ലോക്ഭവനില് ക്രിസ്മസ് ഇല്ല! അവധി റദ്ദാക്കിയത് വാജ്പേയിയുടെ ജന്മദിനം പ്രമാണിച്ച്; വ്യാഴാഴ്ച രാവിലെ 10 മണിക്ക് എല്ലാ ജീവനക്കാരും നിര്ബന്ധമായും പങ്കെടുക്കണമെന്ന് ലോക്ഭവന് കണ്ട്രോളറുടെ കര്ശന നിര്ദ്ദേശം; ഉത്തരവിറങ്ങിയത് യുപിയില് സ്കൂളുകള്ക്ക് അവധി റദ്ദാക്കിയതിന് പിന്നാലെ
ലോക്ഭവനില് ക്രിസ്മസ് ഇല്ല!
തിരുവനന്തപുരം: മുന് പ്രധാനമന്ത്രി അടല് ബിഹാരി വാജ്പേയിയുടെ ജന്മദിനം പ്രമാണിച്ച് യുപിയില് ക്രിസ്മസ് അവധി റദ്ദാക്കിയതിന് സമാനമായി സംസ്ഥാനത്ത് ലോക്ഭവനിലും സമാനമായ ഉത്തരവിറങ്ങി. ക്രിസ്മസ് ദിനമായ നാളെ അവധി ഒഴിവാക്കി എല്ലാ ജീവനക്കാരും നിര്ബന്ധമായും ഹാജരാകണമെന്ന് ലോക്ഭവന് കണ്ട്രോളര് ഉത്തരവിട്ടു.
വാജ്പേയിയുടെ ജന്മദിനം 'ഗുഡ് ഗവേണന്സ്' ദിനമായി ആഘോഷിക്കുന്നതിന്റെ ഭാഗമായാണ് അവധി റദ്ദാക്കിയത്. നാളെ രാവിലെ 10 മണിക്ക് നടക്കുന്ന ചടങ്ങില് എല്ലാ ജീവനക്കാരും നിര്ബന്ധമായും പങ്കെടുക്കണമെന്നാണ് ലോക്ഭവന് കണ്ട്രോളറുടെ കര്ശന നിര്ദ്ദേശം. യോഗി ആദിത്യനാഥ് സര്ക്കാര് യുപിയില് സ്കൂളുകള്ക്ക് അവധി റദ്ദാക്കിയതിന് പിന്നാലെയാണ് ലോക്ഭവനിലും സമാനമായ നീക്കം നടക്കുന്നത്.
അതേസമയം, ലോകത്തിനാകെ വെളിച്ചംപകരുന്ന സന്ദേശത്തിന്റെ പ്രഭകെടുത്തും വിധം ക്രിസ്മസ് ആഘോഷങ്ങളെപ്പോലും കടന്നാക്രമിക്കുന്ന അവസ്ഥ അസ്വസ്ഥപ്പെടുത്തുന്നതാണെന്ന് മുഖ്യമന്ത്രി പിണറായി വിജയന് പറഞ്ഞു. മധ്യപ്രദേശ്, ഉത്തര്പ്രദേശ്, ഝാര്ഖണ്ഡ്, കര്ണാടക, ചത്തീസ്ഗഢ് മുതലായ സംസ്ഥാനങ്ങളില് ഇത്തരം ആക്രമണങ്ങള് നടക്കുന്നതിന്റെ വാര്ത്തകള് പുറത്തുവരികയാണ്. സംഘപരിവാര് ശക്തികളാണ് എല്ലാ ആക്രമങ്ങള്ക്കും പിന്നിലെന്നും മുഖ്യമന്ത്രി വാര്ത്താസമ്മേളനത്തില് പറഞ്ഞു.
'ഉത്തര്പ്രദേശ് സര്ക്കാര് ക്രിസ്മസ് അവധി തന്നെ റദ്ദാക്കി. ഈ ദിവസം വിദ്യാര്ഥികളുടെ ഹാജര് നിര്ബന്ധമാക്കി. ഇതില്നിന്നെല്ലാം കേരളം വിട്ടുനില്ക്കും എന്നാണ് എല്ലാവരുടെയും ബോധ്യം. എന്നാല് ആ ബോധ്യത്തെ ഇല്ലാതാക്കാനുള്ള ശ്രമങ്ങള് നടക്കുന്നു. സംസ്ഥാനത്തെ തപാല് ഓഫീസുകളില് ക്രിസ്മസ് ആഘോഷപരിപാടിയില് ആര്എസ്എസിന്റെ ഗണഗീതം ആലപിക്കണമെന്ന് ബിഎംഎസ് യൂണിയന് ആവശ്യപ്പെട്ടു. ഇതിനെതിരെ പ്രതിഷേധം ഉയര്ന്നതോടെ ജീവനക്കാരുടെ കൂട്ടായ്മകള് ഓഫീസുകളില് നടത്താനിരുന്ന ക്രിസ്മസ് ആഘോഷം തന്നെ റദ്ദാക്കാന് ചീഫ് പോസ്റ്റ് മാസ്റ്റര് ജനറല് തീരുമാനിച്ചു. പാലക്കാട് പുതുശേരിയില് കുട്ടികള് അടങ്ങുന്ന കരോള് സംഘത്തിനുനേരെ സംഘപരിവാര് ആക്രമണം ഉണ്ടായി. ഈ അക്രമിസംഘത്തെ ന്യായീകരിച്ചാണ് ബിജെപി നേതാക്കള് രംഗത്തുവന്നത്. കരോള്സംഘത്തെ അവഹേളിക്കുകയും ചെയ്തു. അക്രമങ്ങള് നടത്തിയവര്ക്കെതിരെ കര്ശന നടപടി സ്വീകരിച്ചിട്ടുണ്ട്. ചില സ്വകാര്യ സ്കൂളുകളില് ക്രിസ്മസ് ആഘോങ്ങള് നടത്തുന്നതിനെതിരെ ആര്എസ്എസ് അനുകൂല സംഘടനകള് ഭീഷണിപ്പെടുത്തുന്നുവെന്നും റിപ്പോര്ട്ടുകളുണ്ട്.
ഇത്തരം സംഭവങ്ങള്ക്കെതിരെ അടിയന്തര അന്വേഷണം നടത്താന് സര്ക്കാര് ഉത്തരവിട്ടിട്ടുണ്ട്. ആഘോഷങ്ങള് നടത്തുന്നവര്ക്കെതിരെയും, മതപരമായ വിവേചനംകാട്ടുന്ന സ്കൂളുകള്ക്കെതിരെയും കര്ശന നടപടി ഉണ്ടാകും. കേരളത്തില് ഇത്തരം ശക്തികള് തലപൊക്കുന്നു എന്നത് ഗൗരവതരമാണ്. ഭരണഘടന അനുവദിച്ചു നല്കുന്ന മൗലികാവകാശങ്ങള്ക്കെതിരായ ഒരു കടന്നുകയറ്റത്തെയും അംഗീകരിക്കില്ല.
രാജ്യത്തിന്റെ ബഹുസ്വരതയെ എതിര്ക്കുന്നവരാണ് വിപ്രതിപത്തിവെച്ചുപുലര്ത്തുന്ന സംഘവരിവാര്. കഴിഞ്ഞവര്ഷം ഇതേസമയത്ത് കേക്കും കൊണ്ട് ക്രൈസ്തവ ഭവനങ്ങളിലും ആരാധനാലയങ്ങളിലും സന്ദര്ശനം നടത്തിയവരാണ് ഇപ്പോള് ക്രിസ്മസ് കരോള് സംഘത്തെ ആക്രമിച്ചത്. 2025 ഏപ്രില് നാലിന് ആര്എസ്എസ് മുഖപത്രമായ ഓര്ഗനൈസറില് ക്രിസ്ത്യന് സ്ഥാപനങ്ങളുടെ സ്വത്തിനെക്കുറിച്ച് ലേഖനം പ്രത്യക്ഷപ്പെട്ടതും ആര്എസ്എസിന്റെ ഉള്ളിലിരുപ്പ് കാട്ടിത്തന്നു. അപരമത വിദ്വേഷം പരത്തി മതനിരപേക്ഷതയെ കളങ്കപ്പെടുത്തുന്ന സംഘപരിവാര് ശ്രമങ്ങളെ നാട് ഒരുതരത്തിലും അംഗീകരിക്കില്ലെന്നും മുഖ്യമന്ത്രി പറഞ്ഞു.
