ഉം ഹെൽത്തി ഹെൽത്തി..! റിച്ച് ക്രീമി 'ബീഫ്' പ്രിയനായ പുടിൻ രാഷ്ട്രപതി ഭവനില് എത്തിയ ഉടനെ ആദ്യം ട്രൈ ചെയ്തത് 'മുരിങ്ങയില ചാർ'; പ്രെസിഡന്റിനോടൊപ്പം ഡിന്നർ ടേബിളിൽ കൂട്ടായി മോദിയും; രുചിയോടെ വിളമ്പിയ 'വെജ്' വിഭവങ്ങളിൽ എല്ലാം കൗതുകം; ചട്ട്ണി മുതൽ ഹൈദരാബാദി സ്പെഷ്യൽ പലഹാരങ്ങൾ വരെ; മെനുവിൽ തിളങ്ങിയ ഇന്ത്യൻ ഭക്ഷണങ്ങൾ ഇതാണ്..
ഡൽഹി: റഷ്യൻ പ്രസിഡന്റ് വ്ലാഡിമിർ പുടിന്റെ ഇന്ത്യാ സന്ദർശനത്തോടനുബന്ധിച്ച് രാഷ്ട്രപതി ഭവനിൽ ഒരുക്കിയ വിരുന്നിന്റെ മെനു അന്താരാഷ്ട്ര ശ്രദ്ധ നേടുകയാണ്. വെറുമൊരു അത്താഴവിരുന്നിനപ്പുറം, ഇന്ത്യയുടെ സമ്പന്നമായ സാംസ്കാരിക, പ്രാദേശിക രുചിവൈവിധ്യത്തെ ലോകനേതാവിന് മുന്നിൽ അവതരിപ്പിക്കാനുള്ള നയതന്ത്രപരമായ നീക്കം കൂടിയായിരുന്നു ഇത്.
രാഷ്ട്രപതി ദ്രൗപദി മുർമു ആതിഥേയത്വം വഹിച്ച ഈ വിരുന്ന്, ഇന്ത്യയുടെ പാചക പാരമ്പര്യവും, ഔദാര്യവും, ആരോഗ്യകരമായ ഭക്ഷണരീതിയോടുള്ള പ്രതിബദ്ധതയും വിളിച്ചോതുന്നതായിരുന്നു. കശ്മീരിലെ അപൂർവ്വ വിഭവങ്ങൾ മുതൽ ദക്ഷിണേന്ത്യൻ രസം വരെ ഉൾക്കൊള്ളിച്ച ഈ സദ്യ പൂർണ്ണമായും സസ്യാഹാരം ആയിരുന്നു എന്നതാണ് ശ്രദ്ധേയം.
ഉന്നതതല സന്ദർശനങ്ങളിൽ വിഭവസമൃദ്ധമായ വിരുന്നുകൾ ഒരുക്കുന്നത് പതിവാണെങ്കിലും, പുതിനായ്ക്ക് ഒരുക്കിയ ഈ സദ്യയിൽ ലാളിത്യവും പൈതൃകവും സമന്വയിപ്പിച്ചു. പ്രാദേശിക വൈവിധ്യങ്ങളെ മുൻനിർത്തി, കാലത്തിനനുസരിച്ചുള്ള ചേരുവകൾ ഉപയോഗിച്ച്, നൂറ്റാണ്ടുകളുടെ പാചക അറിവുകൾ ഉൾക്കൊണ്ടുകൊണ്ടുള്ള ഒരു തീൻമേശയാണ് ഇന്ത്യ ഒരുക്കിയത്. ഓരോ വിഭവത്തിലൂടെയും സ്വന്തം കഥ പറയുകയായിരുന്നു ഇന്ത്യ - കുങ്കുമത്തിലൂടെ, പരിപ്പിലൂടെ, വ്യത്യസ്തയിനം റൊട്ടികളിലൂടെ. പരമ്പരാഗതമായ 'താലി സ്റ്റൈലിൽ' ആയിരുന്നു അതിഥികൾക്ക് ഭക്ഷണം വിളമ്പിയത്.
വിരുന്നിന് തുടക്കമിട്ടത് 'മുരിങ്ങയില ചാറു' എന്ന സൂപ്പാണ്. മുരിങ്ങയിലയും ചെറുപയറും ചേർത്ത്, കറിവേപ്പിലയുടെയും മറ്റ് സുഗന്ധവ്യഞ്ജനങ്ങളുടെയും essence-ൽ തയ്യാറാക്കിയ ദക്ഷിണേന്ത്യൻ രസത്തിന്റെ രൂപത്തിലുള്ള ഈ സൂപ്പ്, വിരുന്നിന്റെ തുടക്കത്തിൽ തന്നെ ആരോഗ്യകരമായ ഒരു അനുഭവം നൽകി.
അപ്പറ്റൈസറുകളിൽ (മുൻഭക്ഷണങ്ങൾ) വൈവിധ്യത്തിന്റെ ഒരു ഘോഷയാത്ര തന്നെയായിരുന്നു. കശ്മീരി വിഭവമായ 'ഗുച്ചി ദൂൺ ചേതിൻ' അതിലൊന്നായായിരുന്നു. കശ്മീരി വാൽനട്ട് ചട്ണി ഉപയോഗിച്ച് സ്റ്റഫ് ചെയ്ത അപൂർവ്വയിനം കൂണുകളാണ് (Morels) ഇതിനായി ഉപയോഗിച്ചത്. കൂടാതെ, കറുത്ത കടല ഉപയോഗിച്ച് ഗ്രിൽ ചെയ്ത കബാബുകളായ 'കാളേ ചനേ കേ ശിഖംപുരി കബാബ്സ്' ഷീർമാലിനൊപ്പം വിളമ്പി. ഡംപ്ലിങ്സുകളോട് സാദൃശ്യമുള്ളതും, വാട്ടർ ചെസ്റ്റ്നട്ടും മസാല തക്കാളി ചട്ണിയും ചേർത്ത 'വെജിറ്റബിൾ ഝോൾ മോമോസും' വിരുന്നിന് മാറ്റ് കൂട്ടി.
പ്രധാന വിഭവങ്ങളിൽ, ഇന്ത്യയുടെ വൈവിധ്യമാർന്ന പാചകരീതി പ്രതിഫലിച്ചു. സഫ്രാനി പനീർ റോൾ, പാലക് മേത്തി മട്ടർ കാ സാഗ്, തന്തൂരി ഭർവാൻ ആലൂ (സ്റ്റഫ് ചെയ്ത ഉരുളക്കിഴങ്ങ്), അച്ചാരി ബൈംഗൻ (അച്ചാർ രുചിയിലുള്ള വഴുതനങ്ങ), കൂടാതെ ക്ലാസിക് വിഭവമായ യെല്ലോ ദാൽ തഡ്ക എന്നിവ ഉൾപ്പെടുത്തിയിരുന്നു. ഇതിനൊപ്പം സുഗന്ധം നിറഞ്ഞ ഡ്രൈ ഫ്രൂട്ട്സ് ആൻഡ് സഫ്രോൺ പുലാവ് വിളമ്പി. പുലാവിനൊപ്പം ലച്ച പറാത്ത, മഗാസ് നാൻ, സതനജ് റോട്ടി, മിസ്സി റോട്ടി തുടങ്ങി വിവിധ പ്രാദേശിക ഇന്ത്യൻ ബ്രെഡുകളും ഒരുക്കി.
മധുരപലഹാരങ്ങൾ ശ്രദ്ധയോടെ തിരഞ്ഞെടുത്തവയായിരുന്നു. ബദാം ഉപയോഗിച്ച് സാവധാനം പാകം ചെയ്ത ബദാം കാ ഹൽവ, കുങ്കുമപ്പൂവും പിസ്തയും ഏലക്കയും ചേർത്ത കേസർ-പിസ്ത കുൽഫി എന്നിവയാണ് പ്രധാന മധുരങ്ങളായി വിളമ്പിയത്. ഇതിനുപുറമെ, ബംഗാളി വിഭവമായ ഗുർ സന്ദേശ്, ദക്ഷിണേന്ത്യൻ പലഹാരമായ മുറുക്ക് എന്നിവയും സൈഡ് ഡിഷായി ഉണ്ടായിരുന്നു. ബീറ്റ്റൂട്ട്, ഖമാൻ കക്കടി തുടങ്ങിയ സാലഡുകൾക്കൊപ്പം, ഗൊൻഗുര അച്ചാർ, മാങ്ങ ചട്ണി, ബൂന്ദി റൈത്ത, വാഴയ്ക്ക ചിപ്സ് എന്നിവയും ഒരുക്കിയിരുന്നു. മാതളനാരകം, ഓറഞ്ച്, കാരറ്റ്-ഇഞ്ചി എന്നിവയുടെ ജ്യൂസുകളാണ് പാനീയമായി നൽകിയത്.
