റിപ്പോര്‍ട്ടര്‍ ടിവി ന്യൂസ് ഡസ്‌കിലെ പീഡനാരോപണത്തില്‍ പരാതി നല്‍കിയില്ലെന്ന അരുണ്‍ കുമാറിന്റെ വാദം പൊളിഞ്ഞു; സീനിയര്‍ എച്ച് ആറിനോട് ദുരനുഭവം പറയാന്‍ ശ്രമിച്ചിട്ടും മറുപടി ഉണ്ടായില്ലെന്ന് അഞ്ജന അനില്‍ കുമാര്‍; സ്ഥാപനത്തില്‍ ഐ സിസി ഉണ്ടെന്ന് ഇപ്പോഴാണ് അറിയുന്നതെന്നും മുന്‍ റിപ്പോര്‍ട്ടര്‍; ചാനലിനെതിരെ ശക്തമായ പ്രതിഷേധം തുടര്‍ന്ന് കോണ്‍ഗ്രസ്
റിപ്പോര്‍ട്ടര്‍ ടിവി ന്യൂസ് ഡസ്‌കിലെ പീഡനാരോപണത്തില്‍ പരാതി നല്‍കിയില്ലെന്ന അരുണ്‍ കുമാറിന്റെ വാദം പൊളിഞ്ഞു
കൊച്ചി: റിപ്പോര്‍ട്ടര്‍ ടിവിയിലെ പീഡനാരോപണത്തില്‍ കൈകഴുകാന്‍ നോക്കിയ കണ്‍സള്‍ട്ടിങ്ങ് എഡിറ്റര്‍ അരുണ്‍ കുമാറിനെ വെട്ടിലാക്കി മുന്‍ ജീവനക്കാരി അഞ്ജന അനില്‍കുമാറിന്റെ പുതിയ കുറിപ്പ്. ചാനലിലെ ആര്‍ക്കും പരാതി നല്‍കിയിട്ടില്ല എന്നതായിരുന്നു വെള്ളിയാഴ്ച അരുണ്‍ കുമാര്‍ ഇട്ട ഫേസ്ബുക്ക് കുറിപ്പിലെ വാദം. രണ്ട് മാസങ്ങള്‍ക്ക് മുമ്പ് നടന്ന എക്‌സിറ്റ് അഭിമുഖത്തിലോ, സ്ഥാപനത്തിലെ ആഭ്യന്തര അന്വഷണ കമ്മിറ്റിക്കു (ICC) മുന്നിലോ, രാജിക്കത്തിലോ ഒരു സൂചന പോലും ഉണ്ടായിരുന്നില്ലെന്നാണ് അരുണ്‍ കുമാര്‍ കഴിഞ്ഞ ദിവസം മറുപടി നല്‍കിയത്. എന്നാല്‍ സ്ഥാപനത്തില്‍ ഒരു ICC പ്രവര്‍ത്തിക്കുന്നുണ്ട് എന്നറിയുന്നത് ഇപ്പോഴാണെന്നാണ് പുതിയ കുറിപ്പില്‍ അഞ്ജന മറുപടി നല്‍കിയത്. കൂടാതെ തനിക്ക് നേരിടേണ്ടി വന്ന ദുരനുഭവം HR (ഹ്യൂമന്‍ റിസോഴ്‌സസ് വിഭാഗം)നോട് പറഞ്ഞതായും അഞ്ജന വെളിപ്പെടുത്തി. കോണ്‍ഗ്രസ് നേതാക്കള്‍ അഞ്ജനയുടെ ആരോപണം വലിയ രീതിയില്‍ ആയുധമാക്കുന്നതിനിടെയിലാണ് അരുണ്‍ കുമാര്‍ വിശദീകരണവുമായി രം ഗത്തെത്തിയത്. എന്നാല്‍ പുതിയ വെളിപ്പെടുത്തല്‍ അരുണ്‍ കുമാറിന്റെ വാദങ്ങളുടെ മുനയൊടിക്കുന്നതാണ്.
അഞ്ജനയുടെ പുതിയ കുറിപ്പ് ഇങ്ങനെ
രണ്ട് മാസങ്ങള്‍ക്ക് മുമ്പ് നടന്ന എക്‌സിറ്റ് അഭിമുഖത്തിലോ, സ്ഥാപനത്തിലെ ICC യ്ക്കു മുന്നിലോ, രാജിക്കത്തിലോ ഇതിനെക്കുറിച്ച് ഒരു സൂചന പോലും ഉണ്ടായിരുന്നില്ല.' ശരിയാണ്, എഡിറ്റോറിയല്‍ ടീമിലുള്ള ഒരു അംഗത്തിന് പോലും ഈ വിഷയത്തെക്കുറിച്ച് ഞാന്‍ ഒരു സൂചന പോലും നല്‍കിയിട്ടില്ല. സ്ഥാപനത്തില്‍ ഒരു ICC പ്രവര്‍ത്തിക്കുന്നുണ്ട് എന്നറിയുന്നത് ഇപ്പോഴാണ്. എന്തുണ്ടെങ്കിലും HR നോട് പറയണം എന്നാണ് പഠിപ്പിച്ചിട്ടുള്ളത്. അങ്ങനെയാണ് എല്ലാ കാര്യങ്ങളിലും ചെയ്തിട്ടുള്ളത്. രാജിവെക്കുന്ന വിവരം അറിയിക്കാനായി സീനിയര്‍ HR നെ വിളിച്ചു, മെസ്സേജ് അയച്ചു. രണ്ടിനും മറുപടി ഇല്ലായിരുന്നു. ഒടുവില്‍ ജൂണ്‍ 23 ന് രാത്രി 10 മണിയോടെ ഞാന്‍ രാജി കത്ത് മെയില്‍ ചെയ്തു. ജൂണ്‍ 24 ന് രാവിലെ 9.30 യോടെ രാജി സ്വീകരിച്ചതായി മെയില്‍ വന്നു. എന്തിനാണ് രാജിവെക്കുന്നത് എന്ന ഒരു ചോദ്യം പോലും ഇല്ലായിരുന്നു. എന്റെ പ്രശ്നങ്ങള് അവര്‍ക്ക് കൃത്യമായി അറിയാമായിരുന്നു.
എക്‌സിറ്റ് അഭിമുഖം? അങ്ങനെ ഒന്ന് ഉണ്ടായിട്ടില്ല. ആരോഗ്യസ്ഥിതി ഭേദപ്പെട്ടതിന് ശേഷം ഈ മാസം 4 ന് ഞാന്‍ സ്ഥാപനത്തില്‍ പോയി Relieving formalities പൂര്‍ത്തിയാക്കി. അന്ന് അവര്‍ എന്റെ മുഖത്ത് പോലും നോക്കിയില്ല. ഇപ്പോള്‍ ഞാന്‍ ഉന്നയിച്ച വിഷയം ഇവരെ നേരില്‍ കണ്ട് പറയാനായി ഒരുങ്ങിയതാണ് പലവട്ടം. പറഞ്ഞു തുടങ്ങിയപ്പോള്‍ തന്നെ സ്ഥിരം തന്ത്രങ്ങള്‍ എടുത്തു തുടങ്ങി. പിന്നീട് അത് പൂര്‍ത്തീകരിക്കാന്‍ നിന്നില്ല. അതുകൊണ്ട് ഗുണമുണ്ടാകുമെന്ന് തോന്നിയില്ല. 'It's ok, it happens, I can understand ' എന്ന readymade വാക്കുകള്‍ക്കപ്പുറം ഒന്നും നടക്കില്ല. ഇപ്പോള്‍ ആ സ്ഥാപനത്തില്‍ ജോലി ചെയ്യുന്നില്ല. അതുകൊണ്ടുതന്നെ ഇനി ഒരു പരാതി അവിടെ നല്‍കുന്നതില്‍ അര്‍ത്ഥമുണ്ടെന്ന് തോന്നുന്നില്ല. പരാതി ഇല്ലെങ്കിലും അന്വേഷിക്കുമെന്നതാണ് നിലപാട് എന്ന് അറിയുന്നു. അതില്‍ സന്തോഷമുണ്ട് ഇനിയും ഒരുപാട് പേര്‍ക്ക് പ്രശ്നങ്ങള് പുറത്ത് പറയാനുള്ള അവസരങ്ങള്‍ ഒരുങ്ങട്ടെ.
എന്ന് പറഞ്ഞാണ് അഞ്ജന കുറിപ്പ് അവസാനിപ്പിക്കുന്നത്
തന്റെ ആദ്യ പോസ്റ്റിലെ ആരോപണങ്ങളില്‍ വ്യക്തത വരുത്തി അഞ്ജന വെള്ളിയാഴ്ച വീഡിയോ പോസ്റ്റ് ചെയ്തിരുന്നു. ഇത്തരം സാഹചര്യങ്ങളില്‍ പെണ്‍കുട്ടികള്‍ എന്തുകൊണ്ടാണ് പരാതി പറയാന്‍ വിമുഖത കാണിക്കുന്നതെന്ന് വ്യക്തമാക്കാനാണ് താന്‍ പോസ്റ്റിട്ടതെന്ന അഞ്ജന പറഞ്ഞു. റിപ്പോര്‍ട്ടര്‍ ടിവി ന്യൂസ് ഡസ്‌കില്‍ തന്നോട് മോശമായി പെരുമാറിയ സീനിയറിന് എതിരെ നിയമനടപടിക്കില്ലെന്നും അദ്ദേഹത്തിന് ഇത്തരം മോശം രീതികള്‍ ആവര്‍ത്തിക്കാതിരിക്കാന്‍ താക്കീത് നല്‍കിയാല്‍ മതിയെന്നും പറഞ്ഞുകൊണ്ടാണ് അഞ്ജന വീഡിയോ അവസാനിപ്പിച്ചത്.
അഞ്ജനയുടെ വീഡിയോയോട് പ്രതികരിച്ച് അരുണ്‍ കുമാര്‍ ഇട്ട കുറിപ്പ്
74 ശതമാനത്തോളം വനിതകള്‍ ജോലി ചെയ്യുന്ന മാധ്യമ സ്ഥാപനമാണ് റിപ്പോര്‍ട്ടര്‍ . രണ്ട് മാസങ്ങള്‍ക്ക് മുമ്പ് നടന്ന എക്‌സിറ്റ് അഭിമുഖത്തിലോ, സ്ഥാപനത്തിലെ ICC യ്ക്കു മുന്നിലോ, രാജിക്കത്തിലോ ഒരു സൂചന പോലും ഉണ്ടായിരുന്നില്ല. നിയമ നടപടിയല്ല താക്കീത് മതി എന്നാണ് ഇപ്പോള്‍ ആവശ്യപ്പെടുന്നതെങ്കിലും ഞങ്ങളുടെ പഴയ സഹപ്രവര്‍ത്തകയ്ക്ക് നേരിട്ടതായി പറയപ്പെടുന്ന ദുരനുഭവത്തെക്കുറിച്ച് പരാതി ഇല്ലെങ്കില്‍ പോലും അന്വേഷിക്കാം എന്നാണ് എന്റെയും എഡിറ്റോറിയല്‍ ടീമിന്റെയും നിലപാട്. സംശയത്തിന്റെ നിഴലില്‍ നിര്‍ത്താതെ വ്യക്തത വരുത്തിയതിന് നന്ദി!
അഞ്ജനയുടെ ആദ്യ കുറിപ്പ്
എന്തുകൊണ്ടാണ് രാഹുല്‍ മാങ്കൂട്ടത്തിനെതിരെ ആരോപണങ്ങള്‍ ഉന്നയിക്കുന്ന പെണ്‍കുട്ടികള്‍ പരാതി നല്‍കാത്തത്? ആദ്യം മുതല്‍ തന്നെ നിലനില്‍ക്കുന്ന ചോദ്യമാണിത്. പൊതുസമൂഹത്തില്‍ ഒരു പരാതിയുമായി വരാന്‍ അവര്‍ ഭയക്കുന്ന ഒരുപാട് ഘടകങ്ങള്‍ ഉണ്ടാകും, അത് പലതുമാകാം. കേരളത്തിലെ മുന്‍നിര മാധ്യമ സ്ഥാപനങ്ങള്‍ എല്ലാം വിഷയം ഗൗരവമായി ചര്‍ച്ച ചെയ്യുന്നുണ്ട്, നല്ല കാര്യമാണ്.
പക്ഷേ ഇങ്ങനെയുള്ള സംഭവങ്ങള്‍ ഈ മാധ്യമ സ്ഥാപനങ്ങള്‍ക്കുള്ളില്‍ നടക്കുമ്പോള്‍ എന്ത് നിലപാടാണ് ഇവര്‍ സ്വീകരിക്കുന്നത് എന്നത് കൂടി ചര്‍ച്ച ചെയ്യേണ്ടതാണ്. 'മാധ്യമ പ്രവര്‍ത്തകരുടെ പ്രശ്നങ്ങള് ആരും ചര്‍ച്ച ചെയ്യാറില്ല. അതുകൊണ്ട് അത് ആരും അറിയാറുമില്ല.' പലയിടത്ത് നിന്നും കെട്ടിട്ടുള്ള വാചകമാണ്. അതെല്ലാ രീതിയിലും ശരിയാണ്.
ഒരു ഉദാഹരണം പറയാം. ഈ കഴിഞ്ഞ മെയ് മാസത്തില്‍ ഞാന്‍ ജോലി ചെയ്തിരുന്ന മാധ്യമ സ്ഥാപനം ആവശ്യപ്പെട്ടത് കൊണ്ട് 3 ദിവസത്തെ ഡെപ്യൂട്ടേഷനില്‍ ന്യൂസ് ഡെസ്‌കില്‍ വരേണ്ട ഒരു സാഹചര്യം ഉണ്ടായിരുന്നു. ഡെസ്‌കില്‍ എത്തിയ ദിവസം അടുത്ത സുഹൃത്തായി കണ്ടിരുന്ന ഒരു വ്യക്തിയില്‍ നിന്നും അന്നേ ദിവസം മോശമായ ഒരു അനുഭവം എനിക്കുണ്ടായി. അപ്പോഴത്തെ ഞെട്ടലില്‍ ഒന്നും ചെയ്യാന്‍ കഴിഞ്ഞില്ല. മുഖം തരാതെ അയാള്‍ ഓടിപ്പോയി. ഇയാളെയാണോ ഇത്രയും നാള്‍ ഞാന്‍ നല്ല സുഹൃത്തായി കണ്ടത് എന്നതായിരുന്നു എന്റെ ചിന്ത. ആ രാത്രി എനിക്ക് ഉറങ്ങാന്‍ കഴിഞ്ഞിരുന്നില്ല. ന്യൂസ് ഡെസ്‌കിലെ എന്റെ അടുത്ത സുഹൃത്തുക്കളായ രണ്ടുപേരോട് അന്ന് രാത്രി വിഷയം പറഞ്ഞു. പരാതി നല്‍കിയാലോ എന്നും ആലോചിച്ചു. പരാതി നല്‍കരുത് എന്നായിരുന്നു അവരുടെ ഉപദേശം.
എന്നെക്കാള്‍ മുതിര്‍ന്ന ഒരു മാധ്യമപ്രവര്‍ത്തകന്‍. മറ്റ് പല മാധ്യമ സ്ഥാപനങ്ങളിലും ജോലി ചെയ്ത് അനുഭവ സമ്പത്തുള്ള വ്യക്തി. അത്തരത്തില്‍ ഒരാള്‍ക്കെതിരെ പരാതി നല്‍കിയാല്‍ നഷ്ടം നിനക്കായിരിക്കും എന്നതായിരുന്നു അവരുടെ മറുപടി. അവര്‍ നല്‍കിയ ഉപദേശം ശരിയാണ്. പരാതി നല്‍കിയാല്‍ പിന്നീട് അതിന്റെ പേരില്‍ അനുഭവിക്കേണ്ടിവരുന്നത് ഞാന്‍ തന്നെയായിരിക്കും. അതുകൊണ്ട് പരാതി നല്‍കിയില്ല. പക്ഷേ അവന് ചെയ്തതിനുള്ള മറുപടി അവന് കൊടുക്കണം. എന്നിട്ടേ തിരിച്ചു പോകൂ എന്ന് ഞാന്‍ ഉറപ്പിച്ചു. 'പ്രശ്നത്തിന് ഒന്നും പോകല്ലേ അഞ്ജനേ' എന്ന് വീണ്ടും പറഞ്ഞു. ചെറിയ ഒരു മറുപടി കൊടുത്തിട്ട് ബ്യുറോയില്‍ പൊക്കോളാം എന്ന് ഞാന്‍ പറഞ്ഞു.
പിറ്റേ ദിവസം അതിനുള്ള ചെറിയ ഒരു മറുപടി കൊടുത്തു. അതിന് ശേഷം കോട്ടയം ബ്യുറോയില്‍ തിരിച്ചെത്തി. പിന്നീട് പല ഭാഗത്ത് നിന്നും എനിക്ക് ഫോണ്‍ കാളുകള്‍ വന്നു. ഞാന്‍ മറുപടി കൊടുത്തത് മാത്രമേ ഫോണ്‍ ചെയ്തവര്‍ അറിഞ്ഞിരുന്നുള്ളൂ. എന്തിനാണ് മറുപടി കൊടുത്തത് എന്ന് അവര്‍ ചോദിച്ചുമില്ല, ഞാന്‍ പറഞ്ഞതുമില്ല. കുറച്ച് ദിവസത്തെ ചര്‍ച്ചകള്‍ക്ക് ശേഷം വിഷയം അവിടെ എല്ലാവരും മറന്നു. ഈ സംഭവമുണ്ടായി ഒന്നരമാസത്തിന് ശേഷം എനിക്ക് ലീവ് കിട്ടാത്ത ഒരു സാഹചര്യം വന്നു.
'മെഡിക്കല്‍ എമര്‍ജന്‍സി ആയിട്ടും നിനക്ക് ലീവ് തരാത്തത് എന്താണെന്ന് അറിയാമോ?' എന്ന സുഹൃത്തിന്റെ ചോദ്യത്തിലാണ് പിന്നീട് ഈ വിഷയത്തെക്കുറിച്ച് ചിന്തിക്കുന്നത്. ശരിയാണ്, ഒരുപക്ഷേ ലീവ് തരാത്തതിനുള്ള കാരണം അതാകാം. പക്ഷെ, അത് ഒരു സംശയം മാത്രമായിരുന്നു. പിന്നീടുള്ള ദിവസങ്ങളില്‍ ആ സംശയം ഉറപ്പിക്കാനും സാധിച്ചു. ജോലി രാജിവെപ്പിക്കണം എന്നൊന്നും അവര്‍ക്ക് ഉദ്ദേശമില്ലായിരുന്നു, കുറച്ചുദിവസം അവളെ ഒന്ന് വട്ടം കറക്കാം, അങ്ങോട്ടുമിങ്ങോട്ടും ഓടിക്കാം, അതായിരുന്നു ഉദ്ദേശം. ആ ഉദ്ദേശത്തിന് അധികം ദിവസം നിന്ന് കൊടുത്തില്ല. ഉടന്‍ തന്നെ വീട്ടില്‍ പോലും പറയാതെ Resignation Letter മെയില്‍ ചെയ്തു. 'രാജിവെക്കുന്ന കാര്യം നീ പറഞ്ഞില്ലല്ലോ?' എന്നും പറഞ്ഞ് ഇപ്പോഴും പിണങ്ങിയിരിക്കുന്ന സുഹൃത്തുക്കളുണ്ട്. ഒന്നിനും കഴിയുന്ന ഒരു മാനസികാവസ്ഥയില്‍ ആയിരുന്നില്ല അന്ന് ഞാന്‍ എന്നെ പറയാനുള്ളൂ.
അപ്പോള്‍ പറഞ്ഞുവന്നത് ഇത്രെയും മാത്രം, പരാതി കൊടുക്കൂ എന്ന് പറയാന്‍ എളുപ്പമാണ്. പക്ഷേ പരാതി നല്‍കിയാലും അനുഭവിക്കേണ്ടിവരുന്നത് ഈ യുവതികള്‍ തന്നെയായിരിക്കും.
