തിരഞ്ഞെടുപ്പിന് മുന്‍പേ പിണറായി സര്‍ക്കാരിന് വീണ്ടും അഗ്നിപരീക്ഷ! ശബരിമല യുവതീ പ്രവേശന കേസ് സുപ്രീംകോടതി തിങ്കളാഴ്ച പരിഗണിക്കും; സര്‍ക്കാര്‍ പഴയ നിലപാടില്‍ ഉറച്ചുനില്‍ക്കുമോ അതോ വിശ്വാസികള്‍ക്കൊപ്പം മാറുമോ? പുന: പരിശോധനാ ഹര്‍ജികളില്‍ എന്ന് വാദം തുടങ്ങുമെന്ന് നിശ്ചയിക്കാന്‍ ചീഫ് ജസ്റ്റിസ് അദ്ധ്യേക്ഷനായ ഒമ്പതംഗ ബഞ്ച്

ന്യൂഡല്‍ഹി: കേരള രാഷ്ട്രീയത്തെയും സാമൂഹിക സാഹചര്യങ്ങളെയും ഒരുപോലെ പിടിച്ചുലച്ച ശബരിമല യുവതീപ്രവേശന വിഷയം വീണ്ടും സുപ്രീം കോടതിയുടെ സജീവ പരിഗണനയിലേക്ക്. യുവതീപ്രവേശന വിധി പുനഃപരിശോധിക്കണമെന്ന റിവ്യൂ ഹര്‍ജികള്‍ ഉള്‍പ്പെടെയുള്ളവ വരുന്ന തിങ്കളാഴ്ച സുപ്രീം കോടതി പരിഗണിക്കും. ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ചാണ് ഹര്‍ജികള്‍ പരിഗണിക്കുന്നത്.

ദീര്‍ഘമായ ഏഴു വര്‍ഷത്തെ ഇടവേളയ്ക്ക് ശേഷമാണ് ശബരിമല വിഷയം സുപ്രീം കോടതിയുടെ ലിസ്റ്റില്‍ ഇടംപിടിക്കുന്നത് എന്നത് ശ്രദ്ധേയമാണ്. തിങ്കളാഴ്ച കോടതി പരിഗണിക്കുന്ന കേസുകളില്‍ 44-ാമതായാണ് ശബരിമല കേസ് ഉള്‍പ്പെടുത്തിയിരിക്കുന്നത്.

2019-ല്‍ ശബരിമല കേസ് ഒമ്പതംഗ വിശാല ബെഞ്ചിന്റെ പരിഗണനയ്ക്ക് വിട്ടിരുന്നുവെങ്കിലും കോവിഡ് സാഹചര്യങ്ങള്‍ മൂലം നടപടികള്‍ നീണ്ടുപോവുകയായിരുന്നു. അന്ന് ആ ബെഞ്ചിലുണ്ടായിരുന്ന ജഡ്ജിമാരില്‍ നിലവില്‍ സര്‍വീസിലുള്ള ഏക ജഡ്ജിയാണ് ഇപ്പോഴത്തെ ചീഫ് ജസ്റ്റിസ് സൂര്യകാന്ത്. തിങ്കളാഴ്ച മൂന്നംഗ ബെഞ്ച് കേസ് പരിഗണിക്കുമ്പോള്‍, വിശാല ബെഞ്ചിന്റെ വാദം എന്ന് തുടങ്ങണം എന്ന കാര്യത്തില്‍ വ്യക്തത ഉണ്ടായേക്കും.

തിരഞ്ഞെടുപ്പ് അടുക്കെ സര്‍ക്കാര്‍ നിലപാട് എന്ത്?

നിയമസഭാ തിരഞ്ഞെടുപ്പിന്റെ ഒരുക്കങ്ങളിലേക്ക് സംസ്ഥാനം കടക്കാനിരിക്കെ കേസ് വീണ്ടും കോടതിയിലെത്തുന്നത് രാഷ്ട്രീയ പാര്‍ട്ടികള്‍ക്കും നിര്‍ണ്ണായകമാണ്. മുന്‍പ് യുവതീപ്രവേശനത്തെ അനുകൂലിച്ച സംസ്ഥാന സര്‍ക്കാര്‍ പുതിയ സാഹചര്യത്തില്‍ എന്ത് നിലപാട് സ്വീകരിക്കും എന്നത് രാഷ്ട്രീയ കേരളം ഉറ്റുനോക്കുന്നു.

വിശ്വാസികള്‍ക്കൊപ്പം എന്ന നിലപാടില്‍ ഉറച്ചുനില്‍ക്കുന്ന യുഡിഎഫും ബിജെപിയും കോടതി നടപടികളെ രാഷ്ട്രീയമായി എങ്ങനെ ഉപയോഗിക്കുമെന്നതും നിര്‍ണ്ണായകമാകും.

നാഴികക്കല്ലായ 2018-ലെ വിധി

2018 സെപ്റ്റംബര്‍ 28-നാണ് എല്ലാ പ്രായത്തിലുമുള്ള സ്ത്രീകള്‍ക്ക് ശബരിമലയില്‍ പ്രവേശനം അനുവദിച്ച് സുപ്രീം കോടതിയുടെ ഭരണഘടനാ ബെഞ്ച് ചരിത്രവിധി പുറപ്പെടുവിച്ചത്. ആര്‍ത്തവത്തിന്റെ പേരില്‍ സ്ത്രീകളെ മാറ്റിനിര്‍ത്തുന്നത് ഭരണഘടനാ ലംഘനമാണെന്ന് ചീഫ് ജസ്റ്റിസ് ദീപക് മിശ്രയുടെ നേതൃത്വത്തിലുള്ള ബെഞ്ച് വിധിച്ചു.

അഞ്ചംഗ ബെഞ്ചില്‍ ജസ്റ്റിസ് ഇന്ദു മല്‍ഹോത്ര മാത്രമാണ് വിധിനോട് വിയോജിച്ചത്. മതവിശ്വാസങ്ങളില്‍ കോടതി ഇടപെടരുതെന്നായിരുന്നു അവരുടെ നിലപാട്.

കോടതിയുടെ പരിഗണനയിലുള്ള പ്രധാന വിഷയങ്ങള്‍:

സ്ത്രീപ്രവേശന വിധി പുനഃപരിശോധിക്കണമെന്ന റിവ്യൂ ഹര്‍ജികള്‍.

മതസ്വാതന്ത്ര്യവും ലിംഗസമത്വവും തമ്മിലുള്ള ഭരണഘടനാപരമായ തര്‍ക്കങ്ങള്‍.

ശബരിമല അയ്യപ്പഭക്തരെ പ്രത്യേക മതവിഭാഗമായി പരിഗണിക്കാനാകുമോ എന്ന ചോദ്യം.

തിങ്കളാഴ്ച സുപ്രീം കോടതിയില്‍ നിന്നുണ്ടാകുന്ന ഓരോ പരാമര്‍ശവും കേരളത്തിലെ വരാനിരിക്കുന്ന തിരഞ്ഞെടുപ്പ് ഗോദയില്‍ വലിയ ചലനങ്ങള്‍ സൃഷ്ടിക്കുമെന്ന് ഉറപ്പാണ്.