വാഷിങ്ടൺ: അതിശക്തമായ മഞ്ഞുവീഴ്ചയിലും ശീതക്കാറ്റിലും അമേരിക്കൻ ജനജീവിതം ദുരിതത്തിൽ. രാജ്യത്തിന്റെ വിവിധ ഭാഗങ്ങളിലായി ഇതുവരെ 20 പേർ മരിച്ചതായാണ് റിപ്പോർട്ട്. ഏഴുലക്ഷത്തിലേറെ ഉപഭോക്താക്കൾക്ക് വൈദ്യുതി തടസ്സപ്പെടുകയും പതിനായിരത്തിലേറെ വിമാന സർവീസുകൾ റദ്ദാക്കുകയും ചെയ്തതോടെ രാജ്യമെങ്ങും കടുത്ത പ്രതിസന്ധിയിലാണ്.

മരണസംഖ്യയിൽ ന്യൂയോർക്കിൽ മാത്രം എട്ടുപേർ ഉൾപ്പെടുന്നു. കഴിഞ്ഞ വെള്ളിയാഴ്ച രാത്രി ആറുപേരെ മരിച്ച നിലയിൽ കണ്ടെത്തിയപ്പോൾ, ശനിയാഴ്ചയും ഞായറാഴ്ചയും ഓരോ മരണങ്ങൾ റിപ്പോർട്ട് ചെയ്യപ്പെട്ടു. ഈ മരണങ്ങളെല്ലാം അതിശൈത്യവുമായി നേരിട്ട് ബന്ധപ്പെട്ടതാണോ എന്ന് ഇപ്പോൾ പറയാനാകില്ലെന്ന് ന്യൂയോർക്ക് പോലീസ് അറിയിച്ചു. അതേസമയം, മരിച്ചവരിൽ പലരും ഭവനരഹിതരാണെന്ന് പോലീസ് സ്ഥിരീകരിച്ചു.

കനത്ത മഞ്ഞുവീഴ്ചയെ തുടർന്ന് രാജ്യവ്യാപകമായി ഏഴുലക്ഷത്തിലേറെ ഉപഭോക്താക്കൾക്ക് വൈദ്യുതി തടസ്സപ്പെട്ടു. ടെന്നസിയിലാണ് ഏറ്റവും കൂടുതൽ പേരെ ബാധിച്ചത്. ഇവിടെ മാത്രം 2.47 ലക്ഷം ഉപഭോക്താക്കൾക്ക് വൈദ്യുതി ലഭ്യമല്ല. മിസിസിപ്പി, ടെക്സസ്, വിർജീനിയ തുടങ്ങിയ സംസ്ഥാനങ്ങളിലും സമാനമായ സ്ഥിതിയാണ്. കൂടാതെ, ശീതക്കാറ്റും മഞ്ഞുവീഴ്ചയും കാരണം പതിനായിരത്തിലേറെ വിമാന സർവീസുകൾ യുഎസിൽ റദ്ദാക്കിയിട്ടുണ്ട്.

ന്യൂയോർക്കിലെ ഹഡ്സൺ വാലി, മസാച്യുസെറ്റ്സ്, ഇലിനോയി, മിസൗറി, ബോസ്റ്റൺ, ഒഹായോ വാലി തുടങ്ങിയ മേഖലകളിൽ കനത്ത മഞ്ഞുവീഴ്ച രേഖപ്പെടുത്തി. മഞ്ഞുവീഴ്ച തുടരുകയാണെന്നും ഇന്നും ഒന്നുമുതൽ അഞ്ച് ഇഞ്ച് വരെ മഞ്ഞുവീഴ്ച പ്രതീക്ഷിക്കുന്നതായും മസാച്യുസെറ്റ്സ് ഗവർണർ മൗറ ഹീലി അറിയിച്ചു. നിലവിലെ സാഹചര്യത്തിൽ യാത്രകൾ ഒഴിവാക്കി വീടുകളിൽ കഴിയണമെന്നും ഗവർണർ ജനങ്ങളോട് അഭ്യർഥിച്ചു.

ന്യൂ മെക്സിക്കോ മുതൽ മെയ്ൻ വരെയുള്ള 10 കോടിയിലധികം ആളുകൾക്ക് ശീതക്കാറ്റ് മുന്നറിയിപ്പ് നൽകിയിരുന്നു. പല പ്രദേശങ്ങളിലും താപനില പൂജ്യത്തിന് താഴെയാകുമെന്ന് മുന്നറിയിപ്പ് നൽകിയിട്ടുണ്ട്. റോഡുകൾ ഗതാഗതയോഗ്യമല്ലാതാവുകയും ജനജീവിതം സ്തംഭിക്കുകയും ചെയ്തു. മഞ്ഞ് നീക്കം ചെയ്യുന്നതിനിടെയുണ്ടായ അപകടങ്ങളും അതിശൈത്യമേറ്റുള്ള മരണങ്ങളും റിപ്പോർട്ട് ചെയ്യപ്പെട്ടിട്ടുണ്ട്. ഞായറാഴ്ച രാത്രി മെയ്‌നിലെ ബാംഗോറിൽ ഒരു ചെറുവിമാനം തകർന്ന് ആറ് പേർ മരിച്ചതും കൊടുങ്കാറ്റുമായി ബന്ധപ്പെട്ട അപകടങ്ങളിൽപ്പെടുന്നു. ഈ അപകടത്തിൽ ആരും രക്ഷപ്പെട്ടില്ലെന്ന് വിമാനത്താവള അധികൃതർ അറിയിച്ചു.

ശീതക്കാറ്റിനെത്തുടർന്നുണ്ടായ നാശനഷ്ടങ്ങളിൽ നിന്ന് കരകയറാൻ സംസ്ഥാനത്തെ സഹായിക്കുന്നതിന് നാഷണൽ ഗാർഡിന് അനുമതി നൽകിക്കൊണ്ടുള്ള എക്സിക്യൂട്ടീവ് ഉത്തരവിൽ മിസിസിപ്പി ഗവർണർ ടെയ്റ്റ് റീവ്സ് ഒപ്പുവച്ചു. കൊടുങ്കാറ്റ് ഉണ്ടാക്കാവുന്ന ഗുരുതരമായ നാശനഷ്ടങ്ങൾ മുൻകൂട്ടി കണ്ട് നാഷണൽ ഗാർഡ് ഉദ്യോഗസ്ഥർ കഴിഞ്ഞ ഒരാഴ്ചയായി വിന്യാസത്തിന് തയ്യാറെടുക്കുകയായിരുന്നുവെന്ന് ഗവർണർ തിങ്കളാഴ്ച ഉച്ചയ്ക്ക് ശേഷം നടന്ന പത്രസമ്മേളനത്തിൽ അറിയിച്ചു. ആദ്യഘട്ടത്തിൽ 500 നാഷണൽ ഗാർഡ് അംഗങ്ങളെയാണ് വിന്യസിക്കുകയെന്നും, എന്നാൽ കൂടുതൽ സൈനികരുടെ സഹായം വേണ്ടിവരുമെന്നും അദ്ദേഹം കൂട്ടിച്ചേർത്തു. നാഷണൽ ഗാർഡിന്റെ പ്രധാന ശ്രദ്ധ ലോജിസ്റ്റിക്കൽ പിന്തുണയിലായിരിക്കുമെന്നും എന്നാൽ ആവശ്യമായ മറ്റ് സഹായങ്ങളും നൽകുമെന്നും മേജർ ജനറൽ ബോബി ഗിൻ ജൂനിയർ അറിയിച്ചു.

മഞ്ഞുവീഴ്ചശീതക്കാറ്റ്അമേരിക്ക

സ്വന്തം ലേഖകൻ