'ഇത് എന്റെ നേതാവിന്റെ വിജയം... അചഞ്ചലമായ നിലപാടിന്റെ വിജയം... അപമാനിച്ചവര്ക്കുള്ള ശക്തമായ മറുപടി... ഒരേ ഒരു രാജ': തദ്ദേശത്തില് യുഡിഎഫ് മിന്നും ജയം നേടിയതോടെ വി ഡി സതീശന് നേരേ സൈബറാക്രമണം നടത്തിയവര്ക്ക് മറുപടിയുമായി റിനി ആന് ജോര്ജ്
വി ഡി സതീശന് നേരേ സൈബറാക്രമണം നടത്തിയവര്ക്ക് മറുപടിയുമായി റിനി ആന് ജോര്ജ്
തിരുവനന്തപുരം: തദ്ദേശ തിരഞ്ഞെടുപ്പില്, കോണ്ഗ്രസിന്റെ ഉജ്ജ്വല മുന്നേറ്റത്തില്, പ്രതിപക്ഷ നേതാവ് വി ഡി സതീശനെ അനുമോദിച്ച് നടിയും മോഡലുമായ റിനി ആന് ജോര്ജ്. ഫേസ്ബുക്ക് കുറിപ്പിലൂടെയാണ് റിനിയുടെ പ്രശംസ. രാഹുല് മാങ്കൂട്ടത്തില് എംഎല്എയ്ക്കെതിരെ ആദ്യം രംഗത്ത് വന്നത് റിനിയായിരുന്നു.
റിനിയുടെ ഫേസ്ബുക്ക് കുറിപ്പ്
'ഇത് എന്റെ നേതാവിന്റെ വിജയം... അചഞ്ചലമായ നിലപാടിന്റെ വിജയം... അപമാനിച്ചവര്ക്കുള്ള ശക്തമായ മറുപടി... ഒരേ ഒരു രാജ.'
ഒരു യുവനേതാവില് നിന്ന് മോശം അനുഭവം ഉണ്ടായെന്നും, അശ്ലീല സന്ദേശം അയച്ചതിന് എതിരെ പ്രതികരിച്ചപ്പോള് 'ഹു കെയേഴ്സ്' എന്നായിരുന്നു അദ്ദേഹത്തിന്റെ മനോഭാവമെന്നും റിനി രാഹുല് മാങ്കൂട്ടത്തിലിന് എതിരെ വെളിപ്പെടുത്തല് നടത്തിയിരുന്നു.
മാങ്കൂട്ടത്തിലിന്റെ പേര് പറയാതെയായിരുന്നു റിനിയുടെ പ്രതികരണം. എന്നാല് മുന്പ് രാഹുല് സോഷ്യല് മീഡിയയില് സ്വീകരിച്ച 'ഹു കെയേഴ്സ്' ആറ്റിറ്റിയൂഡ് ചൂണ്ടിക്കാട്ടി സോഷ്യല് മീഡിയ ഇത് രാഹുല് ആണെന്ന രീതിയില് ചര്ച്ചകള് സജീവമാക്കി.
ഇതിന് പിന്നാലെ രാഹുലിനെതിരെ കൂടുതല് പേര് വെളിപ്പെടുത്തലുമായി രംഗത്തെത്തി. യുവതിയെ ഗര്ഭച്ഛിദ്രത്തിന് നിര്ബന്ധിക്കുന്ന രാഹുലിന്റെ ഫോണ് സംഭാഷണവും, ഭീഷണിപ്പെടുത്തുന്ന സംഭാഷണവും പുറത്തുവന്നതോടെ വിവാദം കൂടുതല് രൂക്ഷമായി.
വിവാദം ശക്തമായതിനെത്തുടര്ന്ന് കോണ്ഗ്രസ് നേതൃത്വം വിഷയത്തില് കര്ശന നിലപാടെടുത്തു. രാഹുലിനെതിരെ നടപടി എടുക്കണമെന്ന നിലപാട് വി.ഡി. സതീശന് ശക്തമായി സ്വീകരിച്ചിരുന്നു. ഒടുവില്, പ്രാഥമിക അംഗത്വത്തില് നിന്ന് രാഹുല് മാങ്കൂട്ടത്തിലിനെ കോണ്ഗ്രസ് പുറത്താക്കുകയായിരുന്നു.
