മ്യാന്മാറിനെ നടുക്കി ഭൂകമ്പം; മരണസംഖ്യ 2719 ആയി ഉയർന്നു; കെട്ടിടാവശിഷ്ടങ്ങളിൽ നിന്ന് ഒരു വയോധികനെ രക്ഷിച്ചു; നാശനഷ്ടങ്ങളുടെ ഉപഗ്രഹചിത്രം പുറത്തുവിട്ട് ഐഎസ്ആർഒ
ബാങ്കോക്ക്: മ്യാന്മാറിനെ നടുക്കിയ ഭൂകമ്പത്തിൽ മരണസംഖ്യ ഉയരുന്നു. മരിച്ചവരുടെ എണ്ണം ഇപ്പോൾ തന്നെ 2719 ആയി ഉയർന്നു. മരണസംഖ്യ ഇനിയും ഉയരുമെന്നാണു റിപ്പോർട്ടുകൾ പുറത്തുവരുന്നത്. 91 മണിക്കൂറിനുശേഷം അറുപത്തിമൂന്നുകാരിയെ കെട്ടിടാവശിഷ്ടങ്ങളിൽ നിന്ന് ഇന്നലെ രക്ഷപ്പെടുത്തി.
രക്ഷാപ്രവർത്തനം അഞ്ചാം ദിവസവും തുടരുകയാണെങ്കിലും ആളുകളെ ജീവനോടെ രക്ഷപ്പെടുത്താമെന്ന പ്രതീക്ഷ അസ്തമിച്ചുതുടങ്ങി.ഇപ്പോൾ രാജ്യത്തിന്‍റെ പല ഭാഗങ്ങളിലും വൈദ്യുതി നിലച്ചിരിക്കുകയാണ്. ശുദ്ധജലം, ഭക്ഷണം, മരുന്ന് എന്നിവയുടെ അഭാവംമൂലം ജനം ഇപ്പോൾ വലിയ ദുരിതത്തിലാണ്.
കഴിഞ്ഞ വെള്ളിയാഴ്ചയുണ്ടായ ഭൂകമ്പത്തിൽ 441 പേരെ കാണാതായി. അയ്യായിരത്തോളം പേർക്കു പരിക്കേറ്റു. പതിനായിരത്തിലേറെ കെട്ടിടങ്ങൾ നിലംപൊത്തിയെന്ന് ലോകാരോഗ്യ സംഘടന അറിയിച്ചു. അയൽരാജ്യമായ തായ്‌ലൻഡിൽ 21 പേരാണു മരിച്ചത്.
അതേസമയം, ഭൂകമ്പത്തിലുണ്ടായ വ്യാപക നാശനഷ്ടങ്ങളുടെ ഉപഗ്രഹചിത്രം ഇന്നലെ ഐഎസ്ആർഒ പുറത്തുവിട്ടു. എർത്ത് ഇമേജിംഗ് ഉപഗ്രഹമായ കാർട്ടോസാറ്റ്-3 ഉപയോഗിച്ചാണ് ചിത്രങ്ങൾ പകർത്തിയത്.
