ത് അമേരിക്കയെയും ഇലോണ് മസ്കിന്റെ സ്പേസ് എക്സിനെയും വെല്ലുവിളിച്ചുകൊണ്ട് ഏകദേശം രണ്ട് ലക്ഷത്തോളം ഉപഗ്രഹങ്ങള് വിക്ഷേപിക്കാനുള്ള ബൃഹദ് പദ്ധതിയുമായി ചൈന രംഗത്തെത്തി. ഏതാണ്ട് 2 ലക്ഷത്തോളം ഉപഗ്രഹങ്ങള് ബഹിരാകാശത്തേക്ക് വിക്ഷേപിക്കാന് അപേക്ഷ സമര്പ്പിച്ചു. ഇത് ഭീമന് ഉപഗ്രഹ ശൃംഖല (മെഗാ-കോണ്സ്റ്റലേഷന്) കെട്ടിപ്പടുക്കാനുള്ള ചൈനയുടെ നീക്കമാണെന്ന ആശങ്കകള്ക്ക് വഴിവെച്ചിരിക്കുകയാണ്. ഐക്യരാഷ്ട്രസഭയുടെ ഭാഗമായ ഇന്റര്നാഷണല് ടെലികമ്മ്യൂണിക്കേഷന് യൂണിയനാണ് (ഐ.ടി.യു.) ചൈന ഈ അപേക്ഷ നല്കിയിരിക്കുന്നത്. ഇത്രയധികം ഉപഗ്രഹങ്ങള് വിക്ഷേപിക്കുന്നത് ഭൂമിയുടെ താഴ്ന്ന ഭ്രമണപഥത്തിലെ മറ്റ് രാജ്യങ്ങളുടെ പ്രവര്ത്തനങ്ങളെ തടസ്സപ്പെടുത്താന് സാധ്യതയുണ്ടെന്നും വിലയിരുത്തലുണ്ട്.
കഴിഞ്ഞ 2025 ഡിസംബര് 29-നാണ് പുതുതായി രൂപീകരിച്ച റേഡിയോ സ്പെക്ട്രം യൂട്ടിലൈസേഷന് ആന്ഡ് ടെക്നോളജിക്കല് ഇന്നൊവേഷന് ഇന്സ്റ്റിറ്റ്യൂട്ട് രണ്ട് ഉപഗ്രഹ ശൃംഖലകള്ക്കായി അപേക്ഷ നല്കിയത്. 'സി.ടി.സി.-1', 'സി.ടി.സി.-2' എന്ന് പേരിട്ടിരിക്കുന്ന ഈ ഓരോ ശൃംഖലയിലും 96,714 ഉപഗ്രഹങ്ങള് വീതം ഉള്പ്പെടും. ഇവ 3,660 വ്യത്യസ്ത ഭ്രമണപഥങ്ങളിലായി വിന്യസിക്കപ്പെടും.
രണ്ട് പദ്ധതികളിലൂടെ ആകെ 1,93,428 ഉപഗ്രഹങ്ങളാണ് വിക്ഷേപിക്കാന് ഒരുങ്ങുന്നത്.
ഈ പദ്ധതി പൂര്ത്തിയാവുകയാണെങ്കില്, സ്പേസ് എക്സിന്റെ സ്റ്റാര്ലിങ്ക് ശൃംഖല വിക്ഷേപിക്കാന് ലക്ഷ്യമിടുന്ന 49,000 ഉപഗ്രഹങ്ങളെക്കാള് വലുതായിരിക്കും ചൈനയുടെ ഈ മെഗാ-കോണ്സ്റ്റലേഷന്. 3,660 വ്യത്യസ്ത ഭ്രമണപഥങ്ങളിലായിട്ടായിരിക്കും ഈ ഉപഗ്രഹങ്ങള് വിന്യസിക്കപ്പെടുക.
'സി.ടി.സി.-1', 'സി.ടി.സി.-2' എന്നിവ സംയോജിക്കുമ്പോള് ബഹിരാകാശത്ത് വിന്യസിക്കപ്പെടുന്ന ഏറ്റവും വലിയ ഉപഗ്രഹ സമൂഹമായി ഇത് മാറും. ഇത് ഫലത്തില് ഭൂമിയുടെ താഴ്ന്ന ഭ്രമണപഥത്തിലെ ഒരു വലിയ മേഖലയില് മറ്റ് രാജ്യങ്ങളുടെയും സ്ഥാപനങ്ങളുടെയും സാന്നിധ്യം ഇല്ലാതാക്കാന് ഇടയാക്കുമെന്നും നിരീക്ഷകര് ചൂണ്ടിക്കാട്ടുന്നു.
സുരക്ഷാ ഭീഷണിയും പ്രതിരോധ നീക്കങ്ങളും
ചൈനയുടെ ഈ നീക്കത്തിന് പിന്നില് സൈനിക താല്പര്യങ്ങളുണ്ടെന്നാണ് അമേരിക്കയുള്പ്പെടെയുള്ള പാശ്ചാത്യ രാജ്യങ്ങള് ഭയപ്പെടുന്നത്. ഉപഗ്രഹങ്ങള് വിന്യസിക്കുന്നതിലൂടെ സുരക്ഷിതമായ ആശയവിനിമയ ശൃംഖലയും ശത്രുക്കളുടെ നീക്കങ്ങള് നിരീക്ഷിക്കാനുള്ള സംവിധാനവും ചൈന ലക്ഷ്യമിടുന്നു. ചൈനയുടെ ചില ഉപഗ്രഹങ്ങള് നിലവില് ഭ്രമണപഥത്തില് അസ്വാഭാവികമായ മാറ്റങ്ങള് വരുത്തുന്നതായി യുഎസ് സ്പേസ് ഫോഴ്സ് നിരീക്ഷിച്ചിട്ടുണ്ട്. ഇത് മറ്റ് രാജ്യങ്ങളുടെ ഉപഗ്രഹങ്ങളെ നശിപ്പിക്കാനോ തടസ്സപ്പെടുത്താനോ ഉള്ള പരീക്ഷണമാകാം എന്ന് സംശയിക്കുന്നു.
അന്താരാഷ്ട്ര നിയമമനുസരിച്ച് ആദ്യം അപേക്ഷിക്കുന്നവര്ക്ക് നിശ്ചിത ഭ്രമണപഥങ്ങളില് മുന്ഗണന ലഭിക്കും. വമ്പന് പദ്ധതികള് പ്രഖ്യാപിച്ച് ബഹിരാകാശത്തെ നിര്ണ്ണായകമായ ഇടങ്ങള് മുന്കൂട്ടി സ്വന്തമാക്കാനുള്ള (Land Grab) തന്ത്രമാണിതെന്ന് നിരീക്ഷകര് കരുതുന്നു. ഈ ഉപഗ്രഹങ്ങളുടെ യഥാര്ത്ഥ ഉപയോഗം സംബന്ധിച്ച് ചൈനീസ് അധികൃതര് മൗനം പാലിക്കുന്നതിനാല്, ഈ ശൃംഖല ഒരു സുരക്ഷാ അല്ലെങ്കില് പ്രതിരോധ ഭീഷണിയായി മാറിയേക്കാമെന്ന് വിദഗ്ധര് ആശങ്ക പ്രകടിപ്പിച്ചിട്ടുണ്ട്.
എന്നാല്, 'ചൈന ഇന് സ്പേസ്' എന്ന പ്രസിദ്ധീകരണം റിപ്പോര്ട്ട് ചെയ്തതനുസരിച്ച്, നാഞ്ചിംഗ് യൂണിവേഴ്സിറ്റി ഓഫ് എയറോനോട്ടിക്സ് ഈ ഉപഗ്രഹങ്ങള് 'താഴ്ന്ന ഭ്രമണപഥത്തിലെ വൈദ്യുതകാന്തിക ബഹിരാകാശ സുരക്ഷ, സംയോജിത സുരക്ഷാ പ്രതിരോധ സംവിധാനങ്ങള്, വ്യോമാതിര്ത്തിയിലെ വൈദ്യുതകാന്തിക ബഹിരാകാശ സുരക്ഷാ വിലയിരുത്തല്, താഴ്ന്ന വ്യോമാതിര്ത്തിയിലെ സുരക്ഷാ മേല്നോട്ട സേവനങ്ങള്' എന്നിവയില് ശ്രദ്ധ കേന്ദ്രീകരിക്കുമെന്നാണ് അവകാശപ്പെടുന്നത്. യു.എസ്. സൈന്യം സുരക്ഷിതമായ ട്രാക്കിംഗിനും ആശയവിനിമയത്തിനും ഉപയോഗിക്കുന്ന സ്പേസ് എക്സിന്റെ സ്റ്റാര്ഷീല്ഡ് ഉപഗ്രഹങ്ങള്ക്ക് സമാനമായ പങ്ക് ഈ ശൃംഖലകള്ക്കും ഉണ്ടായേക്കാമെന്നാണ് ഇത് നല്കുന്ന സൂചന.
ബഹിരാകാശത്ത് സ്പെക്ട്രം വിഹിതം അനുവദിക്കുന്ന ഐ.ടി.യുവില് അപേക്ഷകള് ഫയല് ചെയ്തുകഴിഞ്ഞാല്, ഈ ഭ്രമണപഥങ്ങളില് പുതിയ ഉപഗ്രഹങ്ങള് വിക്ഷേപിക്കാന് ആഗ്രഹിക്കുന്ന മറ്റ് ഓപ്പറേറ്റര്മാര്ക്ക് ചൈനയുടെ ശൃംഖലയുടെ പ്രവര്ത്തനത്തില് തടസ്സമുണ്ടാക്കില്ലെന്ന് ഐ.ടി.യുവിനെ ബോധ്യപ്പെടുത്തേണ്ടിവരും.
ലക്ഷ്യം പ്രായോഗികമാണോ?
ചൈനയുടെ ഈ പ്രഖ്യാപനം എത്രത്തോളം പ്രായോഗികമാണെന്ന കാര്യത്തില് വിദഗ്ധര്ക്ക് സംശയമുണ്ട്. ചൈനയുടെ നിലവിലെ ശേഷിയനുസരിച്ച് പ്രതിവര്ഷം ഏതാണ്ട് നൂറ് ഉപഗ്രഹങ്ങള് മാത്രമേ നിര്മ്മിക്കാന് കഴിയൂ. എന്നാല് ഈ പദ്ധതി പൂര്ത്തിയാക്കാന് ആഴ്ചയില് 500 ഉപഗ്രഹങ്ങള് വീതം ഏഴ് വര്ഷം തുടര്ച്ചയായി വിക്ഷേപിക്കേണ്ടി വരും.
റുവാണ്ട പോലുള്ള രാജ്യങ്ങള് മുമ്പ് ലക്ഷക്കണക്കിന് ഉപഗ്രഹങ്ങള്ക്കായി അപേക്ഷ നല്കിയിരുന്നെങ്കിലും അവ നടപ്പായിരുന്നില്ല. ഇതേപോലെ ബഹിരാകാശത്ത് തങ്ങളുടെ സ്ഥലം ഉറപ്പിക്കാന് ചൈന നല്കിയ ഒരു 'ഡമ്മി' അപേക്ഷയാണിതെന്ന് സെക്യുര് വേള്ഡ് ഫൗണ്ടേഷന് സൂചിപ്പിക്കുന്നു.
യുഎസ്-ചൈന മത്സരത്തിന്റെ അടുത്ത ഘട്ടം
ചന്ദ്രനില് സ്ഥിരമായ താവളം നിര്മ്മിക്കാനുള്ള മത്സരത്തിന് പിന്നാലെയാണ് ഇപ്പോള് ഭൂമിയുടെ ഭ്രമണപഥത്തിന് വേണ്ടിയുള്ള ഈ യുദ്ധം. യുക്രെയ്ന് യുദ്ധത്തില് സാറ്റലൈറ്റ് ആശയവിനിമയം നിര്ണ്ണായകമായതോടെ, ബഹിരാകാശം ഒരു പുതിയ യുദ്ധക്കളമായി മാറുകയാണ്.
